IJISỌSỊ kaa mẹ ang jẹ yẹẹyẹẹ u-uhye nya abwọ ọrịrị. Lụka nya iJisọsị, alegbeju nya ịgba ọgbagba nya ala iJuu kaa raabwọ ‘ụ-ụgbẹyị nya uche nya angịnyị.’ Ịyẹ tị́ du? “Chajị ká angịnyị á yaa lẹ, kị ka jaa nya angị kaa raabwọ myị́.” Ị kaa ma ẹla ookpokpo-ookpokpo ya ẹ-ẹpwụ nya abwọ ọrịrị nyaa, lala o-ri ọ-ka “ma ẹla ookpokpo ya gbegbegbe” kaa du ká Ohe ka wo abwọ ọrịrị nyaa. (ỊMatiyu 6:5-8) IJisọsị mẹjẹ nyori ịhọhọ ịlịịwẹ wuu nyị ri ododu bala ododu, ọọwa da angị la ọkịlẹtụ ọnyịịla ụbwọ nyọka jẹ́ ang ọlẹ kị ka cheji ba ụka kị juwa raabwọ. Ma ọ́ mẹjẹ jaabwọ kị ka bwu raabwọ kem ka.

IJisọsị ya nyori abwọ ọrịrị nyahị nyị ka mẹjẹ nyori ahị tịtọ ká Ohe ka rụ ẹnyị nyamwụ ịgba, ká Ịpyị-Adịrahụ nyamwụ ka wẹ, bala irya nyamwụ ọ-ka họ jịra. IJisọsị mẹjẹ nyori nyị́ tịpyọ nyọka bịlẹ Ohe kọ ka dahị ụbwọ họ ịbaba nyịlọhị ka. (ỊMatiyu 6:9-13; iLuku 11:2-4) Bwula ẹla ọ-chụ pwokwita, iJisọsị mẹjẹ nyori kori ká Ohe nyị́ ka wo abwọ ọrịrị nyahi aalẹ, ẹla nyị́ ka jụụhị a-abwọ ka, ahị nyị baba nya ọmyịmyị bala ịlọhị ọ-kpa keji. (ILuku 11:5-13; 18:1-14) Datị hi ẹla ọlẹ ká iJisọsị kaa ya, ọ kaa mẹ ang jẹ bwula ọgụ-ẹpẹtẹ nyamwụ.—ỊMatiyu 14:23; ịMakị 1:35.

Ẹla ọmẹjẹ ọwẹ ka da angịjụgbẹyị nya iJisọsị ụbwọ nyọka jẹ́-ẹ raabwọ gụ ọwọwa. Ma, iJisọsị dayị gbe odu ohyẹẹkpẹ nyamwụ nyọka mẹ ang ọlẹ kọ la kpọnchị gụgụ wuu jáa u-uhye nya abwọ ọrịrị.

IJisọsị kpa ụmụmẹ nya odu ohyẹẹkpẹ nyamwụ ju alẹrụ nyamwụ ịlẹ kị godayị giri-giri ọhụ. Ụka ọwẹ pwoku nyọka chị ang onyeewe ọhẹ ehe. IJisọsị byaa yẹkẹẹ: “Am kpakpakpa a ri Ụgbẹyị ọọwa lẹ. Am kpakpakpa a ri Ẹla nya Ịlẹhị lẹ. Am kpakpakpa a tị ri Ọhịhị ayịdang ịnyịnyị lẹlẹ. Ọngọngọhẹ á juwa ọlẹ kọ ka jẹ́-ẹ pwụ ẹga nya Ohe Oluhye Adịda myị́ kaka. Kẹnẹ-kẹnẹ, ó ri ká ọngọọwa á bwu ẹga nyam ene lẹ mẹ ịnyị.” Ọọwa lẹ, ọ chaa ehe ọnyịịla ọlẹ lẹlẹ: “Ang myị́ ang ọlẹ kanụ ka bịlẹ Ohe Oluhye la ẹnyị nyam, m ka họ ang ọọwa hanụ, chajị ká angịnyị ka jẹ́-ẹ gwogbo ha Ohe Oluhye Adịda bwula Ọnyẹwẹ nyamwụ. Ang myị́ ang ọlẹ kọ baanụ, kanụ bịlẹ la ẹnyị nyam lẹ aalẹ, m ka họ ang ọọwa hanụ ịnyịlẹhị pyii lẹ.” Tụ́ ju ocheju nya ẹla oyaya nyamwụ, ọ yẹkẹẹ: “O-bwu ẹkpẹ-ẹkpẹ warị lẹ, ánụ jam bịlẹ ịngịngịhyẹ la ẹnyị nyam ka. Lẹ, anụ juwa bịlẹ Ohe Oluhye ang ọlẹ kọ baanụ mẹ. Aalẹ, Ohe Oluhye ka ya ang ọọwa hanụ, chajị ká ọkẹkẹnị ọlẹpwụ nyanụ ka jẹ́-ẹ myọọ pwẹẹpwẹẹ mẹ.”—ỊJọn 14:6, 13, 14; 16:24.

Omyi ẹla ịwẹ baba lụmẹ. Ụpwụ ọ-da ịBayịbụụ wụlẹ ọhẹ wụrwọọ nya “ọyẹda ọtụka-ọtụka ẹ-ẹpwụ nya abwọ ọrịrị.” Ó ri irya nya iJisọsị ká angịnyị ka raabwọ họọ ọkọkọ nya Ohe ka. Ọkọkọ nyaa ọọwa lẹ, ọ wẹẹ wụrụ ụgbẹyị onyeewe da ọlẹ ká angịnyị ka bwu wu Ohe ọyị ịnyị.

Ọọwa á ri yẹkẹẹ, Ohe á kaa ke ụrụ wo abwọ ọrịrị nya anchẹ nyamwụ ene nya ụka ọwẹ ka lẹ ka. (1 ịSamwẹlụ 1:9-19; Eje Ọnyịịla 65:2) Ma, bwu ụka ọlẹ ká Isirẹlụ wẹ ka ri ẹpwụma nya Ohe ịlẹ kọ nwà iro bala, ọng myị́ ọng ọlẹ kọ tịtọ ká Ohe ka wo abwọ ọrịrị nyamwụ, ka myị pyii nyori Isirẹlụ nyị ri ẹpwụma ọlẹ ká Ohe chụ. Nyọlẹ kọ tị nọ chẹẹ pwụ́ ụka nya iSolomon, ị baba nyọka myị pyii nyori ube ịgọgọ nya-à ri ẹga ọlẹ ká Ohe chụ nyọka kiliya họọ lẹ. (Ehile Ọmada 9:29; 2 Ego Ogbegbe 6:32, 33) Ma ụgbẹyị nya ịgba ọgbagba ọwẹ á ri ang ọ-ka tata ka. Jaabwọ ká ọlẹrụ ịPọlụ da, Ehile ịlẹ ká Ohe ya ha ala Isirẹlụ bala iya ọkịlaakịla ịla ube ịgọgọ ri “ụrụrụ nya ang ịnyịịla ịlẹ kị juwa ka warị ị-ịlahị kem lẹ, ịịwa á tọchị ri ọ-họ jịra nya ang ịnyịịla ịịwa ayịdang kpangga ka.” (Ala iHiburu 10:1, 2) Ang ọlẹ kọ ri ụrụrụ baba nyọka ya iwe da ha ọ-họ jịra ayịdang. (Ala iKolosi 2:17) Bwu ẹka nya 33 C.E., igu oriri nya ọngịnyị bala iJihova á kaa kpụnịrọ Ehile nya iMosisi ọ-bajẹ kaka. Ọkọkọ nya ọọwa lẹ, ọ kaa kpụnịrọ ihi o-ju ọngọlẹ ká Ehile ọwẹ da ụbwọ ka ẹga nyamwụ, ko ri ịKịrayịsị iJisọsị.—ỊJọn 15:14-16; Ala ịGaletiya 3:24, 25.

IJisọsị mẹ ụgbẹyị ọlẹ kọ há gụ nyọka ka ẹga nya iJihova jẹ, bwula ọ-mẹ ịlọmwụ jẹ lala oligu ọlẹ kọ la ọngịrị, kọ wụrụ ụgbẹyị da nya Ohe ọ-ka wẹ abwọ ọrịrị nyahị. Ịyẹ tị́ du kọ chịkpẹẹ nya iJisọsị ọ-ka họ ẹlẹwẹ myị́ wọnụ nyahị ju?

Ị mahị wuu ju ka ẹpwụ nya ọhọbịrị, chajị nya ọọwa lẹ, ụkụrwọ lee iya ọkịlaakịla ụma ọnyị myị́ ọnyị kahị họ, á ka jẹ́-ẹ hịlẹẹhị bwu ẹpwụ nya ịrị nya ọhọbịrị lee ọ-họ kahị ka jẹ́-ẹ ri igu bala Ohe ọlịgọgọ nyahị kaka. (Ala iRom 3:20, 24; Ala iHiburu 1:3, 4) Ma, iJisọsị hu ọhịhị ọkpẹẹkpẹẹ nyamwụ kiliya wọnụ nya angịnyị ehe ịlẹ kị ka jẹ́-ẹ la ọchịda myị́ ju. (Ala iRom 5:12, 18, 19) Chajị nya ọọwa lẹ, angịlẹ wuu kị tịtọ, la iwe nyọka la cheri-cheri ị-ịlahị nya iJihova bala ọ-ka ‘jẹ́-ẹ ya ẹla myị́’ lee ọ-la ọnụ ọ-pwọọ ị-ịlahị nya Ohe. Ma nyọka jwọọ họ myị́, ahị baba nyọka la ọmyịmyị u-uhye nya iya ọkịlaakịla nya iJisọsị bala ọ-ka raabwọ bwula ẹnyị nyamwụ.—Ala Efesọsị 3:11, 12.

Ụka kahị raabwọ la ẹnyị nya iJisọsị, ahị mẹjẹ nyori ahị la ọmyịmyị u-uhye nya ang ịta ịlẹ ká iJisọsị họ ẹ-ẹpwụ nya irya nya Ohe ọ-họ jịra: (1) Ọwa à ri “Ọnyị ọkpịlọ nya Ohe Oluhye” ọlẹ ká iya ọkịlaakịla nyamwụ wụrụ ụgbẹyị nya ọhịnyọhi da hahị lẹ. (2) IJihova wuloo eji bwula igu, ọlẹẹlẹẹ lẹ ọ ti ri “olegbeju ọgbahị ọkịla iya nyahị” ọlẹ kọ wẹẹ kpa apyobwuna nya iya ọkịlaakịla nyamwụ họ ụkụrwọ hahị. (3) Ọwa kem à ri “Ụgbẹyị” ọlẹ kahị ka bwu raabwọ ha iJihova lẹ.—ỊJọn 1:29; 14:6; Ala iHiburu 4:14, 15.

Abwọ ọrịrị la ẹnyị nya iJisọsị kaa ya ihi họọ. Ihi ọlịnyị pwoku, chajị o ri irya nya iJihova nyori “bwula enyi nya iJisọsị, ụrụụ ọnyị myị́ ọnyị ka kụ eji . . . , ẹlẹlẹ ọnyị myị́ ọnyị ka ya dodehe nyori iJisọsị ịKịrayịsị nyị ri Ọngọlahị la nyọka ya ogbo ha Ohe Oluhye Adịda.” (Ala iFilipayị 2:10, 11, NW ) Ọlẹ kọ tị gụgụ wuu ri, ọ-raabwọ la ẹnyị nya iJisọsị kaa ya ogbo ha iJihova, ọwa ọngọlẹ kọ ya ọnyị nyamwụ ha chajị nyahị.—ỊJọn 3:16.

Nyọka dahị ụbwọ jẹ́ jaabwọ ká iwe-ahụrụ nya iJisọsị ju apyobwuna kaka ba, ịBayịbụụ chọọ ẹnyị ịdatị-datị. Ẹnyị ịwẹ kaa dahị ụbwọ nyọka jẹ́ iru nya apyobwuna ịlẹ kị wẹẹ mwụ́ chịhị ọgụ chajị nya ang ịlẹ ká iJisọsị họ lụka ọkẹkpẹ, ịlẹ kọ wẹẹ họọ lẹẹlẹẹ, bala ịlẹ kọ wẹẹ ka họ ị-ịlahị. (Yẹ akpa ọlẹ ko ri, “ Akụrwọ Ịkpọnchị nya IJisọsị”.) Ịlẹhị ịnyị, Ohe ya “ẹnyị ọlẹ kọ ri ẹnyị ọtụka gụ ẹnyị ịkịla wuu” ha iJisọsị. a Ọngịrị myị́ ọngịrị e-epwoohe bala odehe ji ụbwọ nyamwụ lẹ.—Ala iFilipayị 2:9; ịMatiyu 28:18.

Ee, o ri opyii kahị ka raabwọ la ẹnyị nya iJisọsị kori kahị tịtọ ká iJihova ka wo abwọ ọrịrị nyahị. (ỊJọn 14:13, 14) Ma, áhị ka ja ya nyị “la ẹnyị nya iJisọsị” ụka ịmanyị tị́ gbegbeegbe ẹ-ẹpwụ nya abwọ ọrịrị nyahị chajị nya ẹla ọ-baahị ahị ka. Ịyẹ tị́ du?

Kụ ẹhị yẹ ọ-chụ pwokwita ọlẹ. Ụka ká ọngọhẹ á ja da ileta du ta ọngọkịla, ị kaa chọọ eju la “am nyang ịnyị.” Ọwẹ ri ọhọhọ nya ileta ọdada. Ma, ọọwa mẹjẹ nyori ị ri ịnya awụlẹ pyiipyii, lee ọ tị́ wẹẹ ba ọhọhọ nya ileta ọ-da du ta ọngịnyị jẹ kem ịnyị? Ẹlịlẹhị ri, ọ-chị abwọ ọrịrị nyahị eju la ẹnyị nya iJisọsị chịla kọ ka la etu gụ ileta ọ-chị eju la “am nyang ịnyị.” Ịlẹhị lẹ, ahị ka ‘raabwọ ụka myị́ ụka,’ ma ahị baba nyọka họ ịnyị ‘lọkịlẹtụ nyahị wuu,’ áhị ka họ ịnyị nya ẹla ọ-ba ọngịnyị ahị ka.—1 Ala ịTẹsalonika 5:17; Eje Ọnyịịla 119:145.

Ányị ahị tị́ ka bwu cheji ba hi ọ-ka ya nyị “la ẹnyị nya iJisọsị” nya ẹla ọ-ba ọngịnyị ahị ịịwẹ, la o-bwu ọkịlẹtụ nyahị ka? Kụ irya kpori-kpori ju abwẹla ịkpịpyọ-kpịpyọ nya iJisọsị wẹ. Kụ irya nya ang ịlẹ kọ họ hang bala ịlẹ kọ nwụlanọ nyọka họ hang. Ẹ-ẹpwụ nya abwọ ọrịrị nyang, ji iJihova obe nya ụgbẹyị ọnyịịla ọlẹ kọ wẹẹ bwu kpa Ọnyị nyamwụ họ ụkụrwọ. Jaabwọ ká wẹẹ họ ịnyị, à ka dahịhile ehe ọchịchị nya iJisọsị ọlẹ gụ ọọwa: “Ó ri kaanụ ayịdang á ka myị-ị bịlẹ Ohe Oluhye Adịda, ịngịngịhyẹ lẹẹlẹẹ aalẹ, ọ ka ya hanụ bwula ẹnyị nyam pyii.”—ỊJọn 16:23.