Mangin Suod sa Dios

Isa ka Manugbantay nga Nagaulikid sa Imo

Mateo 18:12-14

‘NAGAULIKID bala ang Dios sa akon?’ Kon ginpamangkot mo na ini sa imo kaugalingon, wala ka nagaisahanon. Madamo sa aton ang nagaatubang sing mga kabudlayan kag mga problema, kag kon kaisa mahimo nagapalibog kita kon bala interesado sa aton ang Manunuga sining malapad nga uniberso. Luyag naton hibaluon kon bala nagaulikid si Jehova nga Dios sa aton subong mga indibiduwal. Sang yari si Jesus sa duta nasabat niya ini nga pamangkot paagi sa isa ka ilustrasyon, bangod kilala gid niya si Jehova.

Gingamit ni Jesus subong halimbawa ang pag-ulikid sang manugbantay sa iya mga karnero. Sia nagsiling: “Kon ang isa ka tawo may isa ka gatos ka karnero kag magtalang ang isa sini, indi bala bayaan niya ang kasiaman kag siam sa mga bakulod kag maglakat agod pangitaon ang isa nga nagtalang? Kag kon makita niya ini, nagasiling gid ako sa inyo, magakasadya sia sa sini sing labi pa sangsa kasiaman kag siam nga wala magtalang. Subong man indi luyag sang akon Amay nga yara sa langit nga ang isa sining mga kubos malaglag.” (Matthew 18:12-14) Tan-awon naton kon paano ginlaragway ni Jesus ang pagpalangga ni Jehova sa tagsa Niya ka sumilimba.

Nagabatyag ang manugbantay nga may salabton sia sa tagsa niya ka karnero. Kon magtalang ang isa, mahibaluan niya kon ­sin-o ang nadula. Kilala niya ang ngalan sang tagsa ka karnero kay sia ang naghingalan sa ila. (Juan 10:3) Ang mapinalanggaon nga manugbantay indi magauntat sa pagpangita tubtob mabalik niya sa panong ang nagtalang nga karnero. Kon pangitaon niya ang isa nga nagtalang indi man mabutang sa katalagman ang 99 nga nabilin. Masami nga nagaupdanay ang mga manugbantay kag nagasimpunanay ang ila mga panong.⁠ * Gani, kon maglakat ang manugbantay agod pangitaon ang isa nga nagtalang, mahimo niya anay ipaatipan sa iya kaupod nga mga manugbantay ang nabilin nga mga karnero. Malipay gid sia kon makita niya nga wala sing samad ang nagtalang nga karnero. Nian, pas-anon niya ini sa iya abaga kag ibalik sa panong.​—⁠Lucas 15:​5, 6.

Ginpaathag ni Jesus ang ilustrasyon kag nagsiling sia nga indi luyag sang Dios nga “ang isa sining mga kubos malaglag.” Antes sini, ginpaandaman ni Jesus ang iya mga disipulo batok sa pagpasandad sa “isa sining mga kubos nga nagatuo sa [iya].” (Mateo 18:6) Kon amo, ano ang ginatudlo sa aton sining ilustrasyon ni Jesus tuhoy kay Jehova? Sia isa ka Manugbantay nga nagaulikid gid sa tagsa niya ka karnero, lakip sa “mga kubos,” ukon mga indi importante sa pagtamod sang kalibutan. Palangga gid sang Dios ang tagsa ka tawo nga nagasimba sa iya.

Kon luyag mo sing pasalig nga palangga ka sang Dios, kilalaha sing maayo ang Daku nga Manugbantay nga si Jehova nga Dios, kag mangin suod sa iya. Kon himuon mo ini, magatubo man ang imo pagsalig sa Dios kaangay ni apostol Pedro, nga mahimo nakabati sang ilustrasyon ni Jesus tuhoy sa nadula nga karnero. Sang ulihi, si Pedro nagsulat: “Itugyan ninyo sa [Dios] ang tanan ninyo nga kabalaka, bangod nagaulikid sia sa inyo.”​—⁠1 Pedro 5:7.

[FOotnote]