JESU nĩ aarutanaga kaingĩ ũhoro wĩgiĩ mahoya. Matukũ-inĩ ma Jesu, atongoria a ndini ya Kĩyahudi maahoyagĩra “magomano-inĩ ma njĩra.” Nĩkĩ? “Nĩguo monwo nĩ andũ.” Meekaga ũguo tondũ nĩ meendaga kũgucĩrĩria andũ. Aingĩ ao maacokagĩra mahoya maraihu magĩciria atĩ Ngai nĩ ekũmaigua nĩ ũndũ wa “kũhũthĩra ciugo nyingĩ.” (Mathayo 6:5-8) Jesu nĩ oonanirie atĩ mĩtugo ta ĩyo nĩ ya tũhũ, ũndũ ũrĩa wateithirie andũ a ngoro njega kũmenya maũndũ marĩa marabatara gwĩthema rĩrĩa marahoya. Ningĩ nĩ aamarutire ũrĩa maagĩrĩirũo kũhoya.

Jesu aarutanire atĩ mahoya maitũ magĩrĩirũo kuonania atĩ nĩ tũrerirĩria kuona rĩĩtwa rĩa Ngai rĩgĩtherio, Ũthamaki wake ũkĩte, na wendi wake ũgĩkwo. Ningĩ nĩ aarutanire atĩ no tũhoe Ngai ũtũteithie maũndũ-inĩ maitũ. (Mathayo 6:9-13; Luka 11:2-4) Jesu nĩ aarutanire kũgerera ngerekano akĩonania atĩ angĩkorũo nĩ tũrenda mahoya maitũ maiguo, nĩ tũrabatara kũhoya na kĩyo, gũkorũo na wĩtĩkio, o hamwe na wĩnyihia. (Luka 11:5-13; 18:1-14) Ningĩ nĩ aarutanire kũgerera kĩonereria gĩake.—Mathayo 14:23; Mariko 1:35.

Hatarĩ nganja, ũndũ ũcio nĩ wateithirie arutwo a Jesu kwagagĩria mahoya mao. O na kũrĩ ũguo, Jesu nĩ aarutire arutwo ake ũndũ wa bata mũno wĩgiĩ mahoya ũtukũ wake wa mũico gũkũ thĩ.

Jesu aahũthĩrire ũtukũ wake wa mũico gwĩkĩra ngoro atũmwo ake ehokeku. Rĩu rĩarĩ ihinda rĩega rĩa kũmaruta ũndũ mwerũ wĩgiĩ mahoya. Aameerire ũũ: “Nĩ niĩ njĩra na nĩ niĩ ũhoro ũrĩa wa ma na nĩ niĩ muoyo. Gũtirĩ mũndũ ũũkaga kũrĩ Awa atagereire harĩ niĩ.” Thutha-inĩ nĩ aamerĩire ũũ: “Ũndũ o wothe mũrĩhoyaga na rĩĩtwa rĩakwa, nĩ ndĩrĩmũhingagĩria, nĩguo Awa agoocithio kũgerera harĩ Mũriũ. Mũngĩhoya ũndũ o wothe na rĩĩtwa rĩakwa, nĩ ndĩrĩmũhingagĩria.” Akĩrĩkĩrĩria aameerire ũũ: “Gũkinyĩria rĩu gũtirĩ ũndũ o na ũmwe mũhoete na rĩĩtwa rĩakwa. Hoyai na nĩ mũkũheo, nĩguo gĩkeno kĩanyu gĩkinyanĩre.”—Johana 14:6, 13, 14; 16:24.

Ciugo icio ciarĩ cia bata mũno. Ibuku rĩmwe rĩa gũtaarĩria ciugo cia Bibilia riugaga atĩ ũcio warĩ ũgarũrũku mũnene wĩgiĩ ũrĩa twagĩrĩirũo kũhoya. Muoroto wa Jesu ndwarĩ mahoya merekagĩrio kũrĩ we, no nĩ kwambĩrĩria aambĩrĩirie njĩra njerũ ya kũhoya Jehova Ngai.

Nĩ tũĩ atĩ hĩndĩ ciothe Jehova nĩ athikagĩrĩria mahoya ma ndungata ciake njĩhokeku. (1 Samueli 1:9-19; Thaburi 65:2) No rĩrĩa Aisiraeli maatuĩkire andũ athuure nĩ Ngai, mũndũ o wothe ũngĩendire mahoya make maiguo, no mũhaka angĩambire gwĩtĩkia atĩ Aisiraeli maarĩ rũrĩrĩ rũthuure nĩ Ngai. Thutha-inĩ hĩndĩ ya Suleimani, maabatiĩ kuona hekarũ ĩrĩ handũ hathuure ha kũrutĩra Ngai magongona. (Gũcokerithia Maathani 9:29; 2 Maũndũ ma Matukũ ma Tene 6:32, 33) O na kũrĩ ũguo, njĩra ĩyo ya gũthathaiya yarĩ ya ihinda o inini. O ta ũrĩa mũtũmwo Paulo aandĩkire, watho ũrĩa Aisiraeli maahetwo hamwe na magongona marĩa maarutagĩra hekarũ-inĩ maarĩ “kĩĩruru kĩa maũndũ mega marĩa magooka, no ti maũndũ macio mo [mene].” (Ahibirania 10:1, 2) Kĩĩruru kĩu nĩ kĩeherire rĩrĩa ũũma wakinyire. (Akolosai 2:17) Kwambĩrĩria mwaka wa 33 M.M., ũrata wa mũndũ na Jehova ndwehocetie rĩngĩ harĩ gwathĩkĩra Watho wa Musa. Ĩndĩ wĩhocetie harĩ gwathĩkĩra Jesu Kristo.—Johana 15:14-16; Agalatia 3:24, 25.

Jesu nĩ aatũrutire njĩra njega makĩria ya kũhoya Jehova. Rĩu nĩguo mahoya maitũ maiguo, twagĩrĩirũo kũhoya thĩinĩ wa rĩĩtwa rĩa Jesu. Ũndũ ũcio ũhotekaga atĩa?

Tondũ ithuothe tũciarĩtwo na mehia, gũtirĩ ũndũ tũngĩka na gũtirĩ magongona tũngĩruta matũtherie kuumana na mehia kana matũme tũkorũo na kĩhooto gĩa kũgĩa na ũrata hamwe na Jehova, Ngai witũ mũtheru. (Aroma 3:20, 24; Ahibirania 1:3, 4) O na kũrĩ ũguo, Jesu nĩ aarutire muoyo wake mũkinyanĩru na akĩrĩhĩra mehia ma andũ, nĩgetha arĩa monanagia wĩtĩkio harĩ igongona rĩake magĩe na ũrata mwega hamwe na Ngai. (Aroma 5:12, 18, 19) Kwoguo, arĩa othe mendaga kũgĩa na ũrata mwega hamwe na Jehova na gũkorũo na “wĩyathi” wa kũmũhoya, no mũhaka monanie wĩtĩkio harĩ igongona rĩa Jesu na mahoe thĩinĩ wa rĩĩtwa rĩake.—Aefeso 3:11, 12.

Rĩrĩa twahoya thĩinĩ wa rĩĩtwa rĩa Jesu, tuonanagia wĩtĩkio maũndũ-inĩ maya matatũ: (1) Jesu nĩ “Gatũrũme ka Ngai” na kũgerera igongona rĩake, Ngai nĩ atuohagĩra mehia. (2) Nĩ aariũkirio nĩ Jehova na rĩu nĩ “mũthĩnjĩri-Ngai mũnene” na nĩ atigagĩrĩra atĩ andũ othe no magunĩke nĩ igongona rĩke. (3) Nowe wiki “njĩra” ya gũkinyĩra Jehova na mahoya.—Johana 1:29; 14:6; Ahibirania 4:14, 15.

Nĩ tũtĩithagia Jesu rĩrĩa twahoya thĩinĩ wa rĩĩtwa rĩake. Gĩtĩo ta kĩu nĩ kĩagĩrĩru, tondũ wendi wa Jehova nĩ atĩ “thĩinĩ wa rĩĩtwa rĩa Jesu maru mothe magaturio . . . , na nĩmĩ ciothe ciumbũre atĩ Jesu Kristo nĩ Mwathani nĩguo Ngai o we Ithe agoocagwo.” (Afilipi 2:10, 11) No ũndũ wa bata makĩria nĩ atĩ, kũhoya thĩinĩ wa rĩĩtwa rĩa Jesu nĩ kũgoocithagia Jehova, o we ũrĩa warutire Mũrũ wake nĩguo tũgunĩke.—Johana 3:16.

Bibilia nĩ ĩhũthĩrĩte marĩĩtwa ngũrani ma ũnene gũtaarĩria Jesu, na nĩ matũteithagia gũtaũkĩrũo nĩ ũrĩa itemi rĩa Jesu rĩrĩ rĩa bata. Marĩĩtwa macio nĩ matũteithagia gũtaũkĩrũo nĩ maũndũ mothe mega marĩa Jesu atwĩkĩire, marĩa aratwĩkĩra, na marĩa agaatwĩkĩra ihinda rĩũkĩte. (Rora gathandũkũ karĩ na kĩongo “ Itemi rĩa Bata rĩa Jesu.”) Hatarĩ nganja, Jesu nĩ aheetwo “rĩĩtwa rĩkĩrĩte marĩĩtwa marĩa mangĩ mothe.” * Nĩ aheetwo wathani wothe kũrĩa igũrũ o na gũkũ thĩ.—Afilipi 2:9; Mathayo 28:18.

No mũhaka tũhoyage thĩinĩ wa rĩĩtwa rĩa Jesu angĩkorũo nĩ tũrenda Jehova atũthikagĩrĩrie. (Johana 14:13, 14) No tũtingĩenda gũcokeraga ciugo “thĩinĩ wa rĩĩtwa rĩa Jesu” taarĩ o mũtugo tu. Nĩkĩ?

Ta wĩcirie ngerekano ĩno. Rĩrĩa mũhũũri biacara arandĩkĩra mũndũ marũa, kaingĩ arĩkagĩrĩria marũa make na ciugo cia gĩtĩo. No ũguo ti kuuga atĩ nĩ arakenio nĩ mũndũ ũcio kuuma ngoro, ĩndĩ no ciugo cia gĩtĩo akoragwo akĩhũthĩra. Rĩrĩa tũrahũthĩra rĩĩtwa rĩa Jesu mahoya-inĩ, tũtiagĩrĩirũo kũrĩhũthĩra ta ũrĩa ciugo cia gĩtĩo ihũthagĩrũo marũa-inĩ ta macio. O na gũtuĩka nĩ twagĩrĩirũo ‘kũhoyaga hingo ciothe,’ twagĩrĩirũo kũhoyaga ‘na ngoro itũ yothe’ no ti taarĩ o mũtugo tu.—1 Athesalonike 5:17; Thaburi 119:145.

Ũngĩĩthema atĩa kũhũthĩra ciugo “thĩinĩ wa rĩĩtwa rĩa Jesu” taarĩ o mũtugo tu? Na njĩra ya gwĩcũrania igũrũ rĩgiĩ ngumo cia Jesu. Wĩciragie ũhoro wĩgiĩ maũndũ marĩa agwĩkĩire na marĩa endaga gũgaagwĩkĩra ihinda rĩũkĩte. Cokagĩria Jehova ngatho mahoya-inĩ na ũkamũgooca nĩ ũndũ wa ũrĩa ahũthĩrĩte Mũrũ wake na njĩra njega. Weka ũguo nĩ ũrĩkoragwo na ma na kĩĩranĩro gĩkĩ kĩa Jesu: “Ũndũ ũrĩa wothe mũrĩhoyaga Awa, nĩ arĩmũhingagĩria na rĩĩtwa rĩakwa.”—Johana 16:23.