Apay nga Agkararagtayo iti Nagan ni Jesus?

MASANSAN idi a nangisuro ni Jesus maipapan iti kararag. Idi kaaldawanna, dagiti lider ti relihion dagiti Judio agkararagda “kadagiti nagsulian dagiti akaba a dalan.” Apay? “Tapno makita dagiti tattao.” Nalawag a kayatda ti mapadayawan gapu iti kinarelihiosoda. Atiddog ken maulit-ulit ti karkararag ti adu kadakuada a kasla ket tay kasapulan nga ‘agusarda iti adu a sasao’ tapno maipangag ti kararagda. (Mateo 6:5-8) Imbutaktak ni Jesus nga ubbaw dagiti kasta nga aramid, isu a natulonganna dagiti napasnek a tattao a mangammo no ania ti liklikanda no agkararagda. Nupay kasta, saanna laeng a basta insuro no ania ti saan a maiparbeng no iti panagkararag.

Insuro ni Jesus a rumbeng a dagiti kararagtayo iyanninawda ti tarigagaytayo a masantipikar ti nagan ti Dios, nga umay ti Pagarianna, ken maaramid ti pagayatanna. Insuro met ni Jesus a maitutop a kiddawen iti Dios a tulongannatayo kadagiti banag a personal a mangapektar kadatayo. (Mateo 6:9-13; Lucas 11:2-4) Babaen kadagiti ilustrasion, impakita ni Jesus a kasapulantayo ti kinapinget, pammati, ken kinapakumbaba tapno maipangag dagiti kararagtayo. (Lucas 11:5-13; 18:1-14) Malaksid kadagiti imbagana, sibibileg met a nangisuro ni Jesus babaen iti mismo nga ulidanna.—Mateo 14:23; Marcos 1:35.

Dayta a pannursuro ket awan duadua a nakatulong kadagiti adalanna tapno ad-adda a mapasayaatda ti kararagda. Kaskasdi, inuray ni Jesus ti maudi a rabiina ditoy daga tapno maisurona kadagiti adalanna ti kapatgan a leksion maipapan iti kararag.

 “Dakkel a Panagbalbaliw iti Pakasaritaan ti Kararag”

Ti panangparegta kadagiti matalek nga apostolna ti kangrunaan a nangbusbosan ni Jesus iti maudi a rabiina. Isu daydi ti maitutop a kanito tapno ipalgakna ti maysa a baro a banag. Kinunana: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” Kalpasanna, pinaregtana ida babaen daytoy a kari: “Aniaman ti dawatenyo iti naganko, aramidekto daytoy, tapno ti Ama maipadayag koma mainaig iti Anak. No dawatenyo ti aniaman a banag iti naganko, aramidekto dayta.” Iti ngudo ti palawagna, kinunana: “Agingga itoy agdama a tiempo saankayo a dimmawat iti maysa a banag iti naganko. Dumawatkayo ket umawatkayto, tapno maan-anay koma ti rag-oyo.”—Juan 14:6, 13, 14; 16:24.

Nakapatpateg unay dagita nga imbagana. Maysa a diksionario ti nangdeskribir iti dayta kas “dakkel a panagbalbaliw iti pakasaritaan ti kararag.” Saan a kayat a sawen ni Jesus a ti kararag ket maiturongen kenkuana imbes nga iti Dios no di ket arigna a linuktanna ti maysa a baro a dalan tapno makaadanitayo ken Jehova a Dios.

Siempre, uray pay sakbay dayta, inim-imdengan ti Dios ti kararag dagiti matalek nga adipenna. (1 Samuel 1:9-19; Salmo 65:2) Ngem sipud idi nagbalin ti Israel kas nasion a naitulag iti Dios, dagiti agtarigagay a maipangag ti kararagda masapul a bigbigenda a ti Israel ti nasion a pinili ti Dios. Idi agangay, sipud idi tiempo ni Solomon, masapul a bigbigenda ti templo kas pagidatonan a pinili ti Dios. (Deuteronomio 9:29; 2 Cronicas 6:32, 33) Ngem temporario laeng daydi a sistema ti panagdayaw. Kas insurat ni apostol Pablo, ti Linteg a naipaulog iti Israel ken dagiti daton iti templo ket “anniniwan ti naimbag a bambanag nga umay, ngem saan a ti mismo a kababagas ti bambanag.” (Hebreo 10:1, 2) Dayta nga anniniwan ket masapul a suktan ti realidad. (Colosas 2:17) Sipud idi 33 K.P., ti relasion ti maysa a tao ken Jehova ket saanen nga agpannuray iti panangannurot iti Linteg Mosaiko. Imbes ketdi, naibasar daytan iti panagtulnog iti daydiay ipatpatuldo ti Linteg—ni Kristo Jesus.—Juan 15:14-16; Galacia 3:24, 25.

Nagan a “Nangatngato Ngem iti Tunggal Sabali a Nagan”

Impasdek ni Jesus ti natantan-ok a pagibasaran iti iyaadani ken Jehova. Impabigbigna ti bagina kas mannakabalin a gayyem, maysa a nangilukat iti gundaway tapno dagiti kararagtayo ket imdengan ken sungbatan ti Dios. Kasano a naaramidan ni Jesus dayta agpaay kadatayo?

Yantangay nayanaktayo amin a sibabasol, awan ti aniaman a maaramid wenno maidatontayo   a mangdalus kadatayo iti dayta a pakapilawan wenno mangipaay kadatayo iti kalintegan a maaddaan iti relasion ken Jehova, ti nasantuan a Diostayo. (Roma 3:20, 24; Hebreo 1:3, 4) Nupay kasta, indaton ni Jesus ti perpekto a biagna kas tao ket binayadanna ti basbasol ti sangatauan tapno masubbot ken maikaykaysada manen iti Dios. (Roma 5:12, 18, 19) Ita, amin nga agtarigagay a masubbot manipud basol ket addaan iti gundaway a maaddaan iti nadalus a takder iti imatang ni Jehova ken mangtagiragsak iti “wayawaya nga agsao” iti Dios—no la ketdi ta alagadenda ti pammati iti daton ni Jesus ken agkararagda iti naganna.—Efeso 3:11, 12.

No agkararagtayo iti nagan ni Jesus, ipakpakitatayo ti pammatitayo iti di kumurang a tallo nga aspeto ti akemna iti pannakaibanag ti panggep ti Dios: (1) Isu “ti Kordero ti Dios,” a nangipaay iti daton a pakaibatayan ti pannakapakawantayo. (2) Isu ket pinagungar ni Jehova ken agtigtignay ita kas “nangato a padi” iti panangiburay kadagiti pagimbagan ti subbot. (3) Isu ti kakaisuna a “dalan” tapno makaadanitayo ken Jehova babaen ti kararag.—Juan 1:29; 14:6; Hebreo 4:14, 15.

Pakaidayawan ni Jesus no agkararagtayo iti naganna. Mayanatup dayta a pammadayaw, agsipud ta pagayatan ni Jehova nga “iti nagan ni Jesus agparintumeng koma ti tunggal tumeng . . . , ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.” (Filipos 2:10, 11) Ngem kapatgan iti amin, ti panagkararag iti nagan ni Jesus itan-okna ni Jehova, daydiay nangipaay iti Anakna para iti pagimbagantayo.—Juan 3:16.

Tapno maawatantayo ti kinatan-ok ti akem ni Jesus, nagusar ti Biblia iti nadumaduma a titulo ken nagan a mangdeskribir kenkuana. Tumulong kadatayo dagitoy tapno matarusantayo ti adu a bendision a masagraptayo gapu iti inaramid, ar-aramiden, ken aramidento pay ni Jesus agpaay kadatayo. (Kitaem ti kahon a “Ti Napateg nga Akem ni Jesus,” iti panid 14.) Kinapudnona, naipaayan ni Jesus “iti nagan a nangatngato ngem iti tunggal sabali a nagan.” * Naited kenkuana ti amin nga autoridad idiay langit ken ditoy daga.—Filipos 2:9; Mateo 28:18.

Saan Koma a Basta Nakairuaman Laeng

Wen, dagiti kararagtayo ket masapul a  maidalan iti nagan ni Jesus tapno imdengan dagita ni Jehova. (Juan 14:13, 14) Ngem ditay koma pulos ulit-uliten ti sasao nga “iti nagan ni Jesus” kas nakairuaman laeng. Apay?

Usigem ti maysa nga ilustrasion. No adda maawatmo a surat ti maysa a negosiante, mabalin nga agngudo dayta iti kadawyan a “sincerely yours.” Panagkunam, dayta kadi ket napasnek nga ebkas ti rikna ti negosiante, wenno sursurotenna laeng ti etiketa iti panagaramid iti surat? Kinapudnona, ti panangusar iti nagan ni Jesus no agkararagtayo ket saan la koma a basta pammakada a sasao iti surat ti maysa a negosiante. Nupay nasken nga ‘agkararagtayo a di agressat,’ napateg nga aramidentayo dayta buyogen ti ‘isuamin a pusotayo,’ saan a kas iti nakairuaman laeng.—1 Tesalonica 5:17; Salmo 119:145.

Kasanom a maliklikan nga usaren ti sasao nga “iti nagan ni Jesus” kas nakairuaman laeng? Apay a dimo utoben dagiti makapabileg a galad ni Jesus? Panunotem no ania dagiti naaramidannan ken sidadaan nga aramidenna para kenka. No agkararagka, pagyamanam ken padayawam ni Jehova gapu kadagiti naisangsangayan a pamay-an a panangusarna iti Anakna. Bayat nga ar-aramidem dayta, ad-adda nga agtalekka iti kari ni Jesus: “No dumawatkayo iti Ama iti aniaman a banag itednanto dayta kadakayo iti naganko.”—Juan 16:23.

[Footnote]

[Blurb iti panid 13]

Kasapulan nga agkararagtayo buyogen ti ‘isuamin a pusotayo,’ saan a kas iti nakairuaman laeng

[Kahon/Ladawan iti panid 14]

TI NAPATEG NGA AKEM NI JESUS

Tapno maawatam a naan-anay ti akem ni Jesus, usigem ti dadduma kadagiti titulo, galad, ken nagan a tumukoy kenkuana.

Amen.—2 Corinto1:19, 20; Apocalipsis 3:14.

Apostol.—Hebreo 3:1.

Kangrunaan nga Ahente ti Biag.—Aramid 3:15.

Kristo/Mesias.—Mateo 16:16; Juan 1:41.

Agnanayon nga Ama.—Isaias 9:6.

Matalek a Saksi.—Apocalipsis 1:5.

Nasayaat a Pastor.—Juan 10:11.

Ulo ti Kongregasion.—Efeso 5:23.

Nangato a Padi.—Hebreo 4:14, 15.

Emmanuel.—Mateo 1:23.

Ukom.—Aramid 10:42.

Ari.—Apocalipsis 11:15.

Kordero ti Dios.—Juan 1:29.

Maudi nga Adan.—1 Corinto 15:45.

Panguluen.—Mateo 23:10.

Apo.—Juan 13:13.

Manangibabaet.—1 Timoteo 2:5.

Miguel nga Arkanghel.—1 Tesalonica 4:16; Judas 9.

Mannakabalin a Dios.—Isaias 9:6.

Prinsipe ti Kappia.—Isaias 9:6.

Manangisalakan.—Lucas 2:11.

Anak ti Dios.—Juan 1:34.

Anak ti Tao.—Mateo 8:20.

Mannursuro.—Juan 13:13.

Ti Sao.—Juan 1:1.

Nakaskasdaaw a Manangbalakad.—Isaias 9:6.