Mu Sutelele ku Mulimu

Mulisana Ya Mi Babalela

Mateu 18:12-14

‘KANA Mulimu wa ni babalela?’ Haiba mu kile mwa ipuza cwalo, haki mina fela mu nosi. Buñata bwa luna lu kopani ni matata, mi ka linako ze ñwi lu kakanyanga kuli luli Mubupi wa pupo wa bona matata e lu li ku ona. Kacwalo lu tokwa ku ziba kuli, Kana Jehova wa lu babalela ka butu? Jesu ya ziba hande Jehova ha na li fa lifasi na file swanisezo ye lu fa kalabo ye susueza.

Jesu ha na bapisa Jehova ku mulisana ya babalela hande lingu za hae, na bulezi kuli: “Mutu h’a na ni lingu ze mwanda, mi ku latehe i liñwi ku zona, kana a si ke a tuhela fa malundu ze mwanda fo ku latehile i liñwi, kuli a y’o bata ye latehile? Mi h’a ka i fumana, kaniti na mi bulelela, ni li: U ka i tabela hahulu ku fita lingu ze mwanda fo ku latehile i liñwi. Kamukwaocwalo, hasi tato ya Ndat’a mina ya kwa lihalimu, kuli ku latehe a li muñwi ku ba banyinyani bao.” (Mateu 18:12-14) Ha lu nyakisiseñi ka mo Jesu a taluseza Jehova mwa babalelela balapeli ba Hae.

Mulisana na ikutwanga kuli u na ni buikalabelo bwa ku babalela lingu za hae kaufela. Ngu ha ne i lateha, na zibanga kuli ye tondahala ki ye cwana. Na ziba ngu ye ñwi ni ye ñwi ka libizo la na i file. (Joani 10:3) Mulisana yo munde na sa tuheli ku bata ngu ye latehile ku fitela a i fumana. Mulisana wa mwa swanisezo ya Jesu ni yena na si ka siya fela lingu ze 99 li sa babalelwi. Hañata balisana ne ba fulisezanga hamoho mitapi ya bona. * Kacwalo mulisana ya na ile ku yo bata ngu ye latehile na siile lingu ze 99 kwa balisana ba bañwi. Mulisana ha fumana kuli ngu ye ne latehile ha i si ka holofala, a taba. A lwala ngu yeo ye sabile fa maheta a hae, ni ku i kutisa kwa mutapi o silelelizwe.—Luka 15:5, 6.

Jesu ha na talusa swanisezo yeo na bulezi kuli Mulimu ha lati kuli “ku latehe a li muñwi ku ba banyinyani bao.” Pili Jesu a si ka fa swanisezo ya ngu ye latehile, na lemusize balutiwa ba hae kuli ba si ke ba sitatalisa “yo muñwi wa ba banyinyani bao ba ba lumela ku [yena].” (Mateu 18:6) Kacwalo lu itutañi ka za Jehova mwa swanisezo ya Jesu? Lu ituta kuli ki mulisana ya babalela hande lingu za hae kaufela, ku beya cwalo ni “ba banyinyani,” bona ba ba angiwa kuli haki ba butokwa mwa lifasi. Kaniti luli Mulimu u nga balapeli ba hae kaufela kuli ki ba butokwa mi wa ba lata.

Haiba mu bata ku kolwa kuli mu ba butokwa ku Mulimu, mu itute hahulu ka za Mulisana yo Mutuna, yena Jehova Mulimu, ni ku ituta mo mu kona ku sutelela ku yena. Haiba mu eza cwalo, mu ka ba ni sepo inge Muapositola Pitrosi, ya na ikutwezi Jesu ha fa swanisezo ya ngu ye latehile. Hamulaho Pitrosi na ñozi kuli: “Mu nepele lipilaelo za mina kaufela fahalimw’a [Mulimu], kakuli wa mi tokomela.”—1 Pitrosi 5:7.

[Litaluso za kwatasi]