Nso Iditịbe ke Ini Iso?
Nso Iditịbe ke Ini Iso?
NTAK IKPOYOMDE IBỌRỌ MBỤME EMI-E? Se owo ekerede aban̄a n̄kpọn̄ otụk nte enye odude uwem mfịn. Ke uwụtn̄kpọ, mbon oro mîtịmke inyene idotenyịn iban̄a ini iso ẹkeme ndidọhọ: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.” (1 Corinth 15:32) Utọ edu oro esiwak ndida nsịm uyụhọ udia, edin̄wọn̄ mmịn mbe ubọk, ye editịmede esịt—utu ke ndinam esịt ana owo sụn̄.
Edi akpanikọ, edieke ekpedide owo enyene ndibiere se iditịbede ke ini iso, nnyịn ikpenyeneke idotenyịn ndomokiet. Ẹsabade ofụm, mmọn̄, ye isọn̄ akan nte akanam ẹsabarede. Mme owo ẹnen̄ede ẹkop ndịk ẹban̄a ekọn̄ nuclear ye mme edinam oyomonsia. Ediwak biliọn owo ke ofụri ererimbot ke ẹdọn̄ọ ẹnyụn̄ ẹbuene. Edi imosụk ikeme ndinyene idotenyịn.
Ke adan̄aemi mme owo mîkemeke nditịn̄ ini iso nnennen nnennen, Jehovah Abasi ọdọhọ ke imọ idi enye ‘emi isiakde akpatre ke akpa, ndien ke eset isiak se mînamke kan̄a.’ (Isaiah 46:10) Jehovah ọdọhọ ke nso iditịbe ke ini iso?
Se Bible Etịn̄de
Jehovah idiyakke ẹbiat isọn̄ m̀mê uwem ẹbe nde. Ke akpanikọ, Bible ọn̄wọn̄ọ nte ke Abasi ‘oyosobo mmọ oro ẹsobode isọn̄.’ (Ediyarade 11:18) Jehovah ayada Obio Ubọn̄, m̀mê ukara esie eke heaven, osio idiọkido efep ke isọn̄ onyụn̄ anam isọn̄ etie nte enye akaduakde toto ke editọn̄ọ. (Genesis 1:26-31; 2:8, 9; Matthew 6:9, 10) Mme ufan̄ikọ Bible oro ẹtienede mi ẹn̄wam nnyịn ndifiọk se iditịbede ke ini iso, ẹnyụn̄ ẹtịn̄ mme n̄kpọntịbe emi ẹditụkde kpukpru owo ke isọn̄.
Psalm 46:8, 9. “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu esịm ke utịt ekondo; oyobụn̄ utịgha, onyụn̄ esịbe eduat: oyonyụn̄ ọfọp mme chariot ke ikan̄.”
Isaiah 35:5, 6. “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ: koro mmọn̄ asiahade ke wilderness, idịm n̄ko ke desert.”
Isaiah 65:21, 22. “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.”
Daniel 2:44. “Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”
John 5:28, 29. “Ini ke edi eke kpukpru mme andidu ke udi editi ẹdikopde [Jesus] uyo ẹnyụn̄ ẹwọn̄ọ ẹdi.”
Ediyarade 21:3, 4. “Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”
Nte Ibọrọ Oro Bible Ọnọde Anamde Esịt Enen̄ede Ana Fi Sụn̄
Afo emekeme ndikere ke se ẹtịn̄de ke enyọn̄ emi iditịbeke. Edi idịghe owo ọn̄wọn̄ọ ndinam mme n̄kpọ emi, edi Abasi ọn̄wọn̄ọ. Ndien Jehovah Abasi ‘ikemeke ndisu nsu.’—Titus 1:2.
Edieke afo ekpepde ndibuọt idem ke mme un̄wọn̄ọ Abasi onyụn̄ enịmde mme mbet esie, esịt ayaka iso ana fi sụn̄ inamke n̄kpọ m̀mê idaha emi afo osobode ọsọn̄ adan̄a didie. Mme utọ n̄kpọ nte ekọn̄, udọn̄ọ, ye idem mme mfịna oro usọn̄ adade edi m̀mê ndifiọk ke usen kiet n̄kpa ekeme ndida fi, idinen̄ekede itịmede fi esịt. Ntak-a? Koro afo eyetịm ọfiọk nte ke Obio Ubọn̄ Abasi oyosio kpukpru ndiọi idaha emi efep.
Didie ke afo ekeme ndinyene utọ idotenyịn emi mban̄a ini iso? Ana afo ‘anam ekikere fo edi obufa’ onyụn̄ ‘odomo ọfiọk uduak Abasi eke edide eti onyụn̄ enemde enye esịt onyụn̄ ọfọnde ama.’ (Rome 12:2) Ekeme ndidi afo oyoyom mme nsọn̄ọ efen efen ndiwụt ke ẹkeme ndiberi edem ke mme un̄wọn̄ọ Bible. Odot anam utọ ndụn̄ọde oro. Iwakke n̄kpọ emi afo edinamde ke uwem, oro edinamde esịt enen̄ede ana fi sụn̄.
[Ndise ke page 8]
Nso ke Ikọ Abasi etịn̄ aban̄a ini iso?