NDAŴI syejinji Yesu ŵajiganyaga ya kupopela. Mu ndaŵi jakwe, achimlongola ŵa dini ŵapopelaga ali ajimi “mmalekano ga misewu ja mmisinda.” Ligongo chichi? Ŵatendaga yeleyi kuti “ ŵandu ŵawoneje, NWT,” soni kuti ali ŵakupopela mnope. Ŵajinji ŵapelekaga mapopelo gelewulewu, ŵawilisyaga maloŵe, mpela kuti “kuchuluya maloŵe” pakupopela ni kwampaka kumtendekasye Mlungu kupikana mapopelo gawo. (Mateyu 6:5-8) Yesu ŵaŵechete kuti mapopelo mpela gelega gali gangasosekwa. Yeleyi yakamuchisye ŵandu kumanyilila yakusosekwa kuŵambala pakupopela. Nambotu jwalakwe nganagamba kwajiganya ŵandu yakusosekwa kuŵambala pakupopela.

Yesu ŵajiganyisye kuti mapopelo getu galosyeje kuti, tukuchimbichisya lina lya Mlungu, kulosya kuti Uchimwene wakwe uyiche, soni kuti kusosa kwakwe kutendekwe. Jwalakwe ŵajiganyisyesoni kuti tukusosekwa tumŵendeje Mlungu kuti atukamuchisye pa yatukusosechela pa umi wetu. (Mateyu 6:9-13; Luka 11:2-4) Yesu ŵasasile yisyasyo, pakusaka kutukamuchisya kuti naga tukusaka kuti Mlungu apikane mapopelo getu tukusosekwa kulimbichila, kukola chikulupi soni kuŵa ŵakulinandiya. (Luka 11:5-13; 18:1-14) Yesu nganagambaga kwiganya ya kupopela, nambo alisoni chisyasyo chambone panganiji.—Mateyu 14:23; Maliko 1:35.

Mwangakayichila yaŵasasile Yesu panganiji, yakamuchisye ŵakulijiganya ŵakwe kuti mapopelo gawo gaŵeje gambone mnope. Nambopetu, Yesu jwajembecheye mpaka chilo chakumalisya cha umi wakwe pachilambopa kuti ŵajiganye ŵakulijiganya ŵakwe yindu yakusosekwa mnope pakupopela.

Chilo chakumalisya cha umi wakwe, Yesu jwamalile ndaŵi jejinji ali mkwalimbikasya ŵandumetume ŵakwe ŵakulupichika. Jelejitu jaliji ndaŵi jambone jakuti ŵasalile kandu kane kasambano. Jwalakwe jwatite, “Une ndili litala, usyesyene, ni umi, pangali mundu jwakwawula kwa Atati akaŵe kupitila mwa une basi.” Kaneko jwatesile chilanga chakusosekwa chakwasimichisya kuti, “Tinjitenda chilichose tichachiŵenda mu lina lyangu, mwakuti lumbili lwa Atati tiluchiwoneka kupitila mwa Mwanache. Naga akuŵenda chilichose mu lina lyangu, une tinjichitenda.” Chakumbesi kwa yakambilana yawo, jwalakwe jwatite, “Mpaka sambano jino jemanja nganimŵenda chilichose mu lina lyangu, mŵende nipo timchipochela, kuti chisangalalo chenu chiŵe chakwanila mnope.”—Yohane 14:6, 13, 14; 16:24.

Maloŵe gelega galiji gakusosekwa mnope. Buku jine jagopolela maloŵe ga m’Baibulo jikusasala kuti, pelepa ni “payachenjele yindu pangani ja lipopelo.” Yesu nganagopolelaga kuti ŵandu aleche kupopela kwa Mlungu ni kupopelaga kwa jwalakwe. M’malo mwakwe, jwaliji mkwasalila kuti ŵandu pakupopela kwa Yehofa Mlungu akusosekwa kutenda yeleyi kupitila mwa jwalakwejo.

Chakusangalasya chili chakuti ndaŵi syosope, Yehofa aŵele ali mkupikanila mapopelo ga ŵakutumichila ŵakwe. (1 Samuele 1:9-19; Salimo 65:2) Nambope, kutandila pandaŵi jele Mlungu ŵatesile chilanga ni Aisalaeli, wosope ŵaŵasakaga kuti Mlungu apikaneje mapopelo gawo ŵasosekwaga kukulupilila kuti Aisalaeliwo ŵaliji mtundu wapajika wele Mlungu ŵawusagwile. Kaneko kutandila mundaŵi ja Solomoni, ŵasosekwaga kwitichisya kuti Nyumba ja Mlungu galiji malo gele gasagulidwe kuti gaŵe gakupelechela mbopesi. (Detulonomo 9:29; 2 Mbili 6:32, 33) Nambope yeleyi yaliji yakandaŵi. Mpela muŵaŵechetele ndumetume Paulo, chilamusi chichapelechedwe kwa Aisalaeli soni mbopesi siŵapelekaga yaliji “chiwulili cha upile wele wawulimkwisawo, ngaŵaga upile usyesyene.” (Ahebeli 10:1, 2) Chiwulilichi chasosekwaga kwinjilidwa m’malo ni upile usyesyene. (Akolose 2:17) Kutandila mu 33 C.E., ŵandu nganasosekwaga kukuya Chilamusi cha Mose kuti aŵe paunasi ni Yehofa. Mmalo mwakwe ŵasosekwaga kumpikanila Klistu Yesu. Yaliji myoyo ligongo lyakuti Chilamusi chagambile kuŵa chakwalongolela ŵandu kwa Yesujo.—Yohane 15:14-16; Agalatiya 3:24, 25.

Yesu ŵatamilikasisye litala lyasambano lyakupopelela kwa Yehofa. Mwamti jwalakwe jwasasile kuti ali mjetu jwamachili, jwakusawugula litala kuti Mlungu apikane soni kwanga mapopelo getu. Ana chichi chachamtendekasisye Yesu kutenda yeleyi?

Mbopesi syatukusapeleka nganisiŵa sityosisye ulemwa wetu kapena kututendekasya kuŵa paunasi ni Yehofa Mlungu jwetu, jwali jwamswela. (Aloma 3:20, 24; Ahebeli 1:3, 4) Yesu ŵapeleche umi wakwe wamlama nikwawombola ŵandu ŵakusasaka kuŵa paunasi ni Mlungu. (Aloma 5:12, 18, 19) Myoyo ŵandu wosope ŵakusaka kukululuchidwa ulemwa wawo, akwete upile wakuŵa paunasi wambone ni Mlungu, soni kusangalala ni ‘ufulu wakuŵecheta” ni Mlungu. Nambo yeleyi yili yakomboleka naga tukusakulupilila mbopesi ja Yesu soni kupopela kupitila mu lina lyakwe.—Aefeso 3:11, 12.

Patukupopela mu lina lya Yesu, tukusaŵa tuli mkwitichisya kuti jwalakwe akusakwanilisya yakulinga ya Mlungu m’matala gatatu aga, (1) Jwalakwe ali “Mwanache Jwangondolo jwa Mlungu,” jwele mbopesi jakwe jikusatendekasya kuti tukululuchidwe ulemwa wetu. (2) Yehofa ŵamjimwisye ku ŵawe soni kuti apano ali “jwamkulungwa jwa ŵakutaga mbopesi,” jwakutukamuchisya kuti tupindule ni mbopesi jakwe. (3) Jwalakwe jika ali “litala” lyakutuyikasya kwa Yehofa mwipopelo.—Yohane 1:29; 14:6; Ahebeli 4:14, 15.

Kupopela mu lina lya Yesu kukusalosya kuti tukusamchimbichisya jwalakwe. Kusala yisyene tukusasosekwa kumchimbichisya Yesu ligongo lyakuti chakulinga cha Yehofa chili chakuti “pakupikana lina lya Yesu yakupanganyidwa yosope . . . , tiyitindiŵale . . . , yosope tiyijitichisye kuti Yesu Klistu ali Ambuje, nipo pakutenda myoyo yichimbichisye Atati ŵakwinani.” (Afilipi 2:10, 11) Nambope chakusosekwa mnope chili chakuti patukupopela mu lina lya Yesu tukusamchimbichisya Yehofa, juŵapeleche Mwanagwe kuti yindu yitujendele chenene.—Yohane 3:16.

Baibulo jikusakamulichisya masengo maloŵe gakulekanganalekangana gakumchimbichisya Yesu pakusaka kutukamuchisya kuti tupikanichisye ya udindo wekulungwa wakwete. Yeleyi yikusatukamuchisya kumanyilila ya upile watukusapata ligongo lya yindu yaŵatutendele, yakututendela, soni yachachitutendela. (Alole libokosi lyakuti “ Udindo Wakusosekwa Mnope wa Yesu” .) Kusala yisyene, Yesu ŵapegwile “lina lyakupunda mena gosope.” * Mwamti ulamusi wosope kwinani ni pachilambo chapasi wapegwile kwa jwalakwe.—Afilipi 2:9; Mateyu 28:18.

Yili yisyene kuti tukusosekwa kupopela mu lina lya Yesu kuti Mlungu apikane mapopelo getu. (Yohane 14:13, 14) Nambo ngatukusosekwa kwambaga kuwilisya maloŵe gakuti “mu lina lya Yesu” ligongo lyakuti twasyoŵelele. Ligongo chichi?

Kwende tukambilane chisyasyo achi. Patupochele chikalata, kaŵilikaŵili chikusamala ni maloŵe gakuti “une ndili.” Ana akuganisya kuti maloŵega gakusalosya nganisyo sya mundu jwalembile chikalatajo kapena ligongo lyakuti ŵandu ŵasyoŵelele kalembe keleka? Yeleyi yikulosya kuti tukusosekwa kukamulichisya masengo lina lya Yesu pakupopela pa magongo gakupikanika, ngaŵa mpela maloŵe gatukusalemba kumbesi kwa chikalata. Atamose kuti tukusosekwa “kupopela mwangalechesya,” nambo tukusosekwa kutenda yeleyi ni ‘mtima wetu wosope,’ ngaŵa mwachisyoŵepe.—1 Atesalonika 5:17; Salimo 119:145.

Ana mpaka tuŵambale chamtuli kukamulichisya masengo mwachisyoŵepe maloŵe gakuti “mu lina lya Yesu”? Uli ngaganichisya kaje ndamo syambone sya Yesu? Mpaka aganichisye yindu yatutendele, nambosoni yakusaka kututendela. Mpaka am’yamichile Yehofa ligongo lyakutupa Mwanache jwakwe. Pakutenda yeleyi chachiyiwona kuti yaŵasasile Yesu yili yakuwona. Pajatu jwalakwe ŵasasile kuti, “Atati ŵangu tachimpa chilichose chitimchiŵenda mu lina lyangu.”—Yohane 16:23.