Ko e Hā ʻOku Tuku Tauhi Mai ʻi he Kahaʻú?
Ko e Hā ʻOku Tuku Tauhi Mai ʻi he Kahaʻú?
KO E HĀ ʻOKU MAHUʻINGA AI ʻA E TALÍ? Ko e ngaahi ʻamanaki ʻa ha taha ki he ʻapongipongí ʻoku ʻi ai ʻene kaunga ki heʻene tōʻonga he ʻaho ní. Ko e fakatātaá, ko e faʻahinga ʻoku siʻi ʻenau ʻamanaki ki he kahaʻú ʻoku nau ohi nai ʻa e fakakaukau: “ʻE, tau kai mo inu e, He ʻoku apongipongi ʻetau mate.” (1 Kolinito 15:32) Ko ha fakakaukau pehē ʻoku faʻa iku ia ki he kai lahi, inu ʻo fuʻu hulu mo e loto-moʻua—ʻo ʻikai ki he nonga moʻoni.
Ko ia ai, kapau naʻe fakatuʻunga ʻataʻatā pē ʻa e kahaʻú ki he ngaahi lavameʻa ʻa e tangatá, ʻe siva ʻa ʻetau ngaahi ʻamanakí. Ko e ʻeá, vaí mo e fonua ʻi he foʻi māmaní ʻoku ʻuliʻi ia ʻi he tuʻunga lahi taʻehanotatau. Ko e fakamanamana ʻo e tau fakaniukiliá mo e ngaahi ʻohofi fakaetautoitoí ʻoku fakautuutu. ʻOku uesia ʻe he mahakí mo e masivá ʻa e laui piliona ʻi māmani lahi. Neongo ia, ʻoku ʻi ai ʻa e ngaahi ʻuhinga lelei ki ha ʻamanaki.
Lolotonga ʻoku ʻikai lava ke tomuʻa tala totonu ʻe he faʻahinga ʻo e tangatá ʻa e kahaʻú, ʻoku fakamatalaʻi ia tonu ʻe Sihova ko e ʻOtuá, ko e Tokotaha ʻokú ne “fakaha ae ikuaga mei he kamataaga, bea mei he gaahi kuoga i mua ae gaahi mea oku heeki ke fai.” (Aisea 46:10, PM) Ko e hā ʻoku folofolaʻaki ʻe Sihova fekauʻaki mo e meʻa ʻoku tuku tauhi mai ʻi he kahaʻú?
Meʻa ʻOku Leaʻaki ʻe he Tohi Tapú
Heʻikai fakaʻatā ʻe Sihova ʻa e foʻi māmaní pe ko e moʻui ʻi aí ke maumauʻi ʻo ʻikai fakaleleiʻi. Ko hono moʻoní, ʻoku talaʻofa mai ʻa e Tohi Tapú ʻe hanga ʻe he ʻOtuá ʻo “fakaʻauha ʻakinautolu ʻOku fakaʻauha ʻa e fonua.” (Fakahā 11:18) Fakafou ʻi hono Puleʻangá, pe founga-pule fakahēvaní, ʻe fakamaʻa ʻe Sihova ʻa e fulikivanu ʻi he māmaní pea fakahoko mai ʻa e ngaahi tuʻunga naʻá ne muʻaki taumuʻa ki aí. (Senesi 1:26-31; 2:8, 9; Mātiu 6:9, 10) Ko e ngaahi veesi Tohi Tapu hokó ʻoku tomuʻa fakaʻali mai ai ʻa e kahaʻú, ʻi hono fakamatalaʻi ʻa e ngaahi meʻa kuo vavé ni ke ne ueʻi ʻa e faʻahinga kotoa pē ʻi he māmaní.
Sāme 46:8, 9. “Haʻu ʻo mamata ki he ngaahi ngaue ʻa Sihova, Hono kuo ne fai meʻa fakailifia ʻi he fonua! ʻOku ne lolololo ʻa e ngaahi tau ʻo aʻu ki he ngataʻanga ʻo mamani, ʻoku ne fesiʻi kaufana, mo tutuʻu tao, mo tutu saliote ʻi he afi.”
Aisea 35:5, 6. “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa: he pa mai ʻa e ngaahi vai ʻi he lala, mo e ngaahi vaitafe ʻi Alapa.”
Aisea 65:21, 22. “Te nau langa fale, ʻo nofo ai; pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe; ʻe ʻikai te nau to, kae kai ʻe ha taha.”
Taniela 2:44. “Ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.”
Sione 5:28, 29. “ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”
Fakahā 21:3, 4. “ʻE nofo ʻe he ʻEne ʻAfio, Ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; Pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; Kuo mole ʻa e ngaahi meʻa muʻa.”
Founga Hono ʻOmai ʻe he Tali ʻa e Tohi Tapú ʻa e Nonga Moʻoní
ʻUluakí, ko e ngaahi tuʻunga naʻe fakamatalaʻi ʻi ʻolungá ʻoku faingataʻa ke fai ha tui ki ai. Ka ko e ngaahi talaʻofá ni ko e fai ia ʻe he ʻOtuá, ʻo ʻikai ʻe he tangatá. Pea ko Sihova ko e ʻOtuá ʻoku “taʻe faʻa loi.”—Taitusi 1:2.
Kapau ʻokú ke ako ke falala ki he ngaahi talaʻofa ʻa e ʻOtuá pea moʻui ʻo fakatatau ki heʻene ngaahi laó, te ke tauhi maʻu ai ʻa hoʻo nongá neongo ʻa e ngaahi tuʻunga faingataʻa tahá. Ko e taú, masivá, mahamahakí, pea naʻa mo e ngaahi ʻahiʻahi ʻo e taʻumotuʻá pe ko e ʻamanaki atu ki he maté—heʻikai ha taha ʻo e ngaahi meʻá ni te ne kaihaʻasi tuʻuloa ʻa hoʻo nongá. Ko e hā hono ʻuhingá? Koeʻuhi ʻokú ke falala pau ko e Puleʻanga ʻo e ʻOtuá te ne toʻo ʻa e ngaahi nunuʻa ʻo e ngaahi kovi kotoa ko ení.
ʻE lava fēfē ke ke maʻu ʻa e faʻahinga ʻamanaki ko ia ki he kahaʻú? Kuo pau ke ke fakafoʻou ‘ho ʻatamaí’ pea fakamoʻoniʻi ʻiate koe “ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Loma 12:2) Ngalingali te ke fiemaʻu ʻa e fakamoʻoni lahi ange ko e ngaahi talaʻofa ʻa e Tohi Tapú ʻoku alafalalaʻanga. Ko ha sivisiviʻi pehē ʻoku tuha ia mo e feinga. Ko e ngaahi meʻa siʻi pē ʻokú ke fai ʻi he moʻuí te ne ʻoatu kiate koe ʻa e nonga lahi angé.
[Fakatātā ʻi he peesi 8, 9]
Ko e hā e lau ʻa e Folofola ʻa e ʻOtuá fekauʻaki mo e kahaʻú?