Pakigsuod sa Diyos

Usa ka Magbalantay nga May Kahingawa Kanimo

Mateo 18:12-14

‘MAY kahingawa ba ang Diyos kanako?’ Kon nakapangutana ka na niana, nan, wala ka mag-inusara. Daghan kanato ang nagsagubag mga kalisdanan ug mga problema, ug usahay magduhaduha kita kon kaha ang Maglalalang niining halapad nga uniberso interesado ba kanato. Kinahanglan nga atong mahibaloan kon si Jehova nga Diyos may kahingawa ba sa matag usa kanato. Sa dinhi pa siya sa yuta, si Jesus, nga nakaila kaayo kang Jehova, nag-asoy ug ilustrasyon nga makapadasig kaayo kanato.

Sa pagtandi ni Jesus kang Jehova ngadto sa usa ka magbalantay, siya miingon: “Kon ang usa ka tawo adunay usa ka gatos ka karnero ug ang usa niini mahisalaag, dili ba niya biyaan ang kasiyamag-siyam diha sa kabukiran ug molakaw sa pagpangita sa usa nga nahisalaag? Ug kon makaplagan niya kini, ako tinong magaingon kaninyo, siya labaw nga malipay labot niini kay sa kasiyamag-siyam nga wala mahisalaag. Sa susama dili tilinguhaong butang sa akong Amahan nga anaa sa langit nga malaglag ang usa niining mga gagmay.” (Mateo 18:12-14) Susihon nato kon sa unsang paagi gihubit dinhi ni Jesus ang malumong kahingawa ni Jehova alang sa matag usa sa Iyang mga magsisimba.

Giisip sa magbalantay nga iyang obligasyon ang pagbantay sa matag usa sa iyang mga karnero. Kon mahisalaag ang usa kanila, siya mahibalo kon kinsa ang nawala. Nakaila siya sa matag karnero pinaagi sa ngalan nga iyang gihatag kanila. (Juan 10:3) Ang magbalantay nga may kahingawa dili mohunong sa pagpangita hangtod nga ang karnero nga nawala mahibalik sa panon. Sa iyang pagpangita sa maong karnero, wala niya ipameligro ang 99 nga nahibilin. Ang mga magbalantay sagad dili ra layo sa usag-usa ug ila rang tugotan nga magsagol ang ilang panon. a Busa mahimong ibilin sa magbalantay ang panon ngadto sa kaubang mga magbalantay ug pangitaon niya ang karnero nga nawala. Malipay kaayo siya sa dihang makaplagan na niya kini nga wala ra maunsa. Iyang kugoson ang nahadlok nga karnero ug dad-on kini pagbalik ngadto sa panon diin kini luwas gikan sa mga manunukob.—Lucas 15:5, 6.

Sa pagpatin-aw sa ilustrasyon, si Jesus miingon nga dili buot sa Diyos nga “malaglag ang usa niining mga gagmay.” Una pa niana, gipasidan-an ni Jesus ang iyang mga tinun-an nga dili nila angayng pandolon ang “usa niining mga gagmay nga nagbutang ug pagtuo [kaniya].” (Mateo 18:6) Nan, unsa may gitudlo kanato sa ilustrasyon ni Jesus mahitungod kang Jehova? Nagtudlo kini kanato nga siya usa ka Magbalantay nga nahingawa gayod sa matag usa sa iyang mga karnero, lakip na ang “mga gagmay”—kadtong morag walay bili sa panglantaw sa kalibotan. Oo, sa mga mata sa Diyos, linain ug bililhon ang matag usa sa iyang mga magsisimba.

Kon gusto nimog dugang pamatuod nga ikaw bililhon sa mga mata sa Diyos, nganong dili mokat-on ug dugang bahin sa Dakong Magbalantay, si Jehova nga Diyos, ug sutaon kon sa unsang paagi ikaw masuod kaniya? Sa pagbuhat niana, ikaw makasalig sama kang apostol Pedro, kinsa sa walay duhaduha nakadungog mismo kang Jesus nga nag-asoy sa ilustrasyon bahin sa nawala nga karnero. Siya misulat: “Itugyan [sa Diyos] ang tanan ninyong mga kabalaka, kay siya may kahingawa kaninyo.”—1 Pedro 5:7.

[Footnote]