Warom in Yeesus sayne naame peete?
YEESUS hot oft iwich kepeet kexproch. In sayn taache, hon ti yiitixe relichyeese xëfe sich “in te haupste krayts weeche” kextelt fer se peete. Warom? Wayl se wolte “tas ti layt se siin” solte. Tii wolte aan kesiin wëre als wën se wërklich Kot aan peete teete. Fiil hon lange kepeete kemacht, imer tas selwiche kesaat, als wën tas neetich “weyer fiil wërter” penutse fer tas kepeet keheert wëre. (Matheus 6:5-8) Yeesus hot ketsaycht tas soo peete hat khee weyert. Soo, hot eyer ti eerliche layt keholef ferxteen was se net saan solte im kepeet. Awer, tee hot mee kemacht wii noore in lërne wii net peete.
Yeesus hot in kelërnt tas unser kepeete mise tsayche unser wunx tas Kot sayne naame solt kehaylicht wëre, sayne Raych solt khome un sayne wile solt kemacht wëre. Yeesus hot aach in kelërnt tas es richtich is Kot sayn hilef ferlange fer mit persoonliche sache um keen. (Matheus 6:9-13; Lukas 11:2-4) Torich ilustratsyoone, hot Yeesus ketsaycht tas, fer Kot unser kepeete aan heere, mise mer klaape un teemuutich sin un net uf kepe. (Lukas 11:5-13; 18:1-14) Un tee hot mee kraft kep fer was tee in kelërnt hot torich sayn aychne payxpiil. (Matheus 14:23; Markus 1:35)
Sicher, Yeesus sayn inlërnung hot sayn tisipele keholef sayn kepeete ferpesere. Awer tas waar in ti lest nacht woo Yeesus uf ti Eyert waar, woo tee sayn tisipele ti haupst inlërnung iwich tas kepeet kep hot.
“Een kroos ënerung im kexicht fom kepeet”
Yeesus hot ti meyerst tsayt fon te nacht penutst fer sayn troye aphostele uf muute. Tas waar ti richtich tsayt fer etwas nayes pekhant mache. Tee saat: “Ich sin te weech, ti woerheet un tas leepe. Nimant khomt tsum Fater heekstens torich mich.” Xpeeter hot Yeesus tëne etwas uf muutiches ferxproch: “Ales was teyer in mayn naame ferlangt, tas mache ich, tas te Fater torich sayn Soon kehërlicht wëre sol.” Un tsum ën hot tee noch kesaat: “Pis yets hot iir noch kaar niks in mayne naame ferlangt. Ferlangt un teyer wërt tas kriin, tas ayre frayt sol komplët sin.” (Yoohan 14:6, 13, 14; 16:24)
Tiise wërter waare seer wunerlich. Een puuch woo triwer xprecht saat “Tas waar een kroos ënerung in te kexicht fom kepeet.” Yeesus hot net kesaat tas tas kepeet solt tsu iim kemacht wëre un net mee fer Kot. Xtats tas, hot tee ketsaycht een naye aat fer ticht tsu Yeehoowa khome.
Sicher, hot Kot imer sayn troye tiiner sayn kepeete kehoricht. (1 Samuël 1:9-19; Psalm 65:2) Awer fon te tsayt aan, wii Kot sayn pakt mit te israeliiter kemacht hot, tii woo wolte sayn kepeete aan keheert hon, muste ferxteen tas Israël weyer Kot sayn raus kesuuchte natsyoon. Un xpeeter, fon Salomon sayn tsayt aan, muste se ferxteen tas Kot te thempel raus kesuucht hot wii tas plats fer opfer mache. (Teuteronoomyum 9:29; 2 Kroonike 6:32, 33) Awer toch, tiise aat fer Kot aan peete waar ploos fer een tsayt. Soo wii te aphostel Phaul kesaat hot, tas Kesets woo Israël kriit hot un ti opfer woo in te thempel kemacht sin woer, waare ‘een xate fon te kuute tinge woo khome teete, awer net ti aychne wërklichkheet.’ (Hepreeyer 10:1, 2) Te xate must um ketrukt wëre um ti wërklichkheet. (Koloser 2:17) Fon 33 n. K. aan, een persoon sayn fraayntxaft mit Yeehoowa halt sich net mee aan Mooses sayn Kesets aan heere, awer aan tëm woo tas Kesets triwer kexproch hot — Yeesus Kristus. (Yoohan 15:14-16; Kalater 3:24, 25)
Eene naame woo “iwer ale anere naame is”
Yeesus hot sich ketsaycht wii een mechtiche fraaynt. Tee hot te weech uf kemacht tas Kot unser kepeete heert un antwort. Soo hot eyer een naye muster kextelt fer ticht tsu Yeehoowa khome. Warom khont Yeesus tas mache fer uns?
Wayl mer al mit sinte uf ti welt khome, niks woo mer mache orer opfer woo mer kepe khan wech mache ti flek fon te sint orer uns tas recht kepe fer een ferhaltnis hon mit Yeehoowa, te hayliche Kot. (Romaaner 3:20, 24; Hepreeyer 1:3, 4) Awer Yeesus hot sayn perfekt mënxlich leepe kep un ti sinte petsaalt fon te mënxheet woo khent keret wëre. (Romaaner 5:12, 18, 19) Soo, ale tii woo wole sauwer foer Yeehoowa sin un mit “frayheet mit iim xpreche”, mise tsayche tas se aan Yeesus sayn opfer klaape un in sayne naame peete. (Ëfeser 3:11, 12)
Wën mer in Yeesus sayne naame peete, tsayche mer tas mer klaape weenichts in tray aate woo Yeesus tsu tuun hot fer Kot sayn wile erfiile: (1) Tee is “Kotes Lam”, woo torich sayn opfer khene ti mënxe sayn sinte fertsayert wëre. (2) Kot hot tee uf keruuf fom toot un hayt is tee te “hooche priister”, woo macht tas ti seechen fon te fray khaaf opfer tsu ti mënxe khomt. (3) Noore tee is “te weech” fer tsu Kot khome im kepeet. (Yoohan 1:29; 14:6; Hepreeyer 4:14, 15)
In Yeesus sayne naame peete kept tëm eere. Un tas is recht, wayl tas is Kot sayn wile tas in “Yeesus sayne naame, ale kniie sole sich piie . . . un tas se al erkhëne sole tas Yeesus Kristus te Hër is, fer Kot, te Fater, sayn hërlichkheet.” (Filiper 2:10, 11) Awer tas wichticher is, tas wën mer in Yeesus sayne naame peete, kepe mer eere tsu Yeehoowa, tee woo sayne soon kep hot fer unser nuts. (Yoohan 3:16)
Mer mise peete mim ‘kanse hërts’, un net in een automatix aat
Fer uns helfe ferxteen tas wichtiche xtel woo Yeesus hot, penuts ti Piipel fiil thitele un naame. Tii helfe uns peser ferxteen ti kroos nuts woo mer kriin weeche was Yeesus kemacht hot, was tee macht un was tee noch mache wërt fer uns. (Kuk te khaste “ Yeesus sayn wichtich xtel”.) Yaa, Yeesus hot kriit een “naame woo iwer ale anere naame is.” * Ti kans autoriteet im himel un uf te Eyert is iim kep woer. (Filiper 2:9; Matheus 28:18)
Mee wii een kewoonheet
Wën mer wole tas Yeehoowa unser kepeete horicht, mise mer tas mache in Yeesus sayne naame. (Yoohan 14:13, 14) Awer mer thërfe net imer ti wërter “in Yeesus sayne naame” saan ploos wayl mer tas keweent sin. Warom net?
Tsum payxpiil, wëns tuu een priif fon een kexefts man kriist, woo am ën keet mit te wërter “mit fraayntliche kriise”, meechte tiise wërter wërklich tsayche was te kexefts man xpiirt iwich tich orer meecht tas ploos wërter sin woo ti meyerst tsayt kexrip wëre am ën fon een priif? In woerheet, Yeesus sayne naame im kepeet penutse mus mee weyert hon wii wërter woo mer xraype am xlus fon een priif. Tas is woer tas mer ‘imer peete sole’, awer mer mise tas mache mim ‘kanse hërts’, un net in een automatix aat. (1 Thesalooniker 5:17; Psalm 119:145)
Was khene mer mache fer net ti wërter “in Yeesus sayne naame” penutse ploos wayl mer tas keweent sin? Een aat is traan tenke aan Yeesus sayn xeene kwaliteete un tenke aan was tee xon kemacht hot un was tee noch mache wërt fer tich. Wëns tuu peetst, tank un loop Yeehoowa weeche ti wunerlich aat wii tee sayne Soon penutst. Wëns tuu tas imer machst, kriist tuu mee fertraung uf was Yeesus ferxproch hot: “Wën teyer tëm Fater etwas ferlangt in mayne naame, wërt tee tas aych kepe.” (Yoohan 16:23)
^ Soo wiis im Expository Dictionary of New Testament Words (Dicionário Expositivo de Palavras do Novo Testamento) xteet, tas kreekixe wort “naame” khan petayte “ales was mim naame tsu tuun hot, autoriteet, karakter, xtel, hërlichkheet, macht, [un] kroosheet.”