YÉSU a bé béna pôdôl masoohe. I ngéda yé, baéga bisase ba Lôk Yuda ba bé soohe i “makanda ma minloñ minkeñi.” Inyuki ba bé boñ hala? Inyu boñ “le bôt tehe bo.” Ba bé gwés le bôt ba bégés bo mu kiki ba yé baéga base. Ngandak yap i bé boñ minténdéé mi masoohe mi ba bé tiimba hiki ngéda, kiki bo le i mbéda le mut a “bulus bibuk” inyu boñ le Djob a nok nye. (Matéô 6:5-8) Yésu a bi unda le i nya masoohe i, i ta bé nseñ, a hôla ki bôt i nok kii ba nlama bé boñ i ngéda ba nsoohe. Ndi a bi niiga ndik bé bôt kii ba nlama bé kal i ngéda ba nsoohe.

Yésu a bi niiga le masoohe més ma nlama unda le ngôñ yés i yé le jôl li Djob li tééba lipubi, Ane yé i loo, ni le sômbôl yé i bôña. Yésu a bi unda ki le di nla bat Yéhôva le a hôla bés inyu niñ yés i hiki kel. (Matéô 6:9-13; Lukas 11:2-4) Yésu a bi gwélél ki dihéga inyu unda le di nlama téñbe, di bana hémle ni suhulnyuu ibale di nsômbôl le Yéhôva a nok masoohe més. (Lukas 11:5-13; 18:1-14) U héya hala, nyemede a bé boñ i yom a bé niiga.—Matéô 14:23; Markô 1:35.

Ibabé pééna, biniigana bi Yésu bi bi hôla banigil bé i yi kii ba nla kal i ngéda ba nsoohe. Ndi Yésu a bi bem ipam i u wé u nsôk hana ’isi inyu ti bo biniigana bilam inyu masoohe.

Yésu a bi tégbaha bebee le u wé u nsôk wonsôna i ti baôma bé makend. A bé lama añle bo jam li mondo. A kal bo le: “Men me yé njel, me yé maliga, me yé ki niñ. Mut to wada a nlo bé yak Tata handugi ni njel yem.” I mbus ha a bôn bo le: “To kinje jam ni mbat i jôl jem, m’a boñ jo, le ndi Tata a kôhna lipém ni njel Man. Ibale ni mbat to kinje jam i jôl jem, m’a boñ jo.” Bebee ni mamélél ma nkwel wé, a kal le: “Letee ni nano, ni mbadak bé jam to jada i jôl jem. Ni bat, ndi n’a kôhna, le ndi maséé manan ma ba nyonok.”—Yôhanes 14:6, 13, 14; 16:24.

Kinje bibañga bi ngui. Kaat ndoñi yada i ntoñol le hala a bi lona “mahéñha makeñi ikété masoohe.” Yésu a bé kal bé le bôt ba soohe ha bañ Djob le nyen ba nkahal soohe, to. Ndi a bé yible bôt njel mondo inyu kôôge Djob bebee.

I yé maliga le Djob a bé a ñemble masoohe ma bagwélél bé ngéda yosôna. (1 Samuel 1:9-19; Tjémbi 65:2) Ndi ibôdôl i ngéda Djob a bi boñ malômbla ni Israel, ba bobasôna ba bé yéñ le a emble masoohe map, ba bé lama neebe le Israel a yé litén Djob a mpohol. I mbus ngéda, i dilo di Salômô, ba bé lama neebe le témpel yon i yé homa Djob a pohol inyu ti bisesema. (Ndiimba Mbén 9:29; 2 Miñañ 6:32, 33) Ndi i bitelbene bi, bi bé ndigi inyu ndék ngéda. Kiki ñôma Paul a bi tila, i Mbén Djob a bi ti Israel ni bisesema ba bé ti i témpel, bi bé ndigi “titii i mam malam ma nlo, ndi ha i mam ma momede bé.” (Lôk Héber 10:1, 2) Titii i bé lama ti ntiik jam womede njel. (Kôlôsé 2:17) Ibôdôl i nwii 33  N.Y., mut a bééna ha bé ngôñ i nôgôl mbén Môsi inyu bana maada malam ni Yéhôva. I bé béda ndigi le a nôgôl nu mbén i bi pôdôl hala wee Yésu Kristô.—Yôhanes 15:14-16; Galatia 3:24, 25

Yésu a bi téé hikuu hi mbuma ñañ, inyu kôôge Yéhôva bebee. A kal le a yéne bés liwanda likeñi li li nyible masoohe més njel, le Djob a emble mo, a timbhe ki mo. Kii i nti Yésu ngui i boñ hala inyu yés?

Kiki di ngwééne i béba, nson wo ki wo, to bisesema gwo ki gwo di nla ti, bi nla bé pubus bés to ti bés kunde i bana maada malam ni Yéhôva Nyambe numpubi. (Rôma 3:20, 24; Lôk Héber 1:3, 4) Ndi Yésu a bi ti niñ yé i i yé peles, a saa inyu bibéba bi bôt ba binam inyu boñ le ba tohlana. (Rôma 5:12, 18, 19) Nano, hiki mut a ngwés a nla ba mapubi i mis ma Yéhôva. A bana ki kunde i pot i bisu gwé, ndik le a nlama hémle sesema i Yésu a soohege i jôl jé.—Éfésô 3:11, 12.

I ngéda di nsoohe i jôl li Yésu, wee di nhémle mam maa, mu nson a ngwel inyu yônôs nsômbôl i Djob: (1) A yé “Man ntômba nu Nyambe,” inyu sesema yé nyen bibéba gwés bi nwéhlana. (2) Yéhôva a bi tugul nye, nano a ngwel i nson u “prisi keñi,” le ndi di kôhna bisai bi nlôl ni njel binoñ. (3) Nyetama nyen a yé njel inyu kôôge Yéhôva bebee ikété masoohe.—Yôhanes 1:29; 14:6; Lôk Héber 4:14, 15.

I ngéda di nsoohe i jôl li Yésu, di nti nye lipém, a kôli kôhna lipém li, inyule sômbôl i Yéhôva i yé le, “bôt bobasôna ba ôm maboñ i jôl li Yésu . . . , ni le hiki hilémb hi mpahal i mbamba le Yésu Kristô a yé nwet, kayéle Nyambe Tata a kôhna lipém.” (Filipi 2:10, 11) Jam li nlôôha ba nseñ li yé le, i ngéda di nsoohe i jôl li Yésu, di nti Yéhôva lipém nu a bi ti Man wé inyu loñge yés.—Yôhanes 3:16.

Inyu boñ le di tibil nok tel ikeñi Yésu a gwé, Bibel i ngwélél ngandak mangédi ni môl inyu pôdôl nye. Ntiik, Yésu a bi kôhna “jôl li li nloo môl mape momasôna.” a A bi kôhna kunde yosôna i ngii ni isi.—Filipi 2:9; Matéô 28:18.

Ibabé pééna, di nlama soohe i jôl li Yésu, ibale di ngwés le Yéhôva a emble masoohe més. (Yôhanes 14:13, 14) Ndi i ngéda di nkal le “i jôl li Yésu,” kekikel, di kalak bañ hala wengoñle hala a nyila ndik bés kiki bo ngim lem. Inyuki di nkal hala?

Di nyoñ hihéga, ibale mut nyuñga a ñéble we kaat, a yé le a mélés yo ni bini bibañga le, “me nhémle le kaat yem y’a koba we le u yé mbôô.” Baa u nhoñol le bibañga bini bi nlôl toi nye i ñem? Heni! A gwé ndigi lem i tila gwo hala inyu mélés kaat yé. Jon, di bana bañ lem i soohe ndigi hala i jôl li Yésu, kiki mut nyuñga le hiki ngéda a tila kaat a mélés yo ni minlélém mi bibuk. To hala kiki di nlama “soohe hiki ngéda,” di nlama boñ hala ni ‘ñem wés wonsôna,’ ha ndigi bé inyule di meya di mboñ hala.—1 Tésalônika 5:17; Tjémbi 119:145.

Kii i nla hôla we le, u kal ndik bañ le “i jôl li Yésu,” ndigi inyule u meya u nkal hala? I ga ba loñge le u ôt pék mu bilem bilam bi Yésu. Hoñol i mam a m’a bôñôl we ni ma a yé bebee i bôñôl we. Ti Yéhôva mayéga ikété masoohe, u bégés nye, inyule a bi gwélél Man wé i nya i mbuma ñañ. Kiki u mba u mboñ hala, ha nyen w’a kônde hémle unu u mbônga u Yésu le: “To kinje jam ni mbat Tata, a’ ti bé jo i jôl jem.”—Yôhanes 16:23.