JESUS okwa kala ha hongo ovanhu luhapu kombinga yeilikano. Pefimbo opo, ovakwatelikomesho velongelokalunga lOshijuda, ova li hava ilikana ve li ‘pomashakeneno eendjila.’ Omolwashike? “Opo va monike kovanhu.” Osha yela kutya ova li va hala okukala va hokiwa kovanhu omolwoilonga yavo. Ova li hava ilikana omailikano malemale, nokwa fa outevo, sha fa ngeno kutya, ‘okwiilikana omailikano malemale’ oko kwa pumbiwa, opo va udike. (Mateus 6:​5-8) Jesus okwa li a yemba oshinima sha tya ngaho, nokwa li a kwafela vamwe ovo ve na omitima diwa, va shiive kutya oshike ve na okuhenuka, ngeenge tava ilikana. Ashike nande ongaho, okwa li he va hongo shihapu shihe fi ashike kombinga yaasho vehe na okwiilikana.

Jesus okwa honga kutya, omailikano etu oku na okukala taa ulike kutya otwa halelela okumona edina laKalunga tali yapulwa, Ouhamba waye u uye, nehalo laye li wanifwe. Jesus okwa honga yo kutya, osha yuka okupula Kalunga e tu kwafele moinima yopaumwene. (Mateus 6:​9-​13; Lukas11:​2-4) Okwa longifa efaneko, e tu ulikile kutya otwa pumbwa okwiilikana tashi twikile, tu na eitavelo nelininipiko, opo omailikano etu a udike. (Lukas 11:​5-​13; 18:​1-​14) Nokwa li a pameka ehongo laye noshihopaenenwa osho a tula po. — Mateus 14:23; Markus 1:​35.

Elombwelo olo, oli na okukala la li la kwafela ovahongwa vaJesus va xwepopaleke omailikano avo. Ashike Jesus okwa li a teelela fiyo oufiku waye waxuuninwa kombada yedu, opo a honge ovahongwa vaye oshilihongomwa sha fimanenena, shi na sha neilikano.

Jesus okwa li a longifa onguloshi yaye ya xuuninwa, opo a twe omukumo ovahongwa vaye ovadiinini. Efimbo olo, ola li efimbo liwa okuholola oshinima shimwe shipe. Jesus okwa ti: “Aame ondjila, noshili nomwenyo. Kape na ou te uya kutate, ngeenge ita pitile mwaame.” Lwanima okwe ke va pa eudaneko tali va kwashilipaleke, a ti: “Keshe osho tamu indile medina lange, ohandi shi mu pe, opo Omona a fimanekife Xe. Ngeenge omwa indile sha medina lange, ohandi shi mu pe.” Pexulilo leenghundafana daye, okwa ti: “Fiyo opapa kamu na eshi mwa pula medina lange. Puleni ndele tamu pewa opo mu kale nehafo linene.” — Johannes 14:6, 13, 14; 16:24.

Eendjovo odo oda li dididilikwedi. Embo limwe lomauyelele ola hokolola kutya osho oshi li lela “elunduluko mondjokonona, li na sha neilikano.” Jesus ka li a hala okutya eilikano oli na ngeno okuyukifwa kuye, ponhele yokuyukifa kuKalunga. Ponhele yaasho, okwa li ta ulikile ovanhu onghedi ipe yokuya kuKalunga meilikano.

Osho shiwa unene oshosho kutya, Kalunga okwa kala alushe ha pwilikine komailikano ovapiya vaye ovadiinini. (1 Samuel 1:9-19; Epsalme 65:2) Ashike okudja eshi Kalunga a ninga ehangano lOmhango noshiwana shaIsrael, ovo va li va hala omailikano avo a udike, ova li ve na okudimina kutya Israel oshiwana shaKalunga, sha hoololwa. Nolwanima, okudja pefimbo laSalomo, ova li ve na okukala va dimina kutya otembeli oi li onhele ya hoololwa kuKalunga, yoku mu yambela. (Deuteronomion 9:​29; 2 Omafimbo 6:​32, 33) Ashike onghedi oyo yokulongela Kalunga, oya li ashike yopakafimbo. Ngaashi Omuyapostoli Paulus a shanga, Omhango oyo ya li ya yandjwa kOvaisrael, nomayambo, oo a li haa yambwa potembeli, oya li ashike “omudidimbe woinima iwa oyo tai ke uya, ndele hayo oinima yolela.” (Ovaheberi 10:​1, 2) Omudidimbe ohau kala u lile po oshinima sholela. (Ovakolossi 2:17) Okudja mo 33 O.P., ekwatafano lomunhu naJehova kala li vali le likolelela kokudulika kOmhango yaMoses. Ponhele yaasho, ola li tali likolelele kokudulika kwaau a li e lilwe po kOmhango, Jesus Kristus. — Johannes 15:14-​16; Ovagalati 3:​24, 25.

Jesus okwa li a honga ovanhu onghedi imwe ipe noya denga mbada yokwiilikana, nokuholola kutya oku li kaume e na eenghono, oo ta dulu okuyeulula ondjila yomailikano etu a udike, noku nyamukulwe kuKalunga. Oshike sha kwafela Jesus a katuke monghedi ya tya ngaho ponhele yetu?

Molwaashi atushe otwa dalwa moulunde, kape na oshilonga hatu shi longo, ile eyambo hatu yambe, tali dulu oku tu kosha evangwa olo, ile tali tu pe oufemba wokukala nekwatafano naKalunga ketu omuyapuki, Jehova. (Ovaroma 3:​20, 24; Ovaheberi 1:​3, 4) Ashike Jesus okwa yandja omwenyo waye wa wanenena, nokwa futila po omatimba ovanhu, eshi e va kulila. (Ovaroma 5:​12, 18, 19) Paife aveshe ovo va hala omatimba avo a dimwe po, ove na omhito yokukala ve na omufika wa koshoka koshipala shaJehova, nokuhafela “emanguluko lokupopya” naKalunga, ndele ongeenge ashike ve na eitavelo mekuliloyambo laJesus, nokwiilikana medina laye. — Ovaefeso 3:​11, 12.

Ngeenge hatu ilikana medina laJesus, ohatu ulike eitavelo moinima yopatatu i na sha nonghandangala oyo ta dana mokuwanifwa kwelalakano laKalunga: (1) Oku li “Odjona yaKalunga,” nomatimba otaa dulu okudimwa po omolweyambo laye. (2) Okwa nyumunwa kuJehova, nopaife oku li “omupristeri munene,” oo ta ungaunga nomauwa oo a etifwa kekulilo. (3) Oye aeke “ondjila” omo hatu pitile okuya kuJehova meilikano. — Johannes 1:​29; 14:6; Ovaheberi 4:​14, 15.

Okwiilikana okupitila muJesus, ohashi tumbalekifa Jehova. Etumbaleko la tya ngaho ola yuka, molwaashi ehalo laJehova ololo kutya, keshe shimwe oshi na okutwa “eengolo okupitila medina laJesus, opo omunhu keshe a hepaulule moipafi kutya Jesus Kristus oye Omwene, nopo Kalunga Xe a fimanekifwe.” (Ovafilippi 2:10, 11) Ashike osho sha fimanenena oshosho kutya, okwiilikana medina laJesus ohashi fimanekifa Jehova, oo a yandja Omona waye omolwouwa wetu. — Johannes 3:​16.

Ombiibeli oya longifa omadinafimaneko e lili noku lili, oo tae tu kwafele, opo tu dule okudidilika mo ondodo yaJesus ya tumbala. Osho otashi tu kwafele tu ude ko omauwa mahapu, oo hatu mono, a kanghamena kwaasho Jesus a ninga, osho ta ningi, naasho ta ka ninga omolwetu. (Tala oshimhungu “ Onghandangala ya fimanenena oyo Jesus ta dana” .) Nopehe na omalimbililo, Jesus okwa pewa “edina li dule omadina aeshe.” * Okwa pewa eenghono adishe meulu nokombada yedu. — Ovafilippi 2:9; Mateus 28:18.

Otu na okukala hatu ilikana medina laJesus, ngeenge otwa hala omailikano etu a udike kuJehova. (Johannes 14:13, 14) Ndele inatu hala okukala ashike hatu endulula outumbulilo, “medina laJesus,” shi li ashike onghedindjikilile. Omolwashike mbela?

Diladila kefaneko eli. Ngeenge owa shangelwa onhumwafo yopangeshefa, otashi dulika ya xula noutumbulilo,“Woye,” oo hau tulwa ko alushe. Mbela oto ka kala u udite kutya osho otashi holola lela omaliudo omunangeshefa, ile pamwe ote liufa ashike konghedi? Doshili, okulongifa edina laJesus meilikano okwa pumbwa okukala ku na eityo, ndele hangaashi ashike exulifo lonhumwafo yopangeshefa. Nonande otu na okwiilikana ‘tuhe na edimbuko,’ otu na oku shi ninga “nomutima aushe,” ndele kashi na okukala sha fa onghedindjikilile. — 1 Ovatessalonika 5:​17; Epsalme 119:145.

Ongahelipi to dulu okuhenuka okulongifa outumbulilo, “medina laJesus,” shimha ashike we u pitika po? Omolwashike ito dilonga komaukwatya mawa aJesus? Diladila kwaasho e ku ningila nale, nokwaasho a hala oku ke ku ningila. Ngeenge to ilikana, pandula Jehova noku mu tanga omolwonghedi ya denga mbada omo a longifa Omona waye. Eshi to ningi ngaho, oto ka kala u na elineekelo meudaneko laJesus, olo tali ti: “Ngeenge omwa pula sha Tate, ote ke shi mu pa medina lange.” — Johannes 16:23.