KEMA Jesús tlamachtiyaya, miakpa kiijtok kenijkatsa moneki timomaijtosej. Ipan nopa tonali, katli tlayakanayayaj ipan religión judía momaijtouayayaj ojtipa. ¿Kenke kiampa kichiuayayaj? Pampa kinekiyayaj “sekinok ma kinitakaj”. Uan kej nopa kiitaskia inijuantij tlauel tlaneltokayayaj uan kintlepanitaskiaj. Miakej tlauel uejkauayayaj kema momaijtouayayaj uan miakpa kiijtouayayaj sanse tlajtoli. Pampa moiljuiyayaj “intla uejkauasej kamatisej” toTeotsij kintlakakilis (Mateo 6:5-8). Jesús kiijtok san tlapik tlen kichiuayayaj, kej nopa kinpaleuik maseualmej katli kuali ininyolo ma kiitakaj tlake amo kinamikiyaya kichiuasej kema momaijtoskiaj. Uan Jesús amo san kiijtok kenijkatsa amo kinamiki timomaijtosej.

Jesús kiijtok kema timomaijtosej moneki tijnextisej tijnekij ma moueyichiua toTeotsij iToka, ma tekichiua iTlanauatijkayo uan ma mochiua tlen ya kineki. Nojkia techmachtik amo kenijki tlaj tijtlajtlanisej toTeotsij tlen techpoloua ipan tonemilis (Mateo 6:​9-13; Lucas 11:​2-4). Uan nojkia kitekiuik tlapoualistli tlen ika technextilik moneki miakpa titlajtlanisej se tlamantli, tijnextisej titlaneltokaj uan amo timoueyimatij tlaj tijnekij Jehová ma techtlakakili (Lucas 11:​5-13; 18:​1-14). Jesús amo san tlamachtik tlen moneki tijchiuasej, ya kiampa kichijki ipan inemilis (Mateo 14:23; Marcos 1:35).

Tlen Jesús kiniljuik itokilijkauaj, kinpaleuik nojua kuali ma momaijtokaj. Kema nechka kimiktiskiaj, Jesús kinmachtik sekinok tlamantli tlen monekiyaya kichiuasej kema momaijtoskiaj.

Nopa youali, Jesús uejkajki kinyolchikajtok itokilijkauaj. Uan kiniljuik se tlamantli tlen tlauel ipati. “Na niojtli [...]. Na niitstok tlen melauak uan nitemakas yolistli yankuik para nochipa. Axaka uelis asis kampa itstok noTata nepa iluikak tlaj axnechneltoka”. Teipa, kinyolchikajki ika tlen kiniljuik: “Uan nochi tlamantli tlen inkitlajtlanisej noTata ipan notoka, niinmechchiuilis pampa na niiKone nijchiua ma kiueyitlalis noTata. Kena, nochi tlen intlajtlanisej ika notekiuejkayo, niinmechchiuilis”. Uan kema ya tlamiskia tlen kiniljuiyaya, kiijtok: “Hasta ama aya tleno inkitlajtlanijtokej noTata ipan notoka. Pero ama xijtlajtlanikaj uan inkiselisej para nelia inyolpaktosej” (Juan 14:​6, 13, 14; 16:24).

¡Tlauel ipati tlen Jesús kiijtok! Se diccionario bíblico kiijtoua nopa “kipatlak kej momajtoyaj momaijtouaj”. Kema Jesús kiijtok nopa tlamantli, amo kinekiyaya kiijtos nama monekiyaya ya tijnojnotsasej kema timomaijtosej uan amo toTeotsij. Ya kinekiyaya kiijtos tlake moneki tijchiuasej tlaj tijnekij tijnechkauisej toTeotsij.

ToTeotsij nochipa kintlakakilijtok kema momaijtouaj itekipanojkauaj katli kineltokaj (1 Samuel 1:​9-19; Salmo 65:2). Kema Jehová kichijki se tlajtolsenkaualistli ininuaya israeleuanij, nochi katli kinekiyayaj ma kintlakakili kema momaijtouayayaj monekiyaya kimatisej Jehová kitlapejpenijtoya altepetl Israel. Uan kema itstoya Salomón, nojkia monekiyaya kineltokasej Jehová kitlapejpenik nopa teokali pampa kinekiyaya nopaya ma kimakakaj tlakajkaualistli (Deuteronomio 9:29; 2 Crónicas 6:​32, 33). Maske kiampa monekiyaya kiueyichiuasej toTeotsij, nopa amo uejkajki. Kej kiijkuilok apóstol Pablo, nopa Tlanauatili tlen kinmakakej israeleuanij uan nopa tlakajkaualistli tlen temakayayaj ipan teokali “elki san keja se ekauilotl tlen techneskayotiliyaya nopa miak kuali tlamantli tlen teipa nelia melauak ualaskia ika Cristo. Pero nopa miak tlanauatili axtemakak tlen melauak” (Hebreos 10:​1, 2). Nopa ekauilotl “kinextik tlen ualaskia teipa” (Colosenses 2:17). Ipan xiuitl 33 kema ya ualajtoya Jesús, tlaj se akajya kinekiyaya kuali mouikas iuaya Jehová, ayokmo monekiyaya kichiuas tlen kiijtouayaya nopa tlanauatili tlen kimakakej Moisés. Nama monekiyaya kineltokas Jesús, tlen nopa tlanauatili kiijtojtoya ualaskia (Juan 15:​14-16; Gálatas 3:​24, 25).

Jesús kichijki se tlamantli tlen techpaleuia ma timonechkauikaj ika Jehová. Ya eli kej se touampo katli kipia miak tetikayotl tlen kichiua toTeotsij ma techtlakakili uan ma kichiua tlen tijtlajtlaniaj kema timomaijtouaj. ¿Kenke Jesús ueli kiampa kichiua?

Nochi titlajtlakolejkej, yeka yon se tlakajkaualistli tlen titemakaskiaj o tlen tijchiuaskiaj, ueliskia kichiuas ayokmo ma tielikaj titlajtlakolejkej. Nojkia amo techpaleuiskia kuali ma timouikakaj iuaya Jehová pampa ya eli tlauel tlatsejtseloltik (Romanos 3:​20, 24; Hebreos 1:​3, 4). Jesús temakak inemilis tlen amo kipia tlajtlakoli uan kiampa kinmakixtik maseualmej (Romanos 5:​12, 18, 19). Tlen Jesús kichijki tlauel techpaleuia, yeka toTeotsij kuali techita uan ueli tijkamanaljuiaj kema titlaneltokaj ipan Jesús imikilis uan tijtekiuiaj itoka kema timomaijtouaj (Efesios 3:​11, 12).

Tlaj tijtekiuiaj Jesús itoka kema timomaijtouaj, tijnextiaj titlaneltokaj ipan eyi tlamantli tlen ika Jehová kitekimakatok: 1) Ya eli “ipilborregojtsi toTeko” pampa imikilis kichiua toTeotsij ma techtlapojpoljui totlajtlakoljuaj. 2) Jehová kiyolkuik uan nama kitekimakatok kej se Sumo Sacerdote tlen uelis kinpaleuis katli tlaneltokaj ipan imikilis. 3) San ya eli kej se ojtli pampa techpaleuia ma timonechkauikaj ika toTeotsij kema timomaijtouaj (Juan 1:29; 14:6; Hebreos 4:​14, 15).

Tijnextiaj tijtlepanitaj Jesús kema tijtekiuiaj itoka kema timomaijtouaj. Ni tlauel ipati pampa Jehová kineki nochi “ma motlankuaketsakaj iixpa Jesús [...]. Uan nochi tlakamej tlen kamatij nochi tlamantli tlajtoli kiijtosej tlamiakapa para Jesucristo, yajaya Dios toueyiTeko, uan ika ya ni kinextisej iueyitilis toTeko toTata” (Filipenses 2:​10, 11). Uan nelnelia tlauel ipati tlaj tijtekiuiaj Jesús itoka pampa kiampa tijueyichiuaj Jehová, katli temakak iKone ma techmakixti (Juan 3:16).

Biblia kitokaxtia Jesús ika sekinok tlajtoli uan tokajyotl, kiampa uelis tijmatisej tlake tekitl kimakatokej. Nochi ni techpaleuia ma tikitakaj tlake tlateochiualistli tijselijtokej ika tlen Jesús kichijki, tlen kichiua nama uan tlen kichiuas teipa. (Xikita nopa recuadro “ Tekitl tlen Jesús kimakatokej” ). Jehová kichijki Jesús “más ueyi que nochi sekinok pampa kimakatok nopa tlanauatili tlen más ueyi”, nopa kiijtosneki kimakatok “nochi tlanauatili ipan iluikak uan ipan Tlaltipaktli” (Filipenses 2:9; Mateo 28:18). *

Kej ya tikitakej, tlaj tijnekij Jehová ma techtlakakili kema timomaijtosej, moneki tijtekiuisej Jesús itoka (Juan 14:​13, 14). Amo tijnekij tikijtosej “ika Jesús itoka” san pampa ya timomatkej kiampa tikijtosej. ¿Kenke amo?

Ximoiljui ipan ni neskayotl: sekij tlanamakanij kintitlaniliaj amatlajkuiloli katli kintlakouiliaj, uan kampa tlami nopa amatlajkuiloli, kiijkuilouaj “nimitsontlajpaloua”. ¿Timoiljuia tlen kiijkuilouaj ipan nopa amatl nelnelia kiyolmatij o san kiijtouaj? Amo tijnekij tijchiuasej kej se tlanamakaketl, tojuantij tijnekij tlauel tijpatiitasej Jesús itoka kema timomaijtouaj uan amo san tijtekiuisej pampa kej nopa timomajtokej. Maske moneki tlauel timomaijtosej ajachika, moneki tijchiuasej ika nochi toyolo uan amo san pampa timomajtokej (1 Tesalonicenses 5:17; Salmo 119:145).

¿Tlake techpaleuis amo san ma timomatikaj tikijtosej Jesús itoka kema timomaijtosej? Ma timoyoliljuikaj ipan nopa kuajkuali tlamantli tlen Jesús kinextia. Nojkia ueliskia timoiljuisej kenijkatsa tlen Jesús kichijki uan tlen kineki kichiuas, techpaleuis kuali ma tiitstokaj. Kema timomaijtosej ma tijtlaskamatilikaj uan ma tijueyichiuakaj Jehová pampa tlauel techpaleuijtok tlen kiiljuijtok ma kichiua iKone. Tlaj kiampa tijchiuasej, techpaleuis ma timotemachikaj ipan tlen Jesús kiijtok: “Nochi tlen inkitlajtlanisej [noTata] ipan notoka, yajaya inmechmakas” (Juan 16:23).