JESUSQA Diosmanta mañakuymanta ashkhata yachacherqa. Paypa tiemponpi judiospa religionninkuta ñaupajman apajkunaqa, ‘calle esquinaspi sayaykuspa Diosmanta mañakoj kanku’. Chaytataj ruwaj kanku runaswan allinpaj qhawachikunallankupaj. Paykunaqa yuyarqanku “ashkhata parlasqankurayku”, unay unaytataj Diosmanta mañakusqankurayku paywan uyarichikunankuta (Mateo 6:5-8). Jesustajrí nerqa, ajina mañakusqankoqa, qhasilla kasqanta. Ajinamanta runasman yachacherqa mana paykuna jinachu Diosmanta mañakunanku kasqanta. Jinapis orakuymanta waj imastawan yachacherqa.

Jesusqa kay jinata mañakuyta yachacherqa: “Cielopi kashaj Tatayku, sutiyki llimphuchasqa kachun. Gobiernoyki jamuchun. Munayniykitaj ruwasqa kachun”, nispa. Chantá yachachillarqataj Diosmanta yanapata mañakuyta atisqanchejta (Mateo 6:9-13; Lucas 11:2-4). Chantapis Jesusqa Dios uyarinawanchejpaj imaynatachus mañakunata yachacherqa. Payqa iskay kikinchaykunawan yachacherqa Diosmanta llampʼu sonqowan, mana saykʼuspa, paypi creespataj mañakunanchej kasqanta (Lucas 11:5-13; 18:1-14). Jesusqa mana simillamantachu nerqa imaynatachus Diosmanta mañakunata, manaqa pay kikinpuni ajinata mañakorqa (Mateo 14:23; Marcos 1:35).

Jesuspa yachachisqanqa, mayta discipulosninta yanaparqa Diosmanta aswan sumajta mañakunankupaj. Jinapis Jesusqa wañupunanpaj uj chʼisillaña faltashajtin, mañakuymanta uj imatawan yachacherqa.

Jesusqa wañupunan día ñaupaj chʼisin, casi tutantin apostolesninta kallpachasharqa. Chaypachataj Diosmanta mañakuymanta uj imatawan yachacherqa. Pay nerqa: “Noqa ñan kani, cheqa kajtaj, kausaytaj. Mana pipis Tatayman chayayta atinchu, mana noqanejtaqa”, nispa. Chantá nillarqataj: “Sutiypi imallatapis mañakojtiykichejqa, chayta qosqaykichej Tatay noqanejta jatunchasqa kananpaj. Imallatapis sutiypi mañakojtiykichejqa, chayta qosqaykichej”, nispa. Chaymantataj nerqa: “Kunankama mana imatapis sutiypi mañakunkichejrajchu. Mañakuychej japʼinkichejtaj, chaywanqa may kusisqa kankichej”, nispa (Juan 14:6, 13, 14; 16:24).

Jesuspa chay nisqanqa, tʼukunapaj jinapuni. Uj diccionario nin: “Chaymantapacha mañana ñaupajta jinachu Diosmanta mañakuna karqa”, nispa. Chaywanpis Jesusqa mana nisharqachu, chaymantapacha paymanta mañakunanchej kasqanta, Diosmanta mañakunanchejmanta nisqaqa. Astawanpis Jehová Diosmanta mañakunapaj uj mosoj ñanta jina kicharisharqa.

Unaymantapachaña payta tukuy sonqo sirvej kamachisninpaj mañakusqankuta uyarin (1 Samuel 1:9-19; Salmo 65:2). Jinapis aswan qhepaman Israel nacionta llajtan kananpaj ajllakorqa. Chayrayku Diosmanta mañakuyta munajkunaqa, Israel llajtanejta payman chimpananku karqa. Aswan qhepaman rey Salomón templota ruwachejtinrí, israelitaspis, waj runaspis chay temploman rinanku karqa Diosta yupaychaj, uywa wañuchisqasta jaywanankupajpis (Deuteronomio 9:29; 2 Crónicas 6:32, 33). Jinapis Diosta ajinata yupaychayqa uj tiempollapaj karqa. Apóstol Pabloqa israelitaspa leyninkumanta, uywa wañuchisqasta templopi jaywasqankumanta ima, pay nerqa chaykunaqa jamunan karqa “chay sumaj imaspa llanthullan” kasqanta (Hebreos 10:1, 2). Leywan, uywa wañuchisqasta jaywaywanqa chinkapunan karqa (Colosenses 2:17). Chayrayku 33 watamantapacha Jehová Diosman qayllaykunapajqa, manaña Moisespa Leynintachu kasukuna karqa, manachayqa Jesucristota kasukuna karqa. Imaraykuchus Moisespa Leynenqa runasta Jesucristoman pusananpaj karqa (Juan 15:14-16; Gálatas 3:24, 25).

Jesús yachachiwarqanchej imaynatachus Diosmanta mañakunata. Dios mañakuyninchejta uyarinawanchejpajqa, Jesuspa sutinpi mañakunanchej tiyan. Chay jinata mañakuytaj may sumajpuni. ¿Imaraykutaj chayta ninchej?

Tukuyninchej juchasapas kasqanchejrayku, ni ima ruwasqanchej yanapawasunmanchu Diospa ñaupaqenpi allinpaj qhawasqa kanapaj (Romanos 3:20, 24; Hebreos 1:3, 4). Jinapis Jesusqa, mana juchayoj kausayninta, tukuy runaspa juchasninkurayku qorqa. Ajinamanta paypa wañuyninpi creejkunaqa, Diosman chimpayta atinankupaj (Romanos 5:12, 18, 19). Chayrayku Jehová Diosman chimpaykuyta munaspa, paywantaj ‘parlarikuyta’ munaspaqa, Jesuspa wañuyninpi creenanchej tiyan. Paypa sutinpitaj Diosmanta mañakunanchej tiyan (Efesios 3:11, 12).

Jesuspa sutinpi mañakuspaqa, Diospa munaynin juntʼakunanpaj kay kinsa imasta Jesús ruwasqanpi creesqanchejta rikuchinchej. Ñaupaj kaj, Jesús ‘Diospa Corderon’ kasqanpi creenchej. Imaraykuchus paypa wañuyninrayku juchasninchejmanta perdonta tariyta atinchej. Iskay kaj, Jesús ‘kuraj kaj sacerdotenchej’ kasqanpi creenchej. Imaraykuchus pay yanapashawanchej wañuyninnejta bendicionesta japʼinanchejpaj. Kinsa kaj, Jesús ‘ñan kasqanpi’ creenchej. Imaraykuchus paynejllata Jehová Diosmanta mañakuyta atinchej (Juan 1:29; 14:6; Hebreos 4:14, 15).

Jesuspa sutinpi mañakuspaqa, payta jatunchanchej. Jehová Diospunitaj munan ‘Jesuspa sutinpi tukuy qonqorikunankuta’. ‘Tukuyninkutaj runaspa ñaupaqenpi ninankuta Jesucristo Señor kasqanta. Ajinamanta Tata Dios jatunchasqa kananpaj’ (Filipenses 2:10, 11). Astawanpis Jesuspa sutinpi mañakuspaqa, Jehová Diosta jatunchanchej. Paymin Wawanta noqanchejrayku wañunanpaj kachamorqa (Juan 3:16).

Imastachus Jesús noqanchejrayku ruwasqanta yachanapaj, Bibliaqa ashkha sutista paymanta oqharin. Chay sutistaj ima bendicionestachus paynejta japʼinapaj yanapawanchej. Jesusqa sumaj imasta ruwarqa, ruwashan, aswan qhepamanpis ruwallanqapuni. (“ ¿Ima llankʼaykunatataj Jesús ruwan?” nisqa recuadrota leeriy). Jehová Diosqa, Jesusman “tukuy sutismanta aswan patapi kaj sutita qorqa”, nisunman ‘tukuy atiyta cielopi, jinallataj kay jallpʼapipis’ (Filipenses 2:9; Mateo 28:18). *

Yachakunchej jina, Jehová Dios mañakusqanchejta uyarinawanchejpajqa, Jesuspa sutinpi tukuchananchej tiyan (Juan 14:13, 14). Mana allinchu kanman costumbreraykulla “Jesuspa sutinpi” ninanchej. ¿Imajtintaj mana allinchu?

Kaypi piensarina. Pillawanpis tinkuspaqa, “imaynalla kashanki” nispa saludarinchej. Jinapis chayta nispaqa, mana imaynachus kashasqanta yachayta munaspapunichu tapurishanchej, manaqa saludarishallanchej. Chayta niytaj uj costumbrella. Mañakushaspa “Jesuspa sutinpi” neyqa, mana chayman rijchʼakunanchu tiyan. “Mana saykʼuspa” mañakunanchej kajtinpis, “tukuy sonqo” Diosmanta mañakunanchej tiyan, manataj costumbreraykullachu (1 Tesalonicenses 5:17; Salmo 119:145).

Jesuspa sutinpi mañakushaspaqa, imaynachus pay kasqanpi piensarinanchej tiyan. Manataj costumbreraykullachu “Jesuspa sutinpi” ninanchej tiyan. Astawanpis imastachus pay noqanchejrayku ruwasqanpi, imastachus pisimantawan ruwananpi ima, piensarinanchej tiyan. Jehová Diosmanta mañakushaspa, Wawannejta yanapawasqanchejrayku payman agradecekuna, jatunchanataj. Chayta ruwaspaqa Jesuspa kay nisqanpi astawan creesun: “Imallatapis Tataymanta sutiypi mañakojtiykichejqa, pay qosonqachej” (Juan 16:23).