JIISUSIP qinuneq eqqartukulavaa. Taamani juutit upperisarsiornikkut siuttui ‘aqqusinersuit paarlaffiini’ qinusarput. Sooq? “Takoqqusaar­niaannarlutik.” Tassa allanit malugeq­qullutik qinusarput. Inuit amerlasuut oqaatsiminnik uteqattaarillutik qinusarput, isumaqarunarlutik “sivisuumik qinugunik” aatsaat tusarneqas­sallutik. (Matiusi 6:5-8) Jiisusip taamaalilluni inuit eqqortuliorusuttut paasitippai taamatut qinusarneq iluaqutaan­ngitsoq. Qinunermulli tunngatillugu aamma allamik ilinniar­titsivoq.

Jiisusip ilinniar­tippaatigut qinugaangatta Guutip atiata illernarsisin­neqarnissaa, kunngeqarfiata tikiunnissaa piumasaatalu pinissaa pingaar­nerutis­sagigut. Aamma ilinniar­tippaatigut ikioqqulluta qinusin­naasugut. (Matiusi 6:9-13; Lukkarsi 11:2-4) Assersuusior­tarnermigut paasitip­paatigut qinnutigut tusarneqas­sappata upperluta, maniguullutalu qinujuar­tariaqartugut. (Lukkarsi 11:5-13; 18:1-14) Aamma ilinniar­titsissutini nammineq maligas­saalluar­nermigut pikkunar­nerulersittarpaa. – Matiusi 14:23; Makkorsi 1:35.

Jiisusip ilinniar­titaasa taamatut ilinniar­tinneqarnertik qinusar­nerminnut iluaqutigisimassavaat. Qinunermut tunngatillugu ilinniar­titsinermini pingaaruteqar­nerpaaq nunarsuarmiin­nermini unnummi kingullermi aatsaat saqqummiuppaa.

Jiisusip nunarsuarmiin­nermini unnummi kingullermi apustilini aalajaatsut qiimmas­sarniarlugit ilagai. Maannakkut allannguummik oqaluttuun­nissaannut piffissan­ngorpoq. Jiisusi ima oqarpoq: “Uanga tassaavunga ilumoortoq, aqqut inuunerlu. Uakkuinnaq Ataatamut pisoqarsinnaavoq.” Kinguninngua qiimmassarpai ima neriorsorlugit: “Aamma Ataataq Ernermut tunngatillugu qutsissisin­neqarniassammat uanga atinni qinnutigisasi suulluunniit iliuuseris­savakka. Uanga atinni sunaluunniit qinnutigisarsi iliuuserissavara.” Pisumi tamatumani oqaatsit uku naggasiutigai: “Maannamut uanga atinni ataatsimil­luunniit qinnutigisaqarsiman­ngilasi. Qinugussi tunineqassaasi, taava nuannaarnersi tamakkiisuussaaq.” – Johannesi 14:6, 13, 14; 16:24.

Oqaatsit taakku kimeqangaarput. Ujarlerfissiat ilaanni oqaatsit taakku allatut ima oqaatigineqarput: “Qinunermut tunngatillugu allannguut annertooq.” Jiisusip pinngilaa Guutimut qinuneq imminut ingerlatin­neqartalissasoq. Guutimulli qanillinissamut periusissamik nutaamik ammaassivoq.

Nalunngilarput Guutip kiffami aalajaatsut qinnutaat tusarnaar­tuartarai. (Samuelimik 1. 1:9-19; Tussiaat 65:3) Kisianni ukioq Kr.in.si. 1513-imiilli inuit Guutimut qinusartut tamarmik paasisariaqarpaat Israalikkut tassaasut Guutip innuttai. Kingusin­nerusukkut, Saalumuup nalaaniit, Guutip naalaffik Jerusalem­mimiittoq pilliisarfissatut toqqarpaa. (Mosesimik 5. 9:29; Nalunaarsuutit 2. 6:32, 33) Guutisioriaaserli tamanna aamma atagallar­tussaannaavoq. Soorlu Paulusi allattoq, inatsisit Israalikkunnut tunniun­neqartut aamma naalaffimmi pilliisarnerit “tassaapput ajunngitsut nalliuttussat tarraat”. (Hebræerit 10:1, 2) Tamakkua pisussamut ‘tarraan­naapput’. (Kolossimiut 2:17) Ukiorli 33-miit Guutimik pallorfigin­ninnermut Moorsisip inatsisaannut naalattariaqarneq aalajangiisuujun­naarpoq. Paarlat­tuanilli Kristusip Jiisusip inatsisaanut naalanneq aalajangiisuulerpoq. – Johannesi 15:14-16; Galaatiamiut 3:24, 25.

Jiisusi Jehovap qanillineqarsin­naanissaanut nutaamik pitsaanerungaartumik toqqammaviliivoq, aamma ikinngutaal­luartutut pingaarutilittut qinnutigullu Guutimit tusarneqarsin­naaqqullugit akineqarsin­naaqqul­lugillu aqqutis­siuussisutut imminut ilisaritippoq. Suna tunngavigalugu Jiisusi uagut pilluta taama iliorpa?

Tamatta ajortiliulluta inunngoratta suliatta suulluunniit pilliutittalu arlaannaataluunniit ajortaarutitis­sinnaan­ngilaatigut Jehovamullu qanillisis­sinnaanata. (Romamiut 3:20, 24; Hebræerit 1:3, 4) Jiisusilli inuunini naammal­luinnartoq inuiaat ajortaat pillugit pilliutigaa. (Romamiut 5:12, 18, 19) Maannakkut inuk kinaluunniit piumasoq ajortiminik isumakkeerfigineqarusulluni Jehovamut ‘qanoq ilisukkul­luunniit saaffigin­ninnissaminut’ periarfis­saqalerpoq – kisianni aatsaat Jiisusip pilliutaanik upperin­ninnini takutillugulu aqqa tunaartaralugu qinuguni. – Efesossimiut 3:11, 12.

Jiisusip aqqani qinugaangatta ersersit­tarparput Jiisusi pillugu minnerpaamik uku pingasut upperigigut: (1) Jiisusi tassaavoq “Guutip savaaraa”, tassa Jiisusip pilliutaa tunngavigalugu Guutip isumakkeerfigisin­naavaatigut. (2) Jehovamit makitin­neqarpoq, maannakkullu ‘palasiunertut’ pilliutimi nalingata inunnut tamanut iluaqutaanissaa isumagaa. (3) Qinunikkut taanna kisiat aqqutigalugu “Ataatamut pisoqarsinnaavoq”. – Johannesi 1:29; 14:6; Hebræerit 4:14, 15.

Jiisusip aqqani qinugaangatta Jiisusi ataqqinaaser­tarparput. Jiisusip ataqqinaaser­neqarnera pissusis­samisoorpoq, Jehovammi piumasaraa ‘kikkut tamarmik Jiisusip aqqani seeqqum­mertassasut. Qanorluunniillu oqaasillit Jiisusi Kristusi Guutimut Ataatamut ataqqinaataasumik Naalagaasoq kikkut tamaasa tusaatillugit nalunaarutigissavaat.’ (Filippimiut 2:10, 11) Pingaar­neruvorli Jiisusip aqqani qinugaangatta Jehova uagut pilluta ernerminik pilliutiginnittoq ataqqinaasis­sallugu. – Johannesi 3:16.

Jiisusi qanoq qaffasitsigisumik atorfeqartoq paaseqqullugu taassumunnga taaguutit aqqillu assigiin­ngitsorpassuit Biibilimi atorneqarput. Aap, Jiisusi ‘aternit allanit tamanit qutsinnerusumik’ atserneqarpoq. a Qilammi nunarsuarmilu oqartus­saassuseq tamarmi Jiisusimut tunniun­neqarpoq. – Filippimiut 2:9; Matiusi 28:18.

Tassa Jehovamit qinnutigut tusarneqas­sappata Jiisusip aqqani qinusariaqarpugut. (Johannesi 14:13, 14) Oqariaaserli, “Jiisusip aqqani”, isumaa eqqarsaatigil­luarnagu atunngisaan­nassavarput. Sooq?

Una assersuutigeriartigu: Niuertumit allagarsivutit, allakkallu naanerani oqaatsit atorneqakulasut, “inussiar­nersumik inuulluarit”, naggasiutigineqarsimapput. Eqqarsassavit niuertup ilumoorluni misigis­suseqarfigimmatit oqaatsit taakku atorsimagai, imaluunniit niuertup allakkani nalingin­naasumik taama naggaser­tannginnerpai? Niuertup allakkaminik naggasiisar­neranit uagut qinnutitsinnik Jiisusip aqqani naggasiisarnerput tamanit isumaqar­nerungaar­tariaqarpoq. Ilumoorpoq ‘qinujuar­tariaqartugut’, taamaalior­tariaqarpugullu ‘uummatikkut iluunngarluta’ ileqquliutiin­nakkatut pinnata. – Tessaluunikamiunut 1. 5:17; Tussiaat 119:145.

Qanoq ilillutit oqariaaseq, “Jiisusip aqqani”, ileqquliutiin­nakkatut atornaveersaarsin­naaviuk? Soormi Jiisusip pissusii nuannersut eqqarsaatigil­luarukkit? Illit pillutit suliarisimasarpassui iliuusererusutarpassuilu eqqarsaatigikkit. Jehovap ernini nalissaqan­ngilluin­nartumik taamatut atorsimammagu qinunikkut Jehova qutsavigalugulu unnersiutigiuk. Taamaalioruit Jiisusip neriorsuutaanut uunga tatigin­ninnerulissaatit: “Ataataq uanga atikkut sumik qinnuigigussiuk qinnutigisassinnik tunissavaasi.” – Johannesi 16:23.