Eaha ta to a muri aˈe e hopoi mai?
Eaha ta to a muri aˈe e hopoi mai?
NO TE AHA MEA FAUFAA ˈI TE PAHONORAA? E ohipa te mau tiairaa no ananahi a te hoê taata i nia i ta ˈna haaraa i teie mahana. Ei hiˈoraa, e na ô paha te feia e mea iti to ratou tiaturiraa i to a muri aˈe e: “E amu tatou e e inu hoi; ananahi hoi tatou e pohe ai.” (Korinetia 1, 15:32) E pinepine teie huru feruriraa i te aratai atu i te amu-hua-raa, te inu-hua-raa e te ahoaho—eiaha râ i te hau mau o te feruriraa.
Oia mau, mai te peu e e vaiiho-roa-hia to a muri aˈe i roto i te rima o te taata, e mea peapea ïa ta tatou mau tiairaa. Ua viivii te mataˈi, te pape e te repo o te fenua mai tei ore i itehia aˈenei. Te rahi noa ˈtura te haamǎtaˈuraa o te hoê tamaˈi atomi e te mau ohipa totoaraa. E miria taata na te ao atoa nei te mauiui nei i te maˈi e te veve. Te vai ra râ te mau tumu maitai no te tiaturiraa.
I te mea e eita te mau taata e nehenehe e tohu i te tau no a muri aˈe ma te tano, te faataa ra te Atua ra o Iehova ia ˈna iho mai tei faaite “i te hopea mai te matamua mai â, e mai mutaaiho mai â i te faaiteraa i te mea aitâ i tupu.” (Isaia 46:10) Eaha ta Iehova e parau ra no nia i ta to a muri aˈe e hopoi mai?
Eaha ta te Bibilia e parau ra
Eita Iehova e vaiiho ia tuinohia te fenua aore ra te ora i nia iho i te reira. Inaha, te fafau ra te Bibilia e e “haamou [te Atua] i te feia e faaino ra i te fenua nei.” (Apokalupo 11:18, MN) Na roto i to ˈna Basileia, aore ra faatereraa i nia i te raˈi, e tamâ Iehova i te ino i nia i te fenua e e hopoi mai i te mau tupuraa ta ˈna i opua i te omuaraa. (Genese 1:26-31; 2:8, 9; Mataio 6:9, 10) Te horoa ra te mau irava bibilia i muri nei i te hoê hiˈo-atea-raa no a muri aˈe, ma te faataa i te mau tupuraa o te fatata i te ohipa i nia i te taata taitahi i nia i te fenua.
Salamo 46:8, 9. “A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua! ua ofati oia i te fana, e ua tapǔpǔ i te mahae, e ua tahuhia te mau pereoo tamaˈi ra i te auahi.”
Isaia 35:5, 6. “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra: e pǔpû mai hoi te pape na te medebara, e te pape tahe i te fenua mǎrô ra.”
Isaia 65:21, 22. “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.”
Daniela 2:44. “E faatupu . . . te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”
Ioane 5:28, 29. “Te fatata mai nei hoi te hora e faaroo ai te feia atoa i roto i te apoo ra i [to Iesu] reo, e e haere mai i rapae.”
Apokalupo 21:3, 4. “Ei pihai atoa iho te Atua ia ratou . . . E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”
E nafea te pahonoraa o te Bibilia e horoa ˈi i te hau mau o te feruriraa
Na mua, e mea fifi roa paha ia tiaturi i te mau tupuraa i faataahia i nia nei. Na te Atua râ teie mau parau fafau, e ere na te taata. E e “ore e tia” i te Atua ra o Iehova “ia haavare.”—Tito 1:2.
Ia haapii oe i te tiaturi i ta te Atua mau parau fafau e i te ora ia au i ta ˈna mau ture, e tapea maite oe, noa ˈtu te mau tupuraa fifi roa ˈˈe, i to oe hau o te feruriraa. Eita te tamaˈi, te veve, te maˈi e te mau fifi o te ruhiruhiaraa aore ra te peapea o te pohe—eita hoê aˈe o teie mau mea e nehenehe e faaere roa ia oe i to oe hau o te feruriraa. No te aha? No te mea ua papu ia oe e e faaore roa te Basileia o te Atua i te mau faahopearaa o teie mau ati atoa.
E nafea e nehenehe ai e noaa ia oe teie tiaturiraa papu no a muri aˈe? E mea tia ia ‘faaapî oe i to oe maramarama’ e ia tamata oe iho “eaha mau na te hinaaro o te Atua, te maitai, te au e te tia roa.” (Roma 12:2, MN) E hinaaro paha oe i te tahi haapapuraa hau e e nehenehe te mau parau fafau o te Bibilia e tiaturihia. E mea hoona te tutavaraa o taua hiˈopoaraa ra. E mea iti te mau mea ta oe e rave i roto i te oraraa o te horoa mai i te hau rahi aˈe o te feruriraa.
[Hohoˈa i te mau api 8, 9]
Eaha ta te Parau a te Atua e faaite ra no nia i te tau no a muri aˈe?