NAQ KIKʼUTUK li Jesús junelik kiʼaatinak chirix li tijok. Naq li Jesús kiwank saʼ Ruuchichʼochʼ, ebʼ laj Judiiy li nekeʼkʼamok bʼe saʼebʼ li paabʼal nekeʼtijok «saʼatqebʼ li xxuk li kʼayiil». Kʼaʼut naq nekeʼxbʼaanu aʼin? «Re xkʼutbʼalebʼ ribʼ» chiruhebʼ li junchʼol. Nekeʼxbʼaanu aʼin, xbʼaan naq nekeʼraj naq teʼkʼeheʼq xloqʼal. Naabʼal sut nekeʼxye li tij li najt roq, chanchan tawiʼ naq roksinkil li «kʼiila aatin» tixbʼaanu naq li Yos trabʼi li xtijebʼ (Mateo 6:5-8, Li Santil Hu, Sociedad Bíblica de Guatemala, SBG). Li Jesús kixtenqʼahebʼ li kristiʼaan li chaabʼilebʼ xchʼool re xtawbʼal ru naq maakʼaʼ aj e tijok chi joʼkaʼin. Joʼkan naq kixkʼut chiruhebʼ kʼaru inkʼaʼ teʼxbʼaanu naq teʼtijoq.

Li Jesús kixkʼut naq saʼ li qatij tqatzʼaama naq tsantobʼresiiq li xkʼabʼaʼ li Yos, tchalq li Xnimajwal Awabʼejilal ut t-uxq li rajom. Kixkʼut ajwiʼ naq naru naqapatzʼ re li Yos li naʼajmank saʼ li qayuʼam (Mateo 6:9-13; Lucas 11:2-4). Li Jesús kiroksi ebʼ li jaljokil ru aatin re xkʼutbʼal chiqu naq aajel ru naq inkʼaʼ tqakanabʼ tijok, wanq qapaabʼal ut naq tqakubʼsi qibʼ wi naqaj naq li Jehobʼa trabʼi li qatij (Lucas 11:5-13; 18:1-14). Ut, moko kaʼaj tawiʼ kiʼaatinak, kixyuʼami ajwiʼ (Mateo 14:23; Marcos 1:35).

Chʼolchʼo naq li naʼlebʼ aʼin kixtenqʼa ebʼ li xtzolom li Jesús re naq teʼxchaabʼilobʼresi ebʼ li xtij. Saʼ li qʼoqyink naq tkamsiiq, li Jesús kixkʼut chiruhebʼ jun li naʼlebʼ li wank xwankil chirix li tijok.

Saʼ chixjunil li qʼoqyink, li Jesús inkʼaʼ kixkanabʼ xkawresinkil xchʼool ebʼ li xʼapóstol. Aʼin tzʼaqal li hoonal re xyeebʼal rehebʼ jun li akʼ naʼlebʼ. Kixye li Jesús rehebʼ: «Laaʼin li bʼe, li yaal ut li yuʼam. Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ». Moqon, kixwaklesihebʼ xchʼool rikʼin li aatin aʼin: «Chixjunil li teetzʼaama saʼ inkʼabʼaʼ, laaʼin tinbʼaanunq re, re naq li Yuwaʼbʼej taanimaaq xloqʼal rikʼin li Kʼajolbʼej. Wi wank kʼaru teetzʼaama saʼ inkʼabʼaʼ, laaʼin tinbʼaanunq re». Ut saʼ xraqik kixye rehebʼ: «Chalen toj anaqwan maakʼaʼ xetzʼaama saʼ inkʼabʼaʼ. Chextzʼaamanq ut texkʼuluq, re naq tzʼaqalaq re ru li xsahil eechʼool» (Juan 14:6, 13, 14, SBG; 16:24, SBG).

Kʼajoʼ xwankil ebʼ li aatin aʼin! Jun li hu naxye naq aʼin «jun li akʼ naʼlebʼ li kixjal chanru tootijoq». Li Jesús moko yook ta xyeebʼal naq chiru aʼan tootijoq ut maawaʼ chiru li Yos. Kixkʼut bʼan, jun li akʼ naʼlebʼ chanru tootijoq chiru li Jehobʼa.

Chʼolchʼo chiqu naq li Jehobʼa junelik narabʼi li xtij ebʼ laj kʼanjel chiru (1 Samuel 1:9-19; Salmo 65:3). Abʼan, chalen li hoonal naq ebʼ laj Israel keʼsikʼeʼk ru xbʼaan li Yos, chixjunilebʼ li nekeʼraj naq li Yos trabʼi li xtijebʼ tento naq teʼxkʼulubʼa naq ebʼ laj Israel xtenamit li Yos. Moqon, saʼ xkutankil laj Salomón tento xeʼxkʼulubʼa naq kaʼajwiʼ saʼ rochoch li Yos naru nekeʼmayejak (Deuteronomio 9:29; 2 Crónicas 6:32, 33). Abʼan, li loqʼonink aʼin moko junelik ta twanq. Joʼ kixye li apóstol Pablo, li chaqʼrabʼ li kikʼemank rehebʼ laj Israel ut li mayejak li nekeʼxbʼaanu saʼ rochoch li Yos aʼan «yal xmuheel li sahilal toj chaalel, maawaʼ aʼan li tzʼaqal yaal» (Hebreos 10:1, 2, SBG). Li Jesukriist kikanaak choʼq reqaj li yal muheel (Colosenses 2:17). Joʼkan naq, chalen li chihabʼ 33 moko aajel ta chik li Xchaqʼrabʼ laj Moisés re naq toowanq choʼq ramiiw li Jehobʼa. Joʼkan naq, tento tooʼabʼinq chiru li Jesukriist, li kiʼaatinak wiʼ li Chaqʼrabʼ (Juan 15:14-16; Gálatas 3:24, 25).

Li Jesús kixkʼut jun li akʼ naʼlebʼ re naq tootijoq chiru li Jehobʼa. Anaqwan tento tootijoq saʼ xkʼabʼaʼ re naq li Yos toorabʼi. Kʼaʼut naq li Jesús kixbʼaanu aʼin chiqix?

Xbʼaan naq chiqajunilo aj maak, maakʼaʼ naxye kʼaru tqabʼaanu inkʼaʼ naru naqataw rusilal li Yos qajunes (Romanos 3:20, 24; Hebreos 1:3, 4). Naq li Jesús kixqʼaxtesi li xyuʼam saʼ qakʼabʼaʼ, kirisi xwankil li qamaak (Romanos 5:12, 18, 19). Chixjunilebʼ li nekeʼraj wank saʼ amiiwil rikʼin li Jehobʼa ut nekeʼraj tijok chiru, tento teʼxbʼaanu saʼ xkʼabʼaʼ li Jesús ut teʼxpaabʼ naq li Jesús kikamk saʼ xkʼabʼaʼebʼ (Efesios 3:11, 12).

Naq nokootijok saʼ xkʼabʼaʼ li Jesús, naqakʼutbʼesi naq naqapaabʼ oxibʼ li naʼlebʼ li naxbʼaanu li Jesús saʼ li rajom li Yos: 1) Aʼan «li xKarneer li Yos» ut xbʼaan li kixbʼaanu, li Yos naru naxkuy qamaak. 2) Naq kiwaklesiik wiʼ chik chi yoʼyo xbʼaan li Jehobʼa, kixaqabʼaak joʼ «xyuwaʼil aj tij» ut yook xbʼaanunkil chixjunil re naq tqataw rusilal li xkamik. 3) Kaʼajwiʼ aʼan «li bʼe» re naq tooruuq chi tijok chiru li Jehobʼa (Juan 1:29, SBG; 14:6, SBG; Hebreos 4:14, SBG, 15).

Naq nokootijok saʼ xkʼabʼaʼ li Jesús, naqoxloqʼi ru. Wank xwankil xbʼaanunkil aʼin xbʼaan naq li rajom li Jehobʼa aʼan «naq saʼ xkʼabʼaʼ li Jesus teʼxwiqʼibʼ ribʼ chixjunilebʼ [...], ut li junjunq tixchʼolobʼ rikʼin xtzʼuumal re naq li Jesukriist aʼan li Qaawaʼ, re li xnimal xloqʼal li Yos Yuwaʼbʼej» (Filipenses 2:10, 11, SBG). Ut li qʼaxal wank xwankil aʼan naq, naq nokootijok saʼ xkʼabʼaʼ li Jesús naqakʼe xloqʼal li Jehobʼa xbʼaan naq kixkʼe li Ralal re naq tkamq saʼ qakʼabʼaʼ (Juan 3:16).

Li Santil Hu naroksi jalan jalanq li kʼabʼaʼej ut li uuchil kʼabʼaʼej re naq tchʼolaaq chiqu kʼaʼut wank xwankil li xkʼanjel li Jesús. Ebʼ li uuchil kʼabʼaʼej aʼin nokooʼeʼxtenqʼa re xtawbʼal ru chixjunil li chaabʼilal li ak kixbʼaanu li Jesús, li yook xbʼaanunkil ut li tixbʼaanu choʼq qe saʼ li kutan chalk re. (Chaawil li kaaxukuut « Li xkʼanjel li Jesús» ). Kikʼemank re li Jesús «li kʼabʼaʼej qʼaxal nim xloqʼal chiruhebʼ chixjunil li kʼabʼaʼej» li naraj xyeebʼal chixjunil li wankilal li wank saʼ choxa ut saʼ Ruuchichʼochʼ (Filipenses 2:9, SBG; Mateo 28:18). *

Ut wi naqaj naq li Jehobʼa trabʼi li qatij, tento tootijoq saʼ xkʼabʼaʼ li Jesús (Juan 14:13, 14). Ut naq tqabʼaanu, tento naq chʼolchʼooq chiqu kʼaru naraj xyeebʼal aʼin. Kʼaʼut?

Kʼoxla rix aʼin. Naq jun laj yakonel naxtaqla jun li esilhu choʼq aawe, saʼ xraqik junelik naxkʼe ebʼ li aatin «sahil chʼoolejil». Abʼan, usta joʼkan naxtzʼiibʼa, ma naraj xyeebʼal naq naxkʼe xchʼool chaawix malaj yal joʼkan naxraq li xʼesilhu? Li xyaalalil aʼan naq tqoksi li xkʼabʼaʼ li Jesús saʼebʼ li qatij, moko tqabʼaanu ta joʼ naraqmank junaq li esilhu. Usta «junelik» tootijoq tento tqabʼaanu «chi anchal [qa]chʼool» ut inkʼaʼ yal xyeebʼal chi inkʼaʼ tqakʼoxla rix (1 Tesalonicenses 5:17, SBG; Salmo 119:145, SBG).

Naq tootijoq saʼ xkʼabʼaʼ li Jesús, tento toonaʼlebʼaq chirix li xchaabʼil naʼlebʼ ut chirix chixjunil li chaabʼil li ak xbʼaanu ut li naxkʼoxla xbʼaanunkil saʼebʼ li kutan chalk re saʼ qakʼabʼaʼ. Naq tootijoq, toobʼanyoxinq ut tqakʼe xloqʼal li Jehobʼa chirix chanru kiroksi li Ralal. Ut wi joʼkan tqabʼaanu, tkawuuq li qapaabʼal chirix li xyeechiʼom li Jesús: «Li kʼaru teetzʼaama chiru li Yuwaʼbʼej, tixkʼe eere saʼ inkʼabʼaʼ» (Juan 16:23, SBG).