Wan Skapuman di e broko en ede nanga yu
Kon krosibei na Gado
Wan Skapuman di e broko en ede nanga yu
’GADO e broko en ede nanga mi?’ Furu sma poti na aksi disi gi densrefi wan leisi. Furu fu wi ben abi fu du nanga pina èn problema kaba, èn son leisi wi e aksi wisrefi efu a Mekiman fu a bigi hemel nanga grontapu e broko en ede nanga wi. Wi wani kon sabi efu Yehovah Gado e broko en ede nanga ibriwan fu wi trutru. Yesus na a sma di sabi Yehovah moro bun leki iniwan tra sma. Di a ben de na grontapu, dan a ben gi wan agersitori di e gi wi wan moi piki tapu na aksi dati.
Na ini na agersitori a ben sori fa wan skapuman e sorgu gi den skapu fu en. Yesus ben taki: „Efu wan sma abi wán hondro skapu èn wan fu den lasi, dan a sma dati sa libi den neigitenti na neigi skapu na tapu den bergi fu go suku a lasi skapu, a no so? Fu tru mi e taigi unu taki efu a feni en, dan a o prisiri moro nanga a skapu disi, leki nanga den neigitenti na neigi skapu di no ben lasi. Na so mi Tata na hemel no wani kwetikweti taki wan fu den pikinwan disi musu lasi libi” (Mateyus 18:12-14). Meki wi go luku now san Yesus e fruteri fu a fasi fa Yehovah e broko en ede srefisrefi nanga ibriwan fu den anbegiman fu En.
A skapuman ben firi taki a ben musu sorgu gi ibriwan fu den skapu fu en. Efu wan skapu ben lasi pasi, dan a ben o sabi wantewante sortuwan ben lasi. A ben sabi ala den skapu na den nen di a ben gi den (Yohanes 10:3). A lobi-ati skapuman ben o tan suku a lasi skapu teleki a ben feni en èn a ben tyari en go baka na a ipi. Te a ben o libi den tra 99 skapu na baka, dan noti no ben o pasa nanga den, fu di skapuman ben gwenti fu de na makandra. * Na so fasi den skapu fu den ben e moksi densrefi nanga trawan èn a skapuman ben kan gowe libi den skapu fu wan pisiten gi den tra skapuman. Te a ben o feni a lasi skapu baka èn si taki noti ben mankeri en dan a ben o prisiri srefisrefi. A ben o poti a skapu, di ben frede, na tapu en skowru èn a ben o tyari en go baka na a ipi pe sani no ben o man du en ogri.—Lukas 15:5, 6.
Di Yesus ben gebroiki na agersitori disi, dan a ben taki dati Gado no wani taki „wan fu den pikinwan disi musu lasi libi”. Yesus ben warskow den disipel fu en na fesi fu no „meki wan fu den pikinwan disi di e bribi na ini [en], fadon” (Mateyus 18:6). San na agersitori fu Yesus e leri wi fu Yehovah? A de wan Skapuman di trutru e broko en ede nanga ibriwan fu den skapu fu en, spesrutu nanga den „pikinwan”. Dati na den sma di grontapu e si leki sma di no de prenspari. Iya, Gado e si ibriwan fu den anbegiman fu en leki warti sma.
Efu yu wani sabi efu Gado trutru e broko en ede nanga yu, dan fu san ede yu no e teki ten fu kon leri sabi a Bigi Skapuman disi moro bun fu kon si fa yu kan kon moro krosibei na en? Te yu e du dati dan yu o abi wan seikerfasi neleki di fu Petrus, di ben yere na agersitori disi fu Yesus srefi, èn di ben skrifi: „Un musu trowe ala un sorgu na [Gado] tapu, bika a e broko en ede nanga unu.”—1 Petrus 5:7.
[Futuwortu]
^ paragraaf 3 A no ben de wan problema fu prati den skapu fu makandra, fu di ibri skapu ben sabi a sten fu en skapuman.—Yohanes 10:4.