Ninsaal beoog na n yɩɩ wãna?
Ninsaal beoog na n yɩɩ wãna?
BÕE YĨNG TƖ SOK-KÃNGÃ LEOOR BÃNGR TAR YÕODO? Ned sẽn tẽed tɩ beoog-daar na n yɩ to-to wã tõe n kɩtame t’a tall manesem sẽn yaa sõma bɩ wẽnga. Wala makre, neb nins sẽn tẽed tɩ beoog pa na n sãoog rũndã wã tõe n yeela b mens woto: “Bɩ d rɩ la d yũ, tɩ bõe, beoogo tõnd na n kiime.” (1 Korẽnt dãmba 15:32) La tags-kãngã buud pa kɩtd tɩ neb yam sɩd gãand bãan ye. Nong n kɩtdame t’a lebg yão-be-ned la ra-yũuda, la kõt-a yɩɩre.
Vẽenega, sã n yaa ninsaal n segd n yãk a beoog-daarã sẽn na n yɩ to-to, dẽnd tõnd pa tar saagr ye. Nebã rẽgemda pemsmã, koomã la tẽngã n yɩɩd pĩndã. Wakat fãa, d yɛɛsdame tɩ zabr da wa yik tɩ b lob bõmb nikleɛɛre, bɩ tɩ bi-bees nins b sẽn boond tɩ teerorist rãmbã ra wa yik n wa ne sabab ye. Dũniyã gill zugu, bãasã la talemdã namsda neb milyaar dãmba. La baasg zãnga, d tara bʋʋm n na n tẽ tɩ yolsg n wate.
Ninsaalbã pa tõe n togs bũmb ning sẽn wat beoogã tɩ kell n yɩ kɛpɩ ye. La Wẽnnaam a Zeova yeelame tɩ “hal sɩngr wakate, [yẽ] wilga bũmb nins sẽn maan n loogã, la [tɩ yẽ] da reng n wilga bũmb nins sẽn nan ka maanã me.” (Ezai 46:10) A Zeova yeelame tɩ ninsaalbã beoog na n yɩɩ wãn to?
Biiblã sẽn yet bũmb ninga
A Zeova pa na n bas tɩ b sãam tẽngã tɩ ned pa le tõe n vɩɩmd a zug ye. Biiblã yetame tɩ Wẽnnaam “na n sãama neb nins sẽn sãamd dũniyã.” (Wilgri 11:18) A Zeova na n kɩtame t’a Rĩungã bɩ a goosneemã sẽn be saasẽ wã menems nin-wẽnsã la a kɩt tɩ tẽngã lebg wa a sẽn da rat tɩ yɩ to-to hal sɩngrẽ wã. (Sɩngre 1:26-31; 2:8, 9; Matɩe 6:9, 10) Biiblã verse nins sẽn pʋgdã wilgda ninsaal beoogã sẽn na n yɩ to-to, la b wilgd yɛl kẽer sẽn na n maan ka la bilf tẽngã zugu. Yel-kãens na n nafa kẽer la sãam sãnda.
Daniɛll 2:44. “Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”
Yɩɩl Sõamyã 46:9, 10. “Wa-y n ges-y Zusoaba tʋʋma, yaa bãmb n wat ne sãoong dũniyã pʋgẽ. Bãmb kɩtdame tɩ zabr sɛ hal dũniyã tɛk fãa. Bãmb kaooda tãbdo, la b kʋʋsda kãna, la b yõogda saar dãmb bugum.”
Ezai 35:5, 6. “Dẽ, zoens nin na n pukame la wʋms tʋb na n yoosame. Dẽ, wobs na n yikame n tĩims wa yãgse la mugs zɛlma na n laka ne sũ-noog yɩɩla. Tɩ bõe, koom na n bulame n yi weoogẽ la kʋɩls koom na n zoee rasempʋɩɩgẽ.”
Ezai 65:21, 22. “B na n mee zags n zĩnd b pʋsẽ. Bãmb na n sela tɩɩs n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye.”
Zã 5:28. “Wakat watame tɩ [neb nins] fãa sẽn be yaad pʋsẽ na n wʋm [a Zezi] koɛɛg n yi.”
Wilgri 21:3, 4. “Wẽnnaam . . . menga na n paa ne bãmba. Bãmb na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr walla toog kõn le zĩnd yɛs ye, tɩ bõe, dẽenem bũmb fãa loogame.”
Biiblã sẽn kõt leoor ninsã sẽn tõe n kɩt tɩ d yamã gãand bãan to-to
Neb kẽer sã n wʋm verse kãensã sẽn yet bũmb ningã, b tõe n zoe n kʋmb n yeelame tɩ yaa bũmb sẽn pa tõe. La yaa d bãng tɩ pa ninsaalb goam ye. Yaa Wẽnnaam a Zeova meng n kãab bõn-kãensã, la Wẽnnaam “ka tõe n yag ziri” ye.—Tɩt 1:2.
Yãmb sã n tẽed Wẽnnaam kãabsã la y tũud a noyã, baa yel-kãseng sã n wa tar-y me, y yamã na n kell n gãanda bãane. Zabã, naongã, bãasã la kʋʋlmã pa na n kɩt tɩ d yamã kell n pa le gãe bãan ye. Baa d sã n miẽ tɩ d kũum kolgame menga, d yamã na n gãee bãane. Bõe yĩnga? Bala baa yel-kãensã sã n paam yãmba, y na n kɩsa sɩd tɩ Wẽnnaam Rĩungã na n wa manega rẽ fãa.
La bõe n tõe n kɩt tɩ d kɩs sɩd tɩ tõnd beoogã na n yɩɩ sõma woto? Y segd n ‘teka y yamã’ la y bao n “bãng Wẽnnaam daab sẽn yaa sõma, la sẽn tat bãmb yam, la sẽn zems zãnga.” (Rom dãmba 12:2) La tõe tɩ y rata kaset a taab sẽn wilgd tɩ kãabs nins sẽn be Biiblã pʋgẽ wã na n sɩd pidsame. Yaa sõma tɩ y modg n bao n bãng bõn-kãensã. Bũmb kae y sẽn tõe n maan n paam tɩ y yamã gãand bãan n yɩɩd rẽ ye.
[Foto rãmba, seb-neng a 8, 9]
Bõe la Biiblã yet beoog-daarã wɛɛngẽ?