YESU kanandi wasambizanga vakukwaskana ndi pempheru. Po Yesu wenga pacharu, alongozgi achisopa cha Chiyuda apempheriyanga “mumphatukanu za misewu yikuluyikulu.” Yiwu achitanga venivi “kuti ŵanthu aŵawonengi.” Tikayika cha kuti apenjanga kuti ŵanthu akambengi kuti yiwu mbakupemphera ukongwa. Anandi apempheranga mapempheru ngatali ndipu awerezangawerezanga waka mazu. Achitanga nge kuti Chiuta watuvwa mapempheru nga “mazu . . . nganandi” pe. (Mateyu 6:5-8) Yesu wanguvumbuwa pakweru kuti kuchita venivi kulivi phindu. Venivi vinguwovya ŵanthu a mtima wamampha kuti aziŵi vo akhumbika cha kuchita pakupemphera. Kweni iyu wangusambiza venivi pe cha.

Yesu wangusambiza so kuti mapempheru ngidu ngalongongi kuti tikhumbisiska kuti zina laku Chiuta litowi, Ufumu Waki uzi ndipuso kuti khumbu Laki lichitiki. Yesu wangukamba so kuti palivi suzgu kupempha Chiuta vo tikhumba. (Mateyu 6:9-13; Luka 11:2-4) Mwakugwiriskiya ntchitu ntharika, Yesu wangulongo kuti asani tikhumba kuti Chiuta wamukengi mapempheru ngidu, titenere kupempha mwachitatata, titenere kuja ndi chivwanu kweniso titenere kuja akujiyuyuwa. (Luka 11:5-13; 18:1-14) Vinthu venivi vo iyu wangusambiza, ndivu so wachitanga.—Mateyu 14:23; Mariko 1:35.

Tikayika cha kuti vo Yesu wangusambiza akusambira ŵaki, vinguŵawovya kuti ayambi kupemphera mapempheru ngakuvwika umampha. Kweni pa usiku waki wakumaliya, Yesu wanguŵasambiza chinthu chinyaki chakukhumbika ukongwa pa nkhani ya pempheru.

Pa usiku waki wakumaliya, Yesu wanguchiska akusambira ŵaki kwa nyengu yitali. Iyu wanguwona kuti nyengu yeniyi ndiyu yenga yakwenere kuti waŵavumbuliyi chinthu chinyaki chasonu. Yesu wangukamba kuti: “Ini ndini nthowa, uneneska ndi umoyu. Palivi munthu yo watuza kwa Ada kwambula kuziya mwaku ini.” Pavuli paki iyu wanguŵalayizga kuti: “Chechosi cho mungapempha mu zina langu, ndazamuchita, kuti Ada akankhuskiki kuporote mu Mwana. Chechosi cho mungapempha mu zina langu, ndazamuchita.” Wati waja kamanavi kumaliza kukambiskana nawu, wanguti: “Mpaka sonu panu mwechendapemphepu kanthu chinanga nkhamoza mu zina langu. Pemphani ndipu mulondiyengi, kuti likondwa linu liŵi likulu ukongwa.”—Yohane 14:6, 13, 14; 16:24.

Mazu yanga ngenga ngakukhumbika ukongwa. Buku linyaki lo likonkhoska nkhani za mu Bayibolu, likamba kuti yapa “vinthu vingusintha pa nkhani ya pempheru.” Kumbi Yesu wang’anamuwanga kuti ŵanthu aleki kupemphera kwaku Chiuta ndipu mumalu mwaki ayambi kupemphera kwaku iyu? Awa! Yapa iyu wajulanga nthowa yasonu yakufikiya kwaku Yehova Chiuta.

Mbuneneska kuti Chiuta wakwamba kali kuvwa ndipuso kumuka mapempheru nga ateŵeti ŵaki akugomezgeka. (1 Samuyeli 1:9-19; Salimo 65:2) Kweni tikhumbika kuziŵa kuti Chiuta wati wachita phanganu ndi Ayisirayeli, munthu wakhumbikanga kuzomereza kuti Ayisirayeli ndi mtundu wakusankhika nadi ndi Chiuta kuti mapempheru ngaki ngamukikengi. Pavuli paki, kutuliya mu nyengu yaku Solomoni, munthu wakhumbikanga kuzomereza kuti nyumba yakusopiyamu ndingu malu ngo Chiuta wakuzomereza kuti kuperekekiyengi sembi. (Dotoronome 9:29; 2 Mbiri 6:32, 33) Kweni ndondomeku yeniyi yo Chiuta wangujalikiska yenga ya kanyengu kamanavi. Nge mo wakutumika Paulo wangukambiya, Dangu lo linguperekeka kwa Ayisirayeli kweniso sembi zo zaperekekanga panyumba yakusopiyamu, venga “vinthu chayivu cha, kweni . . . chithuthuzi ŵaka cha vinthu vamampha vo vituza.” (Aheberi 10:1, 2) Mwaviyo, chithuthuzi chenichi chakhumbikanga kuti chituwepu kuti vinthu chayivu viyambi kugwira ntchitu. (Akolose 2:17) Kutuwa mu 33 C.E., munthu wakhumbika so kulondo Dangu laku Mozesi cha kuti waje pa ubwezi ndi Chiuta. Mumalu mwaki wakhumbika kuvwiya Yesu Khristu, chifukwa Dangu likutilongozge kwaku iyu.—Yohane 15:14-16; Agalatiya 3:24, 25

Yesu wangujalikiska nthowa yapachanya ukongwa yakufikiya kwaku Yehova. Iyu wangujilongo kuti ndi bwezi lanthazi ukongwa lo lititijuliya nthowa kuti mapempheru ngidu ngafikengi kweniso ngamukikengi ndi Chiuta. Ntchifukwa wuli Yesu ngwakwenere kuchita venivi?

Pakuti isi te akubuda, palivi vo tingachita ndipuso tingajipereke cha sembi yo yingatowesa maubudi ngidu ndi kutiwovya kuti tije pa ubwezi ndi Yehova Chiuta yo ngwakupaturika. (Aroma 3:20, 24; Aheberi 1:3, 4) Kweni Yesu wakupereka umoyu waki wo wenga wakufikapu kuti watiwombo ku ubudi. (Aroma 5:12, 18, 19) Chifukwa cha venivi, sonu ŵanthu angagowokereka maubudi ngawu ndi kuja pa ubwezi wamampha ndi Yehova kweniso angaja ndi “wanangwa . . . wakulongoro” ndi Chiuta asani ŵe ndi chivwanu mu sembi yaku Yesu ndipuso apemphera mu zina laki.—Aefeso 3:11, 12.

Asani tipemphera mu zina laku Yesu tilongo kuti te ndi chivwanu pa vigaŵa vitatu ivi vo wachita pa udindu waki wakufiska khumbu laku Chiuta: (1) Iyu ndi “Mwanawambereri waku Chiuta,” ndipu sembi yaki yititiwovya kuti tigowokerekengi maubudi. (2) Iyu wanguyuskika ndi Yehova ndipu sonu wateŵete nge “wasembi mura” ndipu watovya kuti taŵanthu tiyanduwengi ndi sembi yaki. (3) Iyu pe ndiyu “nthowa” yakufikiya kwaku Yehova asani tipemphera.—Yohane 1:29; 14:6; Aheberi 4:14, 15.

Tilongo kuti tipereka ulemu kwaku Yesu asani tipemphera mu zina laki. Ulemu wenuwu ngwakwenere chifukwa Yehova wakhumba “kuti mu zina laku Yesu, gongonu lelosi lijikami . . . , ndipuso kuti lilimi lelosi lizomerezi pakweru kuti Yesu Khristu ndiyu Ambuya, vo vichitiskengi kuti Chiuta, Ada wakankhuskiki.” (Afilipi 2:10, 11) Kweni chakukhumbika ukongwa ntchakuti asani tipemphera mu zina laku Yesu tikankhuska Yehova yo wakupereka Mwana waki kuti isi tiyanduwi.—Yohane 3:16.

Bayibolu le ndi mazina nga udindu ngakupambanapambana ngaku Yesu, ndipu venivi vititiwovya kuvwisa ntchitu yakukhumbika yo wenayu. Vititiwovya so kuvwisa vitumbiku vo tisaniya chifukwa cha vo Yesu wakutichitiya, vo watitichitiya ndipuso vo wazakutichitiya. (Wonani bokosi lakuti  “Yesu Wafiska Udindu Wakhumbika Ukongwa” papeji 14.) Mphaki kuti Yesu wakupaskika “zina lo liluska mazina nganyaki ngosi.” * Mazaza ngosi pacharu ndipuso kuchanya ngakuperekeka kwaku iyu.—Afilipi 2:9; Mateyu 28:18.

Mbuneneska kuti tikhumbika kupemphera mu zina laku Yesu asani tikhumba kuti Yehova wamuki mapempheru ngidu. (Yohane 14:13, 14) Kweni tikhumbika kuphwere kuti tingazumbuwanga waka mazu ngakuti “mu zina laku Yesu” nge kalusu cha. Ntchifukwa wuli tikamba viyo?

Ŵanaŵaniyani chakuwoniyapu ichi. Asani munthu yo wachita bizinesi kweni ndi mubali winu cha wangakulembiyani kalata, wangamaliza ndi mazu ngakuti “ndini winu ngana.” Kumbi muwona kuti mazu ngenanga ngakutuliya nadi pasi pa mtima, pamwenga wangalemba waka chifukwa ndimu tilembe makalata? Mwawonatu, asani tikamba mazu ngakuti “mu zina laku Yesu” ngakhumbika kutuliya pasi pamtima mumalu mwakungakamba waka nge mo ŵanthu achitiya ndi makalata. Chinanga kuti tikhumbika ‘kupemphera nyengu zosi,’ kweni tikhumbika kuchita venivi ndi “mtima . . . wosi” mumalu mwa dangu waka.—1 Atesalonika 5:17; Salimo 119:145.

Kumbi mungachita wuli kuti muleki kuzumbuwa mazu ngakuti “mu zina laku Yesu” mwadangu waka? Mukhumbika kuŵanaŵaniya mijalidu yamampha yaku Yesu. Ŵanaŵaniyani vo iyu wakuchita ndipuso vo wakuchitiyeningi. Muchipemphera, mumuwongengi Yehova ndipuso mumuthamikengi chifukwa cha mo wakumugwiriskiya ntchitu Mwana waki. Kuchita venivi kukuwovyeningi kuti muleki kukayikiya layizgu laku Yesu lakuti: “Asani mupempha chinthu chechosi kwa Ada azakukupaskani mu zina langu.”—Yohane 16:23.