JESÚS fentren rupa quimeltufi pu che ñi ngillatuafiel ta Ngünechen. Mülepalu Mapu mu, pu loncolechi religioso ngillatuquefuingün sinagoga meu ca tati plaza meu. ¿Chumngelu femngechi femingün? Femngechi com che tañi peaeteu ca ñi afmatungeal engün. Mufüque rupa huiño feipiquefuingün tañi ngillatuel ca alü amulcünuquefuingün ñi ngillatun, femngechi doi allcütungealu troquiuquefuingün (Mateo 6:5-8). Huelu Jehová allcütuquelai femngechi ngillatun, feimu Jesús quimeltufi pu cüme piuquengelu chumngechi ngillatual.

Jesús quimeltueiñmu chumngechi ngillatual ñi yamniengeal ñi üi ta Chau Dios, ñi cüpayal tañi Gobierno ca ñi femngeal tañi ayüqueel Mapu mu. Jesús ca quimeltueiñmu taiñ llellipual taiñ quellungeal (Mateo 6:9-13, Traducción del Nuevo Mundo [TNM]; Lucas 11:2-4). Jesús entui quiñeque pengelün dungu, femngechi quimeltuqueiñmu ayüliyiñ taiñ allcütuaeteu Chau Dios, mülei taiñ rumel ngillatuleal, ñom piuquengeal ca feyentuleal (Lucas 11:5-13; 18:1-14). Huelu Jesús re feipilai müten, ca quimeltueiñmu quisu tañi femün mu (Mateo 14:23; Marcos 1:35).

Com ñi feipiel Jesús quellufi pu discipulo ñi doi cüme ngillatual com piuque mu. Huelu feichi pun petu ñi lanon, Jesús quimeltufi tañi pu discipulo quiñe doi falin dungu ngillatun mu.

Feichi pun petu ñi lanon ta Jesús, yafültucufi tañi pu apostol. Feichi pun quimelelfi quiñe hue dungu. Jesús feipifi engün: “Iñche ta rüpü reque felen, ca rüfngechi dungu ca mongen, iñche meu pepi puhun-ngei ta Chau meu. Iñche meu müten feyentulu amuai ta Chau meu”. Ca feipi: “Com tamün ngillatuel ta eimün iñche ñi üi meu chumngechi ñi adentuel ta iñche, iñche ta feman, femngechi ta Fotüm meu ñi pengelngeal Chau ñi fütra pepiluhun. Femngechi feman chem dungu rume ngillatulmün iñche ñi üi meu”. Fei epe aflu ñi nütramcan, Jesús feipi: “Fantepu mu chem no rume llellipulaimün iñche tañi üi meu. Llellipuqueaimün, fei llohuaimün. Femngechi rume ayüucüleaimün” (Juan 14:6, 13, 14; 16:24, TNM).

Ñi feipin ta Jesús rume falin-ngei. Quiñe diccionario feipilu Biblia ñi dungun feipi: “Jesús cacünutui chumngechi ngillatual. Jesús quimeltulai ñi ngillatungeal ta quisu, doi mai entui quiñe hue quimeltun ñi ngillatungeal tañi Chau”.

Jehová rumel allcütuñmaquefi ñi ngillatun tañi pu poyequeteu (1 Samuel 1:9-19; Salmo 65:2). Cuifi mu Israel ñi antü mu, com pu che ayüle ñi allcütuñmangeal tañi ngillatun mülefui ñi quimtucungeal Israel Jehová ñi pu dullinchengen. Fei hula Salomón ñi antü mu, mülefui ñi ngillatungeal Jehová tati ngillatuhue ruca mu ca ñi chalintuculelngeal fillque chalintucun (Deuteronomio 9:29; 2 Crónicas 6:32, 33). Huelu femngechi pichiñma müten femngequefui. Huelu chumngechi feipi ti apostol Pablo, tati ley ñi elungeel pu israelche ca com ñi chalintuculelngequefel ngillatuhue ruca mu quiñe adentun reque felei müten tati mületuachi rüfngechi dungu meu (Hebreos 10:1, 2). Tati ley yefi reque pu che ta Cristo meu (Colosenses 2:17). 33 tripantu mu, fentepuhui ñi ley ñi adcünufiel pu che, feula mülei taiñ inayafiel ta Jesús, femngechi müten hueniyeafuiñ ta Jehová (Juan 15:14-16; Gálatas 3:24, 25).

Jesús quimeltueiñmu chumngechi doi cüme ngillatuafuiñ ta Jehová. Mülei taiñ ngillatual Jesús tañi üi meu, femngechi Jehová allcütuñmayaiñmu taiñ ngillatun. Huelu, ¿chumngelu mülei taiñ ngillatual Jesús tañi üi meu?

Com iñchiñ culpafe chengeiñ. Feimu chumafuiñ rume, quisutu taiñ duam mu hueniyelayafuiñ ta Jehová (Romanos 3:20, 24; Hebreos 1:3, 4). Jesús culpafe chengelafui, feimu huli tañi mongen taiñ montulaeteu. Femngechi culli reque ñi lifrecünuafiel pu che tañi culpan meu. Fei pu feyentulelu Jesús ñi lan meu hueniyeafui ta Jehová (Romanos 5:12, 18, 19). Feimeu mülei taiñ pengelal taiñ feyentulen Jesús ñi lan meu. Ca mülei taiñ ngillatual Jesús ñi üi meu, femngechi müten hueniyeafuiñ ta Jehová ca quisu allcütuaiñmu (Efesios 3:11, 12).

Llellipuliyiñ Jesús ñi üi meu pengelaiñ taiñ feyentulen cüla dungu mu: 1) Jesús ‘Ngünechen ñi Corderongei’. Tañi lan mu, Chau Dios perdonayafeiñmu taiñ culpan. 2) Jehová huiñomongeltufi ta Jesús, feula sacerdotelei iñchiñ mu ca quelluqueiñmu taiñ cümeque dungu llohual quisu tañi lan mu. 3) Jesús tati ‘rüpü reque felei’ ñi llellipuafiel ta Chau Jehová (Juan 1:29; 14:6; Hebreos 4:14, 15, TNM).

Ngillatun Jesús ñi üi meu, pengelaiñ taiñ yamniefiel. Jehová ayüniei tañi fotüm ñi yamniengeal. Feimu Biblia feipi: “Jesús tañi üi meu, ñi lucutual com tati müleyelu [...], ca itrocom che tañi cüme quimafiel ta Jesucristo ñi Ñidolngen, Chau Ngünechen tañi püramyengeal” (Filipenses 2:10, 11). Chau Dios huli tañi fotüm iñchiñ taiñ cümelcayaeteu. Feimu ngillatuliyiñ Jesús tañi üi meu, püramyequefiyiñ ta Jehová (Juan 3:16).

Biblia mu fentren üi tuculelngei ta Jesús, femngechi ñi quimfalngeal ñi falin cüdau ñi elungeel. ¿Chem quimeltueiñmu ñi fentren üi ñi tuculelngeel ta Jesús? Quelluaiñmu ñi quimal ñi femün ta Jesús, ñi femmequen ca ñi femürpual iñchiñ taiñ duam mu (Inaduamnge ti huichulechi dungu “ Ti falin cüdau ñi nieel ta Jesús”). Femi llemai, Jesús elungei tati “doi cüme üi ta com caquelu pu üi meu”, com ñi mülen huenu ca nag mapu mu Jesús ta elfalcünungei (Filipenses 2:9; Mateo 28:18).⁠ *

Fei llemai, mülei taiñ ngillatual Jesús tañi üi meu taiñ allcütuaeteu Jehová (Juan 14:13, 14). Huelu re taiñ üitumequenoafiel müten, doi mai mülei taiñ raquiduamal chumngelu falin-ngei taiñ üituafiel ngillatun mu, ¿chumngelu cai?

Raquiduamnge tüfa: quiñe quimnoelchi che mandaleimu quiñe carta, hunelu mu chaliaimu, ramtuaimu tami chumlen. Fei epe aflu chi carta, feipiaimu tami cüme feleal. Huelu, ¿rüf piuque mu feipipei mai? ¿Cam re feipiquei müten? ¿Iñchiñ cai? Taiñ ngillatun mu, ¿re hun mu müten feipiqueiñ Jesús tañi üi mu? Femlai, Biblia feipieiñmu taiñ ‘rumel ngillatulequeal’, huelu hun mu müten feipilayaiñ, tripayai mai taiñ piuque mu taiñ ngillatuel (1 Tesalonicenses 5:17; Salmo 119:145).

Ngillatuliyiñ Jesús tañi üi mu, raquiduamaiñ ñi chumngechi chengen ta Jesús. Re hun mu feipilayaiñ “Jesús tañi üi mu”, doi mai raquiduamaiñ com ñi cümeque dungu ñi femel iñchiñ taiñ duam mu ca ñi femal cüpalechi antü mu. Ngillatun mu mañumafiyiñ ta Jehová ca püramyenieafiyiñ tañi hulün mu ñi fotüm. Femngechi femliyiñ, doi maneluhuaiñ Jesús ñi feipin mu: “Rüf dungu feipihuayiñ Chau tamün eluaeteu com tamün ngillatufiel iñche ñi üi meu” (Juan 16:23).