O le ā lo Tatou Lumana‘i?
O le ā lo Tatou Lumanaʻi?
AISEĀ E TĀUA AI LE TALI? E ono aafia le auala e ola ai se tagata i le taimi nei, ona o mea e manatu o ia e tutupu i le lumanaʻi. Mo se faataʻitaʻiga, e ono iai iā i latou ia e leai se faamoemoe i le lumanaʻi le uiga faapea: ‘Seʻi o tatou aai ma inu auā o taeao tatou te feoti ai.’ (1 Korinito 15:32) E mafai e lenā uiga ona iʻu ai i le ʻai tele, inu tele, ma le popole, ae e lē maua ai se toʻafilemu o le mafaufau.
Ioe, pe ana fai e faalagolago lo tatou lumanaʻi i taumafaiga a tagata, o le a lē taulau ai o tatou faamoemoega i le lumanaʻi. Ua matuā faaleagaina e tagata le ʻea, le vai ma le eleele. Ua faateleina foʻi le faamataʻuina ona o pomu mataʻutia, ma osofaʻiga a tagata faatupu faalavelave. Ua aafia le faitau piliona o tagata i faamaʻi ma le lē lava o meaʻai e aai ai. Ae peitaʻi, o loo iai ni māfuaaga mautū o le iai o se faamoemoe i le olaga.
Ioe, e lē mafai e tagata ona valoia mai ma le saʻo le mea o le a tupu i le lumanaʻi, ae na fetalai Ieova le Atua, o ia o lē “o loo faaali talu mai le amataga o mea e mulimuli; mai anamua foʻi o mea ua lē faia.” (Isaia 46:10) O le ā o loo fetalai mai ai Ieova e faatatau i le mea o le a tupu i le lumanaʻi.
Le Manatu o le Tusi Paia
O le a lē faatagaina e Ieova le lalolagi e faaleagaina. Ae o loo taʻua i le Tusi Paia o le a ‘faafanoina i latou o loo faaleagaina le laueleele,’ e le Atua. (Faaaliga 11:18) E ala i lona Malo i le lagi, o le a aveesea ai e Ieova le lalolagi o tagata amioleaga ma oo ai le lalolagi i se tulaga na ia finagalo muamua i ai. (Kenese 1:26-31; 2:8, 9; Mataio 6:9, 10) O le a faailoa mai e mau o le Tusi Paia o loo i lalo, le mea o le tupu i le lumanaʻi lea o le a toeitiiti maua e tagata uma i le lalolagi.
Salamo 46:8, 9. “Inā ō mai ia, inā vaavaai i galuega a Ieova, o lē ua faia faatafunaga i le lalolagi. Ua faaiʻua e ia o taua e oo lava i tuluʻiga o le lalolagi; ua gagau e ia le aufana, ma vavae le tao; ua susunuina foʻi e ia kariota i le afi.”
Isaia 35:5, 6. “Ona faapupulaina ai lea mata o ē tauaso, e faalogoa foʻi taliga o ē tutuli; ona osooso ai lea o le pipili e pei o le ʻaila, e pese foʻi le laulaufaiva o le gūgū; auā e oso mai le vai i le vao lafulafuā, ma vaitafe i le toafa.”
Isaia 65:21, 22. “Latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi.”
Tanielu 2:44. ‘E faatūina e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.’
Ioane 5:28, 29. “Auā e oo mai le itula e faalogo ai i latou uma o loo i tuugamau i lona [Iesu] leo, ma latou ō mai ai.”
Faaaliga 21:3, 4. “E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”
Le Auala e Aumaia ai e le Manatu o le Tusi Paia le Toʻafilemu
I le taimi muamua, atonu na faigatā ona tatou talitonu i tulaga o loo taʻua i luga. Ae o na folafolaga na faia e le Atua, e lē o tagata, ma e lē mafai ona “tala pepelo” Ieova le Atua.—Tito 1:2.
O lou taumafai e faatuatua i folafolaga a le Atua ma ola e ōgatusa ma ana faatonuga, o le a e maua le toʻafilemu e tusa lava po o le ā le faigatā o tulaga o mea. O le a lē mafai e taua, le mativa, o faamaʻi, faapea ma le olaga matua ma le oti, ona aveesea atoatoa le filemu o lou mafaufau. Aiseā? Auā ua e iloa ma mautinoa, o le a faaleleia e le Malo o le Atua le tulaga o na mala leaga.
E faapefea ona e maua lenā faamoemoe mautinoa i le lumanaʻi? E ao ona e taumafai e ‘suia lou mafaufau,’ ma vaai oe lava po le ā le “finagalo o le Atua, lea e lelei, e mālie, ma le lelei atoatoa.” (Roma 12:2) E manaʻomia ona e suʻesuʻe atili i faamaoniga o le moni o folafolaga a le Atua. E matuā tāua na suʻesuʻega loloto. E faaleai nisi mea i le olaga e mafai ona e maua mai ai se toʻafilemu e sili atu nai lo le faia faapenā.
[Ata i le itulau 8, 9]
O le ā le manatu o le Tusi Paia e uiga i le lumanaʻi?