Mbaʼépa ñaneraʼarõ?
Mbaʼépa ñaneraʼarõ?
MBAʼÉREPA IÑIMPORTÁNTE JAIKUAA KO MBAʼE. Peteĩ tapicha hekovére ohechauka mbaʼépa opensa henonderãre. Umi nohaʼarõguasúiva mbaʼe porã heʼi: “Jakaru ha ñamboyʼu, koʼẽrõite niko ñamanóne” (1 Corintios 15:32). Upévare oĩ umi okaru rasapáva, okaʼúva ha ojepyʼapyetereíva; péro koʼã mbaʼe ningo nañanembopyʼaguapýi.
Añetehápe, umi mbaʼe jaipotáva ñane renonderãme jahejáramo yvyporakuéra pópe, ivaívamante jahupytýta. Koʼág̃a peve noñembyaíriva gueteri peichaite peve ñande rekoha. Ojeʼe oikotaha peteĩ gérra nuclear ha umi terrorísta oporojukapataha. Opárupi hetaitereive oĩ hasýva ha imboriahúva. Upéicharõ jepe, ikatu ñahaʼarõ heta mbaʼe porã.
Ñande ningo ndaikatúi jaʼe mbaʼeichaitépa oikóta peteĩ mbaʼe amo gotyove. Jehová katu heʼi ijehe: “Che amomarandu iñepyrũha guive, pe ipahápe ojehútava ha amombeʼu neʼirãva ojehu, heta ára mboyve” (Isaías 46:10). Upévare, mbaʼépa heʼi Jehová ñaneraʼarõha?
Mbaʼépa heʼi la Biblia?
Jehová ndohejamoʼãi oiko mbaʼeve ivaietereíva ñanderehe ha ko Yvy rehe avei. La Biblia heʼi voi Ñandejára ‘ohunditaha umi Yvy ohundívape’ (Apocalipsis [Revelación] 11:18). Jehová ningo igoviérno rupive, ohundipáta opaichagua mbaʼe vai ko Yvy ape ári, ha haʼe oipotahaguéicha ojapóta chugui peteĩ lugár neporãmba jepéva (Génesis 1:26-31; 2:8, 9; Mateo 6:9, 10). Koʼã téysto jaleétava ohechauka ñandéve mbaʼépa ñaneraʼarõ ha mbaʼépa oikóta ñandehegui.
Daniel 2:44: ‘Oisãmbyhy aja koʼã mburuvichakuéra, Ñandejára yvagapegua omoĩta peteĩ goviérno noñehundimoʼãiva arakaʼeve. Ndoʼamoʼãi avaveichagua tetã poguýpe. Ohundietéta uvei ambue goviernokuéra ha ndopamoʼãi arakaʼeve’.
Salmo 46:9, 10 [46:8, 9, NM]: ‘Pejúke pehecha Ñandejára rembiapokue, mbaʼe hechapyrãva niko haʼe ojapo ko Yvy apére. Haʼe ojoko opaichagua ñorairõ ko Yvy ári, flécha ha kyse yvuku omopẽmba, ha ohapy umi karrokuéra’.
Isaías 35:5, 6: “Upéramo umi ohechaʼỹva ohecháta, ha umi ohenduʼỹva ohendúta. Upéramo ijapáva, guasúicha oñaníta ha iñeʼẽngúva vyʼágui osapukáita, hetátagui pe y Yvy ojeikoʼỹháme ha y osyry hatãva Yvy perõme”.
Isaías 65:21, 22: “Opavave ojogapóta ha oikóta imbaʼe teépe, oñotýta parralty ha hoʼúta hiʼa. Ndaiporimoʼãi peteĩ ojogapóva ha ambue pype oikóva, térã peteĩ oñemitýva ha ambue chugui hoʼúva”.
Juan 5:28, 29: “Og̃uahẽtahína ára opa omanóva ohendu hag̃ua che ñeʼẽ, ha osẽmbáta [oĩhágui]”.
Apocalipsis [Revelación] 21:3, 4: ‘Ñandejára voi oĩvaʼerã hendivekuéra. Omokãvaʼerã hesaykuéra, ha ndaiporiveimavaʼerã ñemano, térã tasẽ, térã jaheʼo, térã mbaʼasy, opa umi mbaʼe yma oĩvaʼekue ohasapáma rupi’.
Mbaʼérepa ñanembopyʼaguapy la Biblia heʼíva
Jaleeramóme koʼã mbaʼe ikatu jaʼe hese iporãitereimaha oiko hag̃ua. Péro, Ñandejára ningo oprometehína umi mbaʼe, ndahaʼéi peteĩ yvypóra. Ha Jehová ‘ndaijapúi’ (Tito 1:2).
Nde regueroviáramo Ñandejára oprometevaʼekue ha reikóramo haʼe oipotaháicha, ndepyʼaguapýta rehasa asyvéramo jepe. Ndaipóri mbaʼeve oipeʼavaʼerã ñandehegui ñande pyʼaguapy, oikóramo jepe ñorairõ guasu, ñanemboriahu, ha ñanderasykatu, ñandetuja térã ñaneg̃uaig̃ui térã jaikuaáramo jepe ñamanotaha. Mbaʼéicha rupípa upéva? Jajeroviágui Ñandejára Goviérno osolusionambataha koʼã mbaʼe.
Mbaʼépa nde ikatu rejapo rehupyty hag̃ua avei umi mbaʼe porã? ‘Rembopyahuvaʼerã ndepyʼapypegua’ ha ‘rehechakuaavaʼerã mbaʼépa Ñandejára rembipota, pe mbaʼe porã, ha pe teko porã oguerohoryetéva’ (Romanos 12:2, JMP). Oimevaʼerã reipotareína ojehechaukave ndéve mbaʼérepa rejeroviavaʼerã la Bíbliape oñeprometévare, ha mbaʼérepa iporãta rehesaʼỹijo. Ndaiporinunga hína peichaite peve nembopyʼaguapyvaʼerã.
[Nóta oĩva taʼanga ndive páhina 8]
Mbaʼépa heʼi Ñandejára Ñeʼẽ ñaneraʼarõha?
[Nóta oĩva taʼanga ndive páhina 7]
[Nóta oĩva taʼanga ndive páhina 8]
[Nóta oĩva taʼanga ndive páhina 8]