GANTŠI Jesu o be a ruta batho ka thapelo. Mehleng ya gagwe, baetapele ba bodumedi ba Bajuda ba be ba rapela “magahlanong a ditsela tše dikgolo.” Ka baka la’ng? “Gore ba bonwe ke batho.” Go molaleng gore ba be ba nyaka go ratwa ka baka la borapedi bja bona bja go ithola kgwara. Ba bantši ba be ba boeletša dithapelo tše ditelele bjalo ka ge eka ‘go diriša mantšu a mantši’ go be go le bohlokwa e le gore thapelo e kwewe. (Mateo 6:5-8) Jesu o ile a pepentšha mekgwa e bjalo e le ya lefeela, ka go realo a thuša batho ba botegago go tseba seo ba swanetšego go se phema ge ba rapela. Lega go le bjalo, ga se a ba ruta feela tsela yeo ba sego ba swanela go rapela ka yona.

Jesu o rutile gore dithapelo tša rena di swanetše go bonagatša kganyogo ya rena ya go bona leina la Modimo le kgethagatšwa, Mmušo wa Gagwe o e-tla gomme thato ya Gagwe e direga. Le gona Jesu o rutile gore ke mo go swanetšego go kgopela Modimo gore a re thuše ditabeng tša motho ka noši. (Mateo 6:9-13; Luka 11:2-4) A diriša papišo, Jesu o bontšhitše gore re swanetše go phegelela gomme re be le tumelo le boikokobetšo ge e ba re nyaka gore dithapelo tša rena di kwewe. (Luka 11:5-13; 18:1-14) Le gona o ile a gatelela thuto ya gagwe ka mohlala wa gagwe.—Mateo 14:23; Mareka 1:35.

 Ga go pelaelo gore thuto ye e ile ya thuša barutiwa ba Jesu go kaonefatša dithapelo tša bona. Lega go le bjalo, Jesu o ile a leta go ba go fihla bošegong bja gagwe bja mafelelo a le lefaseng gore a nee barutiwa ba gagwe thuto ya bohlokwa ya mabapi le thapelo.

Jesu o feditše karolo e kgolo ya bošego bja gagwe bja mafelelo a kgothatša baapostola ba gagwe. E be e le nako e swanetšego ya gore a utolle selo se itšego se sefsa. Jesu o itše: “Ke nna tsela le therešo le bophelo. Ga go yo a tlago go Tate ge e se ka nna.” Ka morago o ile a ba nea kholofetšo e kgonthišeditšwego ya gore: “Selo le ge e le sefe seo le se kgopelago ka leina la-ka ke tla se dira, e le gore Tate a tagafatšwe ka Morwa. Ge e ba le kgopela selo le ge e le sefe ka leina la-ka, ke tla se dira.” Go ya mafelelong a poledišano ya gagwe le bona, o itše: “Go fihla mo nakong ye, ga se la kgopela selo ka leina la-ka. Kgopelang gomme le tla fiwa, gore lethabo la lena le tlatšwe.”—Johane 14:6, 13, 14; 16:24.

Mantšu a e be e le a bohlokwa kudu. Pukuntšu e nngwe ya Beibele e hlalosa se e le “phethogo e kgolo historing ya thapelo.” Jesu o be a sa bolele gore thapelo e se ke ya lebišwa go Modimo eupša e lebišwe go yena. Go e na le moo, o be a bontšha tsela e mpsha ya go ikgokaganya le Jehofa Modimo.

Ke therešo gore Modimo o be a dutše a theetša dithapelo tša bahlanka ba gagwe ba botegago. (1 Samuele 1:9-19; Psalme 65:2) Lega go le bjalo, ga e sa le go tloga ge Modimo a dira kgwerano le Baisiraele, batho bao ba bego ba nyaka gore dithapelo tša bona di kwewe ba be ba swanetše go dumela gore Isiraele ke setšhaba sa Modimo se se kgethilwego. Le gona ka morago, go tloga mehleng ya Salomo, ba be ba swanetše go dumela gore tempele ke lefelo le le kgethilwego ke Modimo bakeng sa go dira dihlabelo. (Doiteronomio 9:29; 2 Koronika 6:32, 33) Lega go le bjalo, mokgwa wo wa borapedi e be e le wa nakwana. Bjalo ka ge moapostola Paulo a ngwadile, Molao wo o bego o neilwe Baisiraele le dihlabelo tšeo di bego di dirwa tempeleng e be e le “moriti wa dilo tše dibotse tše di tlago go tla, eupša e se wona dilo tšeo ka botšona.” (Baheberu 10:1, 2) Moriti wo o be o swanetše go šuthela selo sa kgonthe. (Bakolose 2:17) Ga e sa le go tloga ka 33 C.E., tswalano ya motho le Jehofa ga e sa ithekgile ka go kwa Molao wa Moše. Go e na le moo, e ithekgile ka go kwa yoo Molao o bego o bolela ka yena—Kriste Jesu.—Johane 15:14-16; Bagalatia 3:24, 25.

Jesu o theile tsela e phagamego ya go batamela go Jehofa, a ipontšha e le mogwera yo matla, yo a re bulelago tsela ya gore Modimo a kwe dithapelo  tša rena le go di araba. Ke’ng seo se dirago gore Jesu a kgone go re direla se?

Ka ge ka moka ga rena re belegetšwe sebeng, ga go selo seo re ka se dirago goba sehlabelo seo re ka se neelago seo se ka re hlwekišago sepatsong se goba sa re nea tshwanelo ya go ba le tswalano le Modimo wa rena yo mokgethwa, Jehofa. (Baroma 3:20, 24; Baheberu 1:3, 4) Lega go le bjalo, Jesu o gafile bophelo bja gagwe bjo bo phethagetšego e le motho gomme a lefelela dibe tša batho ba ka lopollwago. (Baroma 5:12, 18, 19) Ga bjale bohle bao ba nyakago go lebalelwa dibe ba na le sebaka sa go ba le boemo bjo bo hlwekilego pele ga Jehofa le go ba le ‘tokologo ya go bolela’ le Modimo—eupša ge feela ba bontšha tumelo sehlabelong sa Jesu gomme ba rapela ka leina la gagwe.—Baefeso 3:11, 12.

Ge re rapela ka leina la Jesu, re bontšha tumelo bonyenyane dibopegong tše tharo tša karolo ya gagwe go phethagatšweng ga morero wa Modimo: (1) Ke “Kwana ya Modimo,” yeo sehlabelo sa yona se re neago motheo wa tebalelo ya dibe. (2) Jehofa o mo tsošitše bahung gomme ga bjale o hlankela bjalo ka “moperisita yo mogolo” go neeng batho mehola ya topollo. (3) Ke yena feela “tsela” ya go batamela Jehofa ka thapelo.—Johane 1:29; 14:6; Baheberu 4:14, 15.

Go rapela ka leina la Jesu go a mo godiša. Kgodišo e bjalo ke e swanetšego ka gobane thato ya Jehofa ke gore “letolo le lengwe le le lengwe . . . le khuname leineng la Jesu, gomme leleme le lengwe le le lengwe le swanetše go dumela phatlalatša gore Jesu Kriste ke Morena gore go išwe letago go Modimo Tate.” (Bafilipi 2:10, 11) Lega go le bjalo, sa bohlokwa le go feta, go rapela ka leina la Jesu go nea Jehofa letago, e lego yena yo a re neilego Morwa wa gagwe gore a re hole.—Johane 3:16.

E le gore re kwešiše bophagamo bja boemo bja Jesu, Beibele e diriša direto le maina a fapa-fapanego go mo hlalosa. Direto tše le maina di re thuša go kwešiša mehola e mentši yeo re ka e hwetšago motheong wa seo Jesu a se dirilego, seo a se dirago le seo a tlago go re direla sona. (Bona lepokisi le le nago le sehlogo se se rego “ “Karolo ya Bohlokwa ya Jesu”.) Ka kgonthe, Jesu o neilwe “leina le lego ka godimo ga leina le ge e le lefe le lengwe.” * O neilwe matla ka moka legodimong le lefaseng.—Bafilipi 2:9; Mateo 28:18.

Ee, re swanetše go rapela ka leina la Jesu ge e ba re nyaka gore Jehofa a kwe dithapelo tša rena. (Johane 14:13, 14) Eupša ga re nyake go boeletša polelwana “ka leina la Jesu” feela ka gobane e le mokgwa. Ka baka la’ng?

Ela hloko papišo ye. Ge o amogela lengwalo leo le tšwago go rakgwebo, le ka phetha ka mantšu a tlwaelegilego a rego, “wa gago wa potego.” Na o nagana gore polelwana ye e hlalosa kamoo rakgwebo yo a tlogago a ikwa ka gona goba o fo ba a diriša tsela e tlwaelegilego ya go phetha lengwalo? Ka kgonthe, go diriša leina la Jesu dithapelong tša rena go swanetše go ba le morero go e na le gore e fo ba tsela e tlwaelegilego ya go phetha lengwalo. Gaešita le ge re swanetše go “se kgaotše go rapela,” re swanetše go dira bjalo ka ‘dipelo tša rena ka moka,’ e sego ka tsela ya go ithola kgwara.—1 Bathesalonika 5:17; Psalme 119:145.

O ka phema bjang go diriša polelwana “ka leina la Jesu” e le mokgwa feela wa go ithola kgwara? Ke ka baka la’ng o sa naganišiše ka dika tša Jesu tše di ruthetšago pelo? Nagana ka seo a šetšego a se dirile le seo a ikemišeditšego go go direla sona. Ge o rapela, leboga Jehofa gomme o mo tumiše ka baka la tsela e kgahlišago yeo a dirišitšego Morwa wa gagwe ka yona. Ge o dira bjalo, o tla kgodišega kudu ka kholofetšo ya Jesu e rego: “Ge e ba le kgopela Tate selo le ge e le sefe, o tla le nea sona leineng la-ka.”—Johane 16:23.