Eng Nge Kan Hmabâk Tûr Chu?
Eng Nge Kan Hmabâk Tûr Chu?
ENGVANGIN NGE A CHHANNA HMUH CHU THIL PAWIMAWH TAK A NIH? Mite nakin hun thlîr dân chuan vawiina an thiltih chu a nghawng ṭhîn. Entîr nân, hmabâk beiseina chau tak neite chuan: “I eiin i in ang u hmiang, naktûkah kan thi dâwn alâwm,” tih rilru put hmang chu an chhawm thei a ni. (1 Korinth 15:32) Chutiang rilru put hmang chuan ei puar lutuknate, zu ruihnate, lungkhamnate a thlen fo va, rilrua thlamuanna dik tak a thlen lo.
Kan hmabâk chu mihring kutah innghat ṭhak se la chuan, a thim ngawt ang. He leia boruak te, tui te, leh a leilungte chu nasa taka tihbawlhhlawh a ni. Nuclear indona leh fîrfiaka chêtna te hi thleng thei reng a ni a. Natna leh retheihna chuan khawvêla mi tlûklehdingâwn telte chu a nghawng a ni. Mahse, beiseina neih chhan tûr a awm.
Mihringte chuan nakin hun tûr chu dik taka an sawi lâwk theih loh laiin, Pathian Jehova chuan: “Keiin a tâwp tûr chu atîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn,” tiin a nihna a sawi a ni. (Isaia 46:10) Kan hmabâk hun tûr chungchângah Jehova’n eng nge a sawi?
Bible Sawi Dân
Jehova chuan leilung emaw, a chhûnga nunna awm emaw chu siam ṭhat theih loh khawpa tihchhiat a phal lo vang. Bible chuan Pathianin ‘lei tichhetute chu a tichhe ve thung’ dâwn tih a tiam a ni. (Thu Puan 11:18) Jehova chuan a Lalram, a nih loh leh vân lam sawrkârna hmangin leia suahsualna chu a rawn thianfai ang a, atîra a thiltum ang dinhmun chu a rawn thlentîr ang. (Genesis 1:26-31; 2:8, 9; Matthaia 6:9, 10) A hnuaia Bible chângte hian leia mi tinte khawih pha tûr thilthleng târ langin, kan hmabâk tûr thlîr lâwkna min pe a ni.
Sâm 46:8, 9. “Hawh u, LALPA thiltihte hi en rawh u, leilunga thil a tihchhiatziate hi. Ani chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawlailîrte chu meiah a rawh ral ṭhîn.”
Isaia 35:5, 6. “Chumi hnuah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngtheilote lei chu hlim takin a zai ang: thlalêrah chuan tuite a lo chik chhuak luah luah dâwn si a, ram rovah chuan luite tui a lo chik chhuak luah luah bawk ang.”
Isaia 65:21, 22. “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang.”
Daniela 2:44. “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.”
Johana 5:28, 29. “A hun a thleng dâwn ta, chutih hunah chuan thlâna awm zawng zawngin [Isua] aw an hria anga, an chhuak vek ang.”
Thu Puan 21:3, 4. “Pathian ngei chu an hnênah a awm ang . . . an mit ata mittui zawng zawng a hrufai ang a; thihna a awm leh tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”
Bible Chhânnate’n Rilrua Thlamuanna Dik Tak Min Neihtîr Dân
Atîrah chuan, a chunga târ lan dinhmunte khi rin phâk bâka ṭha niin a lang mai thei. Mahse, hêngte hi mihring ni lovin, Pathian thutiam a ni a. Tin, Pathian Jehova chu “dâwt sawi thei lova” a ni.—Tita 1:1, 2.
Pathian thutiamte rin dân i zir a, a dânte mila i nun bawk chuan, dinhmun harsa ber kârah pawh rilrua thlamuanna i nei ang. Indona te, retheihna te, natna te, leh tar emaw, thi mai tûr emaw anga inhriat avânga rilru buai i nih pawhin—hêngte zînga a engamah hian i thlamuanna neih chu a chhuhsak hlen thei lo vang che. Engvângin nge? Pathian Ramin hêng zawng zawngte hi a sût lêt vêk dâwn tih i rin thlap dâwn avângin.
Engtin nge chutiang hmabâk beiseina chu i neih theih ang? “Rilru a thara awmin” leh “Pathian duhzâwng, a ṭha leh lawm tlâk leh, ṭhat famkim” chu i hriatfiah a ngai a ni. (Rom 12:2) Bible thutiamte a rin tlâkzia finfiahna dang pawh i mamawh a rinawm a. Chutiang finfiahnate hmu tûra thawhrim chu a manhla a ni; i nuna i thiltih dangte zîngah rilrua thlamuanna nasa zâwk pe thei tûr che a awm si lo va. (w08 2/1)
[Phêk 8, 9-naa milemte]
Bible-in kan hmabâk chungchângah eng nge a sawi?
Isaia 35:5
Isaia 35:6