Yumanyi Yikamwekana Kumbidi?
Yumanyi Yikamwekana Kumbidi?
MULOÑADI CHITWATELA KWILUKILA YUMA YIKAMWEKANA KUMBIDI? Muntu neyi yeluka yuma yikamwekana kumbidi chikumuletesha kwiluka mwakwilila makonu. Chakutalilahu, antu abula kwikala nakuchiñeja kwakumbidi ekalaña nayitoñojoka yakwila nawu: “Tukumini dakudya nakunwa, muloña kumadiki tukufwa.” (1 Akorinda 15:32) Yililu yamuchidiwu kakavulu yaleteshaña muntu kusweja kwikuta, kusheta walwa, nikwakama—hiyaletaña kuwunda kwalalaku.
Mwalala, kuchiñeja kwakumbidi neyi kushindamena muñovu jawantu dikwila nawu kuchiñeja kwetu kwakumbidi kukwikala kwamukunkulwayi. Mpepela, menji, niiseki anakuyitamisha chikupu. Woma wanjita yanyukiliya nikulukuka kwawatupondu kunakuvulilaku chikupu. Antu amavulu mukaayi kejima anakuyanda nanyisoñu niwuzweñi. Hela chochu, kudi yuma yayivulu yikutuleñela kwikala nakuchiñeja.
Chineli antu hiyanateli kwiluka chalala yuma yikamwekana kumbiduku, Yehova Nzambi washimuna yomweni nindi: “Kufumisha kutachi nashimunaña jakunsa, kufumisha kushankulu nashimunaña yichidi kanda ayikoñi.” (Isaya 46:10) Indi Yehova wahosha nindidi kutalisha hayuma yakamwekana kumbidi?
Chahoshaña Bayibolu
Yehova haketeja iseki hela yuma yekalahu yawumi kuyikisañanaku. Bayibolu yakana nawu Nzambi ‘wakajilumuna anakukisañana iseki.’ (Chimwekeshu 11:18) Kuhitila muWanta windi, nfulumendi yamwiwulu, Yehova wakafumisha kutama kwejima hamaseki nakufuntisha nkeñelu yindi yahatachi. (Kutachika 1:26-31; 2:8, 9; Matewu 6:9, 10) Mavasi analondeluhu amuBayibolu anakutuleja yuma yikamwekana kumbidi, anakulumbulula yuma yikakwasha muntu wejima hamaseki.
Masamu 46:8, 9. ‘Inzenu mutali nyidimu yakoñañayi Yehova; o mahembi anavulishiyi hanu hamaseki. Diyi wakumishaña majita mwakumina iseki dejima; diyi wakotolaña wuta wamukunji, wakotolaña iyoña hakachi kotu; wochaña nimakalu anjita mukesi.’
Isaya 35:5, 6. ‘Henohu dihu hakatoneshawu mesu awamputamesu, dihu hakajikulawu matu awajika matu. Henohu dihu hakakilukayi mukwakubalakata neyi nkayi, niidimi dakamama dakemba tumina; muloña mwisaña mwawuma chawu mwakabuzika meji, mwikuna mwakabuzika tuloña.’
Isaya 65:21, 22. ‘Akatuña matala, akashakamamu. Akadima matempa anyivinyu, akadya nyikabu yayu. Hiyakela atuña, mushakama acheñuku; adima, ayidya kudi acheñuku.’
Danyeli 2:44. ‘Nzambi wamwiwulu wamba kaloñesha wanta wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaka.’
Yowanu 5:28, 29. ‘Mpinji yinakwinza yakela antu ejima adi mumajamu achanukishu akatiya izu [daYesu]; akedikamu.’
Chimwekeshu 21:3, 4. ‘Nzambi yomweni wakekala nawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.’
Ñakwilu yaBayibolu Chiyaleñelaña Kubula Kwakama
Neyi ayileja yuma yinashimunuwu hewulu himukushikena kwitejaku. Ilaña iyi yikaninu ayikana kudi Nzambi, bayi antuku. Nawa Yehova Nzambi ‘hanatweshi kutwambaku.’—Titusa 1:2.
Neyi mukukuhwelela muyikaninu yaNzambi nikulondela nshimbi yindi, himukwakamaña hela chakwila mudi mukukala kwaswejaku. Njita, wuzweñi, yikatu, nimakabi enzeña muloña wawushinakaji hela kwiluka nenu keña mufwi—yumiyi hiyikuyileñela kusweja kwakamaku. Muloñadi? Muloña hampinji yimukumonaña kukala kwamuchidiwu mukukuhwelela chikupu nenu Wanta waNzambi wakafumishahu yuma yejima yaletaña makabi.
Hanu dinu munateli kwikala ñahi nachikuhwelelu chakola chakumbidi? Mwatela ‘kubalumuna yitoñojoka yenu’ nikushinshika “mwaya muchima waNzambi diwu wawuwahi watiyishaña kuwaha, walala chikupu.” (Aroma 12:2) Hadaha mukukeñelahu wunsahu wukwawu wunakumwekesha nawu yikaninu yamuBayibolu yalala. Kusandujola kwamuchidiwu kwakeñekaña kushaku ñovu nankashi. Yuma yantesha yimukwila muchihandilu yikuyileñela kubula kwakamena.
[Nyevulu yidi hefu 7, 8]
Indi Izu daNzambi dahoshaña nawudi hayuma yikamwekana kumbidi?