Unsay Anaa sa Umaabot?
Unsay Anaa sa Umaabot?
NGANONG HINUNGDANON NGA MASAYRAN ANG TUBAG NIINING PANGUTANAHA? Ang panglantaw sa usa ka tawo sa iyang kaugmaon makaapektar sa paagi sa iyang pagkinabuhi karon. Pananglitan, kadtong walay paglaom sa umaabot mosagop tingali sa tinamdan nga: “Mangaon kita ug manginom, kay ugma kita mangamatay.” (1 Corinto 15:32) Ang maong tinamdan sagad mosangpot sa pagpatuyang sa pagkaon, paghuboghubog, ug kabalaka—dili sa tinuod nga kalinaw sa hunahuna.
Pananglitan, kon ang ugma isalig lamang sa tawo, mahimong mangiob ang atong kaugmaon. Ang hangin, tubig, ug yuta labi pa ka hugaw karon. Nagkadako ang posibilidad nga mahitabo ang nukleyar nga gubat ug ang pag-atake sa mga terorista. Sa tibuok kalibotan, bilyonbilyon ang nag-antos sa sakit ug nag-ilaid sa kakabos. Bisan pa niana, dunay maayong katarongan nga molaom.
Ang mga tawo dili gayod makatag-an kon unsay anaa sa umaabot, apan si Jehova nga Diyos naghubit sa iyang kaugalingon ingong “ang Usa nga nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.” (Isaias 46:10) Unsay giingon ni Jehova nga mahitabo sa umaabot?
Kon Unsay Giingon sa Bibliya
Dili tugotan ni Jehova nga malaglag ang yuta o ang mga linalang diha niana. Gani, ang Bibliya nagsaad nga ‘laglagon sa Diyos ang nagalaglag sa yuta.’ (Pinadayag 11:18) Pinaagi sa iyang Gingharian, o langitnong kagamhanan, paphaon ni Jehova gikan sa yuta ang pagkadaotan ug ipasig-uli ang kahimtang sumala sa iyang katuyoan sa sinugdan. (Genesis 1:26-31; 2:8, 9; Mateo 6:9, 10) Gipakita sa mosunod nga mga teksto kon unsay anaa sa umaabot, nga naghubit sa mga hitabo nga sa dili madugay mag-apektar sa matag usa dinhi sa yuta.
Salmo 46:8, 9. “Dali kamo, tan-awa ang mga kalihokan ni Jehova, kon giunsa niya pagpahinabo ang makapahinganghang mga hitabo sa ibabaw sa yuta. Gipahunong niya ang mga gubat hangtod sa kinatumyan sa yuta. Gibali niya ang busogan ug giputolputol ang bangkaw; ang mga karomata iyang gisunog sa kalayo.”
Isaias 35:5, 6. “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya. Kay sa kamingawan ang mga tubig mobugwak, ug ang mga sapa sa desyertong kapatagan.”
Isaias 65:21, 22. “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon.”
Daniel 2:44. “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”
Juan 5:28, 29. ‘Ang takna nagsingabot nga ang tanan nga anaa sa handomanang mga lubnganan makadungog sa tingog ni Jesus ug manggula.’
Pinadayag 21:3, 4. “Ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”
Kon sa Unsang Paagi ang Tubag sa Bibliya Makahatag ug Tinuod nga Kalinaw sa Hunahuna
Ang mga kahimtang nga bag-o pang gihubit morag dili katuohan. Apan, Diyos ang nagsaad niini, dili mga tawo. Gawas pa, si Jehova nga Diyos “dili makabakak.”—Tito 1:2.
Kon ikaw mosalig sa mga saad sa Diyos ug magkinabuhi subay sa iyang mga balaod, mahuptan gayod nimo ang kalinaw sa hunahuna bisan pa sa malisod nga mga kahimtang. Ang gubat, kakabos, sakit, ug bisan ang mga suliran tungod sa katigulangon o ang posibilidad nga mamatay dili makawagtang sa imong kalinaw sa hunahuna. Ngano? Tungod kay makasalig ka nga wagtangon sa Gingharian sa Diyos ang mga epekto niining maong mga suliran.
Sa unsang paagi imong mabatonan kanang lig-on nga paglaom alang sa umaabot? Kinahanglan nga imong ‘bag-ohon ang imong hunahuna’ ug pamatud-an sa imong kaugalingon “ang maayo ug dalawaton ug hingpit nga kabubut-on sa Diyos.” (Roma 12:2) Lagmit nagkinahanglan ka ug dugang pamatuod nga kasaligan ang mga saad sa Bibliya. Ang imong pagsusi niana dili gayod makawang, tungod kay sa pagbuhat niana, imong mabatonan ang tinuod nga kalinaw sa hunahuna.
[Mga hulagway sa panid 8, 9]
Unsay gisulti sa Pulong sa Diyos bahin sa umaabot?