Mvungudi On’okuvwanga Mfunu
Finama Nzambi
Mvungudi On’okuvwanga Mfunu
‘NGA Nzambi mfunu kekumvwanga?’ Kele vo kiuvu kiaki okiyuvulanga, zaya dio vo kuna ngeye mosi ko. Ndonga tumonanga e mpasi, ezak’e ntangwa tukiyuvulanga kana vo Mvangi a nsema ozeye e mpasi zeto. Nga ke diambote ko mu zaya kana vo Yave wa Nzambi ovwanga konso mosi mu yeto o mfunu? Vava kakala ova ntoto, Yesu ona tomene zaya Yave, wata kingana kivananga e mvutu za kiese za kiuvu kiaki.
Muna tezanesa Yave yo mvungudi, Yesu wavova vo: ‘O muntu una ye nkam’a mameme, edimosi diend’atungiana, nga kesisa ko luvwa ye vwa, kend’avavi dina diatungiana muna miongo? Ovo osolwele dio, kieleka inusamunwini vo, olutidi dio mwena kiese, ke mu luvwa ye vwa lulembi tungiana ko. Diau adimosi, ke lwau ko luzolo lu’Es’eno wina kun’ezulu vo kavil’omosi vana ben’away’andwelo.’ (Matai 18:12-14) Yambula twafimpa una Yesu kakiesesela e mpila ina Yave kemwenanga konso selo Kiandi.
Mvungudi una ye mbebe ya lunga-lunga konso ememe mun’ekambi diandi. Avo ememe dimosi mun’ekambi divididi, olenda zaya kana nki’ememe divididi. Obokelanga konso ememe muna nkumbu ina kamvana. (Yoane 10:3) O mvungudi ambote kalendi vunda ko mu vava ememe divididi yavana kesolola yo vutula dio mun’ekambi. Ekolo kevavanga ememe diavila, kalendi sisa 99 lwa mameme mu vonza ko. Ntangwa zayingi avungudi ayingi bevungulwilanga kumosi o makambi, yo yambula vo mameme mawonso masangalakana. * I bosi, o mvungudi ovavanga ememe divididi, lenda sisa mameme 99 kw’akw’andi avungudi. Muna kuma kiaki, avo mvungudi solwele ememe diavila, okalanga ye kiese kiayingi. Muna vutula ememe diavila mun’ekambi, onatanga dio van’evembo kuna luvuvamu.—Luka 15:5, 6.
Muna songa nsasa nona kiaki, Yesu wavova vo Nzambi kezolanga ko vo “omosi vana ven’away’andwelo kafwa.” Kuna lubantiku, Yesu walukisa alongoki andi balembi teses’esakuba kana ‘kw‘andwelo ana bekwikilanga muna yandi.’ (Matai 18:6) Ozevo, e nona kia Yesu adieyi kitulongele mu kuma kia Yave? Yandi i mvungudi otoma lunga-lunganga konso ememe diandi, kumosi “y’andwelo”—awana bebadikilwanga kwa wantu a nza vo bakondwa mfunu. Elo, muna meso ma Nzambi, konso selo kiandi wantalu.
Avo se kolo ovavanga zaya eziku kana vo Nzambi mfunu kekuvwanga, ekuma lembi longokela mayingi mu kuma kia Yave wa Nzambi wa Mvungudi Anene ye una lenda kumfinamena? Muna vanga wo, lenda kala ye vuvu nze kina kiakala yo Petelo wa ntumwa, ona wawa e nona kia Yesu ki’ememe diavila. Petelo wasoneka vo: “O nteleko eno a moyo awonso, nusia wo muna [Nzambi], e kuma kadi, yeno kasidi o moyo.”—1 Petelo 5:7.
[Mvovo Vana Yand’a lukaya]
^ tini. 6 Ke dikalanga mpasi ko mu vambula ekambi, kadi konso ememe owanga yo landa ndinga mvungudi andi.—Yoane 10:4.