Bokamoso bo Hupere Eng?
Bokamoso bo Hupere Eng?
KE KA BAKA LA’NG KARABO E LE BOHLOKWA? Ditebelelo tša motho ka bokamoso di kgoma tsela yeo a itshwarago ka yona gona bjale. Ka mohlala, batho ba bantši bao ba se nago kholofelo ka bokamoso ba ka ba le kgopolo ya gore: “A re jeng gomme re nweng, gobane gosasa re tla hwa.” (1 Bakorinthe 15:32) Kgopolo e bjalo e ka dira gore batho e be dijato, ba nwe kudu le go ba le kgateletšego—e sego go ba nea khutšo ya kgonthe ya monagano.
Ke therešo gore ge e ba bokamoso bo be bo laolwa ke batho ka mo go feletšego, ditebelelo tša rena e be e ka se be tše di kgahlišago. Mo lefaseng, moya, meetse le naga di šilafatšwa ka tekanyo e sa kago ya bonwa. Kgonagalo ya gore go ka ba le ntwa ya nuclear le tlhaselo ya botšhošetši e a oketšega. Batho ba dimilione tše dikete lefaseng ka bophara ba tlaišwa ke malwetši le bodiidi. Lega go le bjalo, go na le mabaka a kwagalago a go ba le kholofelo.
Mola batho ba sa kgone go bolela bokamoso e sa le pele ka mo go nepagetšego, Jehofa Modimo o itlhalosa e le yo a ‘kwatšago tša mafelelo e sa le mathomong a tšona le yoo go tloga bogologolong a kwatšago tše di sešogo tša tšwelela.’ (Jesaya 46:10, bapiša le PK.) Jehofa o re’ng ka seo bokamoso bo se huperego?
Seo Beibele e se Bolelago
Jehofa a ka se dumelele gore lefase goba bophelo bjo bo lego go lona bo senyetšwe sa ruri. Ge e le gabotse Beibele e holofetša gore Modimo o tla “senya bao ba senyago lefase.” (Kutollo 11:18) A diriša Mmušo wa gagwe goba pušo ya legodimong, Jehofa o tla hlwekiša lefase le le kgopo gomme a tliše maemo ao a bego a a rerile go tloga mathomong. (Genesi 1:26-31; 2:8, 9; Mateo 6:9, 10) Ditemana tše di latelago tša Beibele di re bontšha e sa le pele seo bokamoso bo se huperego, ka go hlalosa ditiragalo tšeo kgaufsinyane di tlago go kgoma motho yo mongwe le yo mongwe mo lefaseng.
Psalme 46:8, 9. “Tlang, Le bônê! Šé medirô ya Morêna, Mo-hlôla-thšoxô-faseng, Mo-fediša-dintwa xo fihla mafelong a lefase, Mo-rôbaka-mará, Mo-thokxa-marumô, Mo-thšuma-dikôtsê-ka-mollô!”
Jesaya 35:5, 6. “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma, xobane lešokeng xo thulêxa ’diba tša meetse, mo lehanateng xo tlo êla dinokana.”
Jesaya 65:21, 22. “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.”
Daniele 2:44. “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”
Johane 5:28, 29. “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Jesu] gomme ba tšwa.”
Kutollo 21:3, 4. “Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”
Kamoo Karabo ya Beibele e re Neago Khutšo ya Kgonthe ya Monagano
Mathomong maemo ao a hlalositšwego ka mo godimo a ka kwagala eka a ka se kgonagale. Eupša ke Modimo a dirago dikholofetšo tše, e sego batho. Le gona, Jehofa Modimo ‘a ka se ke a aketša.’—Tito 1:2.
Ge e ba o ithuta go bota dikholofetšo tša Modimo le go phela ka melao ya gagwe, o tla dula o e-na le khutšo ya monagano go sa šetšwe maemo a thata kudu. Ntwa, bodiidi, bolwetši gaešita le mathata ao a tlišwago ke botšofadi goba go lebeletšana le lehu—ga go le se tee sa dilo tše seo se ka go amogago khutšo ka mo go sa felego. Ka baka la’ng? Ka gobane o tla ba o kgodišegile gore Mmušo wa Modimo o tla fediša ditla-morago tša tlaišego ye ka moka.
O ka hwetša bjang kholofelo e bjalo ya bokamoso? O swanetše go ‘fetola monagano wa gago’ gomme o itlhatselele “thato e botse le e amogelegago le e phethegilego ya Modimo.” (Baroma 12:2) Ga go pelaelo gore o tla nyaka bohlatse bjo bo oketšegilego bja gore dikholofetšo tša Beibele di a botega. Go nyakišiša mo go bjalo go tla go hola. Ga se dilo ka moka tšeo o di dirago bophelong tšeo di ka go neago khutšo e ntši bjalo ya monagano.
[Diswantšho go letlakala 8, 9]
Lentšu la Modimo le re’ng ka bokamoso?