San wi kan fruwakti na ini a ten di e kon?
San wi kan fruwakti na ini a ten di e kon?
FU SAN EDE A DE PRENSPARI FU KON SABI A PIKI TAPU NA AKSI DISI? A fasi fa wan sma e denki fu a ten di e kon, abi krakti tapu den sani di a e du now. Fu eksempre, sma di no abi wan bun howpu gi a tamara, kan kisi a denki disi: „Meki wi nyan èn meki wi dringi, bika tamara wi o dede” (1 Korentesma 15:32). Nofo tron so wan denki e meki taki sma e nyan èn e dringi pasa marki, èn den e kisi broko-ede, ma den sani disi no e meki den abi wan korostu firi.
A tru taki, efu na libisma ben musu taki fa sani musu waka na ini a ten di e kon, dan wi no ben o abi howpu. Noiti ete bifo, a loktu, a watra nanga a gron fu grontapu doti so leki now. Now a kan pasa moro makriki taki wan feti broko pe sma e gebroiki kefalek bom, èn taki sma e du ogri-ati sani fu gens tirimakti. Na heri grontapu milyardmilyard sma e kon siki èn den e pina fu di den pôti. Ma bun reide de fu abi howpu.
Aladi libisma no man taki soifri san o pasa na ini a ten di e kon, toku Yehovah Gado e taki dati en na „a Sma di e fruteri na a bigin san sa de a kaba, èn di e fruteri langa ten na fesi kaba san na den sani di no du” (Yesaya 46:10). San Yehovah e taki dati wi kan fruwakti na ini a ten di e kon?
San Bijbel e taki?
Yehovah no sa gi pasi taki libisma pori grontapu, noso den libisani na tapu so te, taki den sani dati no man meki kon bun baka. Fu taki en leti, Bijbel e pramisi taki Gado sa „tyari wan pori kon na tapu den wan di e pori grontapu” (Openbaring 11:18). Nanga yepi fu en Kownukondre, noso a tirimakti fu en na hemel, Yehovah sa puru ogridu na grontapu, èn a sa meki grontapu tron soleki fa a ben abi na prakseri na a bigin (Genesis 1:26-31; 2:8, 9; Mateyus 6:9, 10). Den bijbeltekst di e kon now e yepi wi fu kon frustan fa sani o de na ini a ten di e kon, fu di den e taki fa den sani di o pasa na grontapu o abi krakti tapu ibri sma.
Psalm 46:8, 9. „Unu pipel, kon luku den sani di Yehovah e du, fa a du wondru sani na grontapu. A e meki feti kon na wan kaba te na a moro farawe presi fu grontapu. A e broko a bo èn a e koti a lansri trutru na pisipisi; A e bron den wagi na ini faya.”
Yesaya 35:5, 6. „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede. Bika na ini a gran sabana watra sa kuku kon na tapu, èn bigi kriki na ini a drei opo presi.”
Yesaya 65:21, 22. „Den sa bow oso trutru èn libi na ini, èn den sa prani droifidyari trutru èn nyan fu den froktu fu den. Den no sa bow meki wan tra sma go libi na ini; den no sa prani meki wan tra sma nyan fu en.”
Danièl 2:44. „A Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn a sa tyari wan kaba kon na den, èn ensrefi sa tan te ten di no skotu.”
Yohanes 5:28, 29. „A yuru o kon te ala den sma di de na ini den grebi o yere [Yesus] sten, èn den o komopo drape.”
Openbaring 21:3, 4. „Gado srefi o de nanga den. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”
Den sani di Bijbel e taki e gi wi wan trutru korostu firi
Te yu leisi den tekst disi fu a fosi leisi, dan kande yu no man bribi den sani di yu leisi. A no libisma pramisi den sani disi, ma na Gado. Èn Yehovah Gado „no man lei”.—Titus 1:2.
Te yu e leri fu poti frutrow na ini den pramisi fu Gado èn te yu e libi soleki fa den wet fu en e taki, dan yu sa tan abi wan korostu firi, srefi na ini den moro muilek situwâsi. Orloku, pôtifasi, siki, srefi den problema fu owrudei noso a denki taki yu o dede, no o man meki taki yu no o abi wan korostu firi moro. Fu san ede? Fu di yu o abi na overtoigi taki Gado Kownukondre sa tyari wan kaba kon na den problema disi.
Fa yu kan abi wan tranga howpu gi a ten di e kon? Yu musu ’kenki fu di yu e teki wan nyun fasi fu denki’ èn yu musu „kon sabi san na Gado en wani di bun, di e plisi en èn di de volmaakti” (Romesma 12:2). A no de fu taki dati yu abi moro buweisi fanowdu di e sori taki den pramisi fu Bijbel tru. Yu sa kisi wini te yu o du muiti fu ondrosuku den sani disi. Furu sani no de na ini a libi di kan meki yu abi wan trutru korostu firi, leki te yu e du disi.
[Prenki na tapu bladzijde 8, 9]
San Gado Wortu e taki fu a ten di e kon?