Mɛni Baaba Wɔsɛɛ?
Mɛni Baaba Wɔsɛɛ?
MƐNI HEWƆ HETOO LƐ HE HIAA LƐ? Nibii ni mɔ ko kpaa gbɛ yɛ wɔsɛɛ be mli lɛ saa bɔ ni ehiɔ shi ehaa ŋmɛnɛ lɛ he. Ákɛ nɔkwɛmɔnɔ lɛ, ekolɛ mɛi ni hiɛnɔkamɔ fioo ko pɛ amɛyɔɔ yɛ wɔsɛɛ be he lɛ baaŋɔ su ni ji: “Nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi!” (1 Korintobii 15:32) Bei pii lɛ su ni tamɔ nɛkɛ lɛ haa mɛi yeɔ nii fe nine, amɛnuɔ dãa babaoo, ni amɛfeɔ yeyeeye—shi fɛɛ haaa amɛná toiŋjɔlɛ diɛŋtsɛ.
Yɛ anɔkwale mli lɛ, kɛji adesai ji mɛi ni baatsɔɔ nɔ ni baaba wɔsɛɛ kulɛ, wɔgbɛkpamɔi fɛɛ baafee shwɛm. Aawo kɔɔyɔɔ kɛ nui amli muji, ni aafite shikpɔŋ lɛ hu nɔ yɛ gbɛ ni eko bako nakai dã nɔ. Gbeyei ni asheɔ akɛ nuklea ta baanyɛ afɛ, ni abaanyɛ akɛ awuiyeli atutua mɛi lɛ miiya nɔ eewo wu. Hela kɛ ohia haoɔ mɛi akpekpei toi akpei abɔ yɛ je lɛŋ fɛɛ. Kɛlɛ, wɔbaanyɛ wɔná hiɛnɔkamɔ yɛ yiŋtoi kpakpai ahewɔ.
Yɛ be mli ni adesai nyɛŋ atsɔɔ nɔ ni baaba wɔsɛɛ kɛmɔ shi lɛ, Yehowa Nyɔŋmɔ wieɔ yɛ lɛ diɛŋtsɛ ehe akɛ “mi ni mijɛɔ shishijee lɛ mijajeɔ naagbee nii lɛ, ni mijɛɔ blema beebe mijajeɔ nii ní anáko afee lɛ.” (Yesaia 46:10) Mɛni Yehowa kɛɔ yɛ nɔ ni baaba wɔsɛɛ lɛ he?
Nɔ ni Biblia lɛ Kɛɔ
Yehowa eŋmɛŋ gbɛ ni afite shikpɔŋ lɛ loo ni akpata nibii ni yɔɔ wala mli lɛ ahiɛ kɛya naanɔ. Yɛ anɔkwale mli lɛ Biblia lɛ woɔ shi akɛ Nyɔŋmɔ ‘baafite mɛi ni fiteɔ shikpɔŋ lɛ.’ (Kpojiemɔ 11:18) Yehowa baatsɔ e-Maŋtsɛyeli loo eŋwɛi nɔyeli lɛ nɔ ejie efɔŋfeemɔi fɛɛ kɛjɛ shikpɔŋ lɛ nɔ koni eha eshishijee yiŋtoo lɛ aba mli. (1 Mose 1:26-31; 2:8, 9; Mateo 6:9, 10) Biblia mli kukuji ni nyiɛ sɛɛ nɛɛ haa wɔleɔ nɔ ni baaba wɔsɛɛ, ni amɛtsɔɔ wɔ nifeemɔi ni etsɛŋ kwraa ni ebaasa aŋkroaŋkroi fɛɛ ni yɔɔ shikpɔŋ lɛ nɔ lɛ ahe.
Lala 46:9, 10. “Nyɛbaa nyɛbakwɛa Yehowa nitsumɔi lɛ, nɔ̃ hiɛkpatamɔ ni eha eba shikpɔŋ lɛ nɔ lɛ! Ehãa tai asɛɛ foɔ kɛyaa shikpɔŋ lɛ naagbeehei lɛ, ekuɔ gãi mli, ni efoɔ akpɔlɔ mli, ta shwiilii lɛ hu eshãa kɛ la.”
Yesaia 35:5, 6. “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaalá kɛ nyamɔ; ejaakɛ nui aaatue yɛ ŋã kpataa nɔ, ni faai aaaho yɛ ŋã olɛŋlɛ nɔ.”
Yesaia 65:21, 22. “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye.”
Daniel 2:44. “Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”
Yohane 5:28, 29. “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu [Yesu] gbee, ni amɛaaje kpo.”
Kpojiemɔ 21:3, 4. “Nyɔŋmɔ diɛŋtsɛ kɛ amɛ aaahi shi. . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”
Bɔ ni Hetoo ni Biblia lɛ Kɛhaa lɛ Haa Anáa Toiŋjɔlɛ Diɛŋtsɛ
Klɛŋklɛŋ kwraa lɛ, ekolɛ ebaawa akɛ ooohe oye akɛ shihilɛi ni awie he kɛtsɔ hiɛ lɛ fɛɛ baaba mli lɛɛlɛŋ. Shi Nyɔŋmɔ ji mɔ ni kɛ shiwoi nɛɛ ha, jeee gbɔmɛi. Ni Yehowa Nyɔŋmɔ “maleee.”—Tito 1:2.
Kɛ́ okase bɔ ni akɛ he fɔ̃ɔ Nyɔŋmɔ shiwoi anɔ ni ohi shi yɛ emlai lɛ anaa lɛ, no lɛ obaaya nɔ oná toiŋjɔlɛ yɛ shihilɛi ni mli wawai ni okɛkpeɔ lɛ fɛɛ sɛɛ. Nibii tamɔ ta, ohia, hela kɛ naagbai ni jɛɔ gbɔlɛ mli kɛbaa loo le ni ole po akɛ etsɛŋ ni obaagbo lɛ nyɛŋ atsi onaa koni okaná toiŋjɔlɛ kɛya naanɔ. Mɛni hewɔ? Ejaakɛ obaaná nɔmimaa akɛ Nyɔŋmɔ Maŋtsɛyeli lɛ baajaje nibii fɛɛ ni ejɛ shihilɛi fɔji nɛɛ amli kɛba lɛ.
Te obaafee tɛŋŋ oná hiɛnɔkamɔ ni tamɔ nakai kɛha wɔsɛɛ lɛ? Esa akɛ ‘otsake ojwɛŋmɔ’ koni oyoo “nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) Ekolɛ ebaabi ni oná odaseyelii krokomɛi ni tsɔɔ akɛ abaanyɛ akɛ he afɔ̃ Biblia mli shiwoi lɛ anɔ kɛmɔ shi ofata he. Kɛ́ obɔ mɔdɛŋ otao nii amli yɛ gbɛ ni tamɔ nakai nɔ lɛ, obaaná he sɛɛ waa. Nibii fioo komɛi ni ooofee yɛ shihilɛ mli lɛ baaha oná toiŋjɔlɛ babaoo.
[Mfonirii ni yɔɔ baafa 8, 9]
Mɛni Nyɔŋmɔ Wiemɔ lɛ kɛɔ yɛ wɔsɛɛ be he?