¿Imaynan kawsay kanqa hamuq tiempopi?
¿Imaynan kawsay kanqa hamuq tiempopi?
¿IMARAYKU YACHANANCHIS HAMUQ TIEMPOPI IMAYNA KAWSAY KANANMANTA? Runakunaqa hamuq tiempomanta yuyaykusqankuman hinan kawsanku. Yachanapaq, hamuq tiempopi imayna kawsay kananmanta mana yachaq runakunaqa khaynata ninku: “Mikhusunchis, ukyasunchis, paqarinmi wañupusunchis”, nispa (1 Corintios 15:32). Chhayna yuyaykuymi runakunata sinchi mikhuyman, ukyayman apan, llakisqallataq kanku, nitaq thakpichu kawsanku.
Sichus runakunallamanta kanman hamuq tiempopi imayna kawsananchis chayqa, mana ima suyakuyniyoqmi kasunman. Runakunaqa sinchita qhellichashanku wayrata, unuta, hallp’atapas. Hatun maqanakuykunapas qonqayllamantan qallarinman, terroristakunapas astawanmi rikhurimushan. Runakunapas teqsimuyuntinpin onqoywan wakcha kaywan ñak’arishanku. Chhaynaña kaqtinpas, sumaq kawsaytan suyakusunman.
Runakunaqa manan yachasunmanchu hamuq tiempopi imayna kawsay kananta, Jehová Diosmi ichaqa nin: “Qallariymantapachan willani qhepaman imaynachus tukukunanta, qhepaman imachus kanantan ñawpaqmantaña willani”, nispa (Isaías 46:10). Chhaynaqa, ¿ima ninmi Jehová Dios hamuq tiempopi imayna kawsay kananmanta?
¿Ima ninmi Biblia?
Jehová Diosqa manan hinallatachu qhawanqa kay Hallp’a qhellichasqa, q’aruchasqa kananta chaypi kaqkunata ch’usaqyachinankutapas. Bibliaq nisqan hina, Diosmi ‘kay pacha waqllichiqkunata [otaq q’aruchaqkunata] wañuchinqa’ (Apocalipsis 11:18). Jehová Diosqa Reinonwanmi kay Hallp’api millay kawsayta tukuchinqa, chhaynapin sumaq kawsayta qallarichinqa qallariypi munasqanman hina (Génesis 1:26-31; 2:8, 9; Mateo 6:9, 10). Qatimuq textokunapi yachasun imayna kawsay kanqa hamuq tiempopi llapa runakunapaq chayta.
Salmo 46:8, 9: “Hamuychis, Señor Diospa ruwasqankunata rikuychis, kay pachapi musphana ruwasqankunata qhawaychis. Paymi teqsimuyuntinpi awqa-tinkuykunata [otaq guerrakunata] qolluchin, wach’ina p’eqtakunatapas lanzakunatapas p’akirqarin, carretakunatapas ruphaykachin”.
Isaías 35:5, 6: “Hinan ñawsakunapas qhawarinqa, roqt’ukunapas uyarinqa. Wist’ukunapas taruka hinaraq p’itanqa, upakunapas kusikuymanta takinqa. Ch’inneqpi pukyukuna paqarinqa, ch’aki pampapin askha unu puririnqa”.
Isaías 65:21, 22: “Wasitan wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku. Manan wakpa tiyananpaqchu wasichanqaku, manan wakpa mikhunanpaqchu mallkinqaku”.
Daniel 2:44: “Hanaq Pacha Diosqa mana hayk’aq thunikuq suyuta [otaq reinota] sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”.
Juan 5:28, 29: ‘Aya p’ampanakunapi lliw kaqkuna Runaq Churinpa kunkanta uyarinanku tiempo chayamuqtinmi [...] kawsarimpunqaku’.
Apocalipsis 21:3, 4: ‘Diosmi paykunawan kashanqa [...]. Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku’.
¿Imaraykun Bibliaq kutichisqan thak kawsayta qowasunman?
Yaqapaschá chay promesakunamanta niwaq, sinchi sumaqmi cheqaq kananpaqqa, nispa. Ichaqa Diosmi prometen, manan runachu. Jehová Diosqa ‘mana llullakuqmi’ (Tito 1:2).
Sichus Diospa promesankunapi hap’ipakunki kamachikuyninkunatataq kasukunki chayqa, thakpin kawsanki imayna sasachakuykunapiña tarikuqtiykipas. Manan guerrapas, wakcha kaypas, onqoypas, machu payayaypas, wañuypas thak kayniykitaqa pisiyachinmanchu. ¿Imarayku? Chay sasachakuykuna Diospa Reinonpi tukukapunanta yachasqaykirayku.
¿Imatan ruwawaq chhayna suyakuyniyoq kanaykipaq? ‘Mosoqyachinayki yuyayniykita’ hinaspapas, ‘mayqenchus Diospa munaynin kasqanta reparanayki, paypa munayninqa allinmi, sumaqmi, hunt’asqapuni’ (Romanos 12:2). Yaqapaschá astawan yachayta munanki Bibliapi Diospa promesankuna cheqaq kasqanmanta, chaykunamanta astawan yachasqaykiqa allinmi kanqa. Manan imapas Diospa promesankunamanta yachasqayki hinaqa thak kayta qosunkimanchu.
[3, 4, paginakunapi dibujokuna]
¿Ima ninmi Diospa Simin Qelqa hamuq tiempomanta?