Xiñee risaca iquiiñenu lá Jesús para guni orarnu Dios

DXI guyuu Jesús lu Guidxilayú nabé bisiidiʼ binni de oración. Ne ca dxi que la? ca xaíque yuʼduʼ stiʼ ca judíu que nabé biʼniʼ orarcaʼ «lu calle». Xiñee bíʼnicabe zaqué yaʼ. «Para guʼya binni» laacabe. Ni gucaláʼdxicabe nga guʼyaʼ binni rúnicabe ni na religión stícabe. Stale de laacabe nabé ziuulaʼ bíʼnicabe oración ne ngueca ca ngueca guníʼcabe, casi ora caquiiñeʼ guiníʼcabe «stale diidxa» para gucaadiaga Dios oración stícabe (Mateo 6:5-8). Jesús guníʼ pur gana si modo biʼniʼ ca xaíque yuʼduʼ que, ne zaqué bisiidibe binni ximodo nga cadi jneza guni orar. Peru laabe, cadi bisiidisibe ximodo nga cadi naquiiñeʼ gaca orar.

Jesús bisiidiʼ naquiiñeʼ gusihuínninu lu ca oración stinu racaláʼdxinu guisaca lá Dios, gueeda Reinu stibe ne gaca ni nabe. Laaca bisiidibe laanu zanda guinábanu Jiobá gacané laanu lu xiixa ni caquiiñenu (Mateo 6:9-13; Lucas 11:2-4). Laaca biquiiñebe ejemplu para bisiidibe laanu, ne bisiénebe caquiiñeʼ gápanu fe, cadi gudxíʼbanu laaca laanu ne cadi gusaananu de guinábanu ni caquiiñenu para gucaadiaga Jiobá oración stinu (Lucas 11:5-13; 18:1-14). Ne cadi bisiidisibe binni guni zacá, sínuque laapebe biluiʼbe laanu ximodo gúninu (Mateo 14:23; Marcos 1:35).

Guiráʼ ni bisiidiʼ Jesús que gucaneni ca discípulo stibe gánnacaʼ ximodo guni orarcaʼ. Neca biʼniʼ Jesús zacá la? guleza gueelaʼ ante gati que para gusiidiʼ  chaahuibe laacaʼ ximodo peʼ naquiiñeʼ guni orarcaʼ.

«Bidxaa modo biʼniʼ orar binni Dios»

Jesús guyuu ra nuu ca discípulo stiʼ casi guidubi gueela ante gati que para guluube gana laacaʼ. Ne gueela que nga bisiidibe laacaʼ xiixa nacubi purtiʼ maʼ chigátibe. Gúdxibe laacaʼ ca diidxaʼ ni cá lu Juan 14:6 ra na: «Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa». De racá gúdxibe laacaʼ: «Intiica cosa guinábatu ne iquiiñetu laʼyaʼ la? zudiee ni laatu, ti zacá guisaca lá bixhozeʼ pur naa. Pa guinábatu xiixa ne iquiiñetu laʼyaʼ la? zuneʼni». Ne ora maʼ zilúxebe gúdxibe laacaʼ: «Dede yanna qué huaquiiñetu laʼyaʼ para guinábatu xiixa. Laguinabaʼ zacaatu, ti zacá guizaa guendanayecheʼ stitu» (Juan 14:13, 14; 16:24, NM).

¡Aque risaca ca diidxaʼ riʼ xa! Ti diccionariu ni rusiene de Biblia na, ne ca diidxaʼ ca bihuinni «bidxaa modo biʼniʼ orar binni Dios». Peru cadi guníʼ diʼ Jesús maʼ laa nga naquiiñeʼ guni orar binni ne cadi Dios diʼ, sínuque biluiʼbe ximodo zanda guidxiña binni Jiobá yanna.

Ni dxandíʼ nga, maca huacaadiaga Dios oración ni runi ca xpinni ni ruzuubaʼ stiidxabe (1 Samuel 1:9-19; Salmo 65:2). Peru dede dxi bíʼnibe ti pactu ne guidxi Israel la? guiráʼ binni ni gucalaʼdxiʼ gucaadiágabe oración stiʼ la? naquiiñeʼ guni crecaʼ Jiobá gulí guidxi Israel. Maʼ ca dxi stiʼ Salomón que, ca binni ni racalaʼdxiʼ gucaadiaga Dios oración stiʼ la? gupa xidé guni crecaʼ templu que nga lugar ni gulí Dios para guzaaquicabe maniʼ (Deuteronomio 9:29; 2 Crónicas 6:32, 33). Peru ti tiempu si nga bíʼnicabe zaqué. Ne gúcani casi guníʼ apóstol Pablu que, Ley ni gucuaa guidxi Israel que ne ca maniʼ ni bizaaquicabe ndaaniʼ templu que la? beeda gácacani «casi bandá sti ni qué nihuinni chiqué» (Hebreos 10:1, 2). Bandáʼ que la? biluiʼni ni dxandíʼ chigaca (Colosenses 2:17). Nga runi, dede lu iza 33 que la? ni gacalaʼdxiʼ chuʼ gaxha de Jiobá zanda gúnini, peru maʼ cadi pa cayuni ni na Ley ni gucuaa Moisés que, sínuque pa cuzuubabe stiidxaʼ Jesucristu, purtiʼ dede Ley que bizeeteʼ de laabe (Juan 15:14-16; Gálatas 3:24, 25).

Ti lá ni jma risaca «que irá xixé» ni nuu

Jesús gudixhe ti modo jma galán para guidxíñanu Jiobá. Laabe zeeda gácabe casi ti xhamígunu ni napa stale poder ne cuxhálebe ti neza para ganda gucaadiaga Dios ca oración  stinu ne guicábibe laanu. Xiñee zanda guni Jesús zacá yaʼ.

Cumu guiranu nga gulenenu donda la? qué zanda diʼ gúninu gastiʼ para guixiá donda stinu, nin guidxíñanu Jiobá, Dios ni nayá (Romanos 3:20, 24; Hebreos 1:3, 4). Peru, dxi guti Jesús la? gudixe pur donda sti guiráʼ binni (Romanos 5:12, 18, 19). Ne pur ni biʼniʼ Jesús ca la? guiráʼ tu gacalaʼdxiʼ chuʼ nayá nezalú Jiobá zanda guidxiña laabe «sin idxibi», zanda gúnicabe ni pa gápacabe fe lu rini bixhii Jesús ne ora guni orárcabe Dios la? iquiiñecabe labe (Efesios 3:11, 12).

Ora guni orarnu ne iquiiñenu lá Jesús la? rusihuínninu runi crenu cayuni Jesús chonna de ca dxiiñaʼ ni bidii Dios laabe para gúnibe ni naguixhe ique: 1) Laabe nga «dendxu huiini sti Dios», ni guti para guixiá donda stiʼ binni. 2) Ne dede dxi gundisaʼ Jiobá laabe de lade gueʼtuʼ la? maʼ nácabe «sacerdote gola» ni cayacané binni guilá de lu naʼ guendaguti. 3) Laasibe nga «neza» ni ruchiña laanu ra nuu Jiobá ora guni orarnu laa (Juan 1:29; 14:6; Hebreos 4:14, 15).

Ora iquiiñenu lá Jesús lu oración stinu la? laapebe nga cusisácanu. Ne jneza gúninu zacá purtiʼ Jiobá peʼ nga na «ora guiete lá [Jesús ] guzuxibi irá» binni «ne iníʼ ca nezalú iráʼ: “Jesucristu nga Señor”, ne zacá usisaca ca Dios Bixhoze be» (Filipenses 2:10, 11). Ne ni jma risaca nga, rusisácanu Jiobá ora iquiiñenu lá Jesús lu ca oración stinu, purtiʼ laabe nga bidiibe xiiñibe para gacané laanu (Juan 3:16).

Para guiene chaahuinu pabiáʼ nga risaca dxiiñaʼ ni napa Jesús la? Biblia riníʼ ni rúnibe ne xcaadxi lá ni nápabe. Ne guiráʼ cani racanécani laanu guiénenu xi guiráʼ ndaayaʼ ricaanu pur ni biʼniʼ Jesús ca, ni cayúnibe, ne ni chigúnibe pur laanu. (Biindaʼ cuadru ni na «Dxiiñaʼ nabé risaca ni napa Jesús», ni zeeda lu yaza 14.) Ne Jesús maʼ gucuaa lá ni jma risaca «que irá xixé» ni nuu ne nga riníʼ laabe nga runi mandarbe cani nuu guibáʼ ne lu guidxilayú (Filipenses 2:9; Mateo 28:18). *

 Cadi purtiʼ si maʼ biaanu gúninu ni

Casi maʼ bidúʼyanu ca, napa xidé iquiiñenu lá Jesús ora guiluxe guni orarnu para gucaadiaga Jiobá laanu (Juan 14:13, 14). Peru cadi iquiiñedinu lá Jesús lu oración stinu purtiʼ si nánnanu naquiiñeʼ gúninu ni zacá. Xiñee cadi jneza gúninu zacá yaʼ.

Guiníʼ íquenu de ejemplu riʼ. Ora gúʼndaluʼ carta stiʼ tuuxa binni, zándaca ra rilúxeni cá «cuseendaʼ diuxi». Peru ñee raʼbuʼ riale ca diidxaʼ riʼ de ndaaniʼ ladxidóʼ binni ca o cucaabe ni purtiʼ si nánnabe zacá naquiiñeʼ gúnibe ni la? Ni dxandíʼ nga ora iquiiñenu lá Jesús lu ca oración stinu naquiiñeʼ guireeni de ndaaniʼ ladxidoʼno, ne cadi purtiʼ nánnanu naquiiñeʼ guinábanu ni lu labe. Nánnanu cadi naquiiñeʼ gusaananu de guni orarnu, peru galán gúninu ni de guidubi ladxidoʼno ne cadi purtiʼ si nánnanu naquiiñeʼ guininu zacá (1 Tesalonicenses 5:17; Salmo 119:145).

Xi zanda gúninu ti cadi guinísinu lá Jesús purtiʼ si naquiiñeʼ guzéʼtenu ni yaʼ. Xiñee qué guiníʼ íquenu pabiáʼ sicarú ca guenda napa Cristu yaʼ. Guiníʼ íquenu de guiráʼ cosa ni maʼ biʼniʼ Jesús pur laanu ne cani riaadxaʼ gúnibe. Lu ca oración stinu, gudiʼnu xquíxepeʼ Jiobá ne gusisácanu laabe pur modo biquiiñebe xiiñibe. Pa gúninu zacá la? zuluinu runi crenu ca diidxaʼ guníʼ Jesús: «Pa guinábatu Bixhozeʼ xiixa, laabe zudiibe ni laatu ora guinábatu ni lu laʼyaʼ» (Juan 16:23, NM).

[Cani cá ñee yaza]

[Ni caníʼ yaza 13]

Ca diidxaʼ guininu ora maʼ cayuni orarnu naquiiñeʼ guireeni de ndaaniʼ ladxidoʼno, ne cadi purtiʼ si naquiiñeʼ guininu ni

[Cuadro ne dibuju/foto ni zeeda lu yaza 14]

DXIIÑAʼ NABÉ RISACA NI NAPA JESÚS

Para guiene chaahuinu dxiiñaʼ risaca ni napa Jesús la? guidúʼyanu caadxi modo rábicabe laabe.

Amén (2 Corintios 1:19, 20; Apocalipsis 3:14, NM).

Apóstol (Hebreos 3:1, NM).

Bixhózenu ni qué zusaana de gácani (Isaías 9:6).

Cristu, Mesías (Mateo 16:16; Juan 1:41).

Dendxuhuiiniʼ stiʼ Dios (Juan 1:29).

Diidxaʼ (Juan 1:1).

Dios ni napa poder (Isaías 9:6).

Emmanuel (Mateo 1:23).

Juez (Hechos 10:42).

Maestru (Juan 13:13).

Miguel, xaíque stiʼ ca ángel (1 Tesalonicenses 4:16; Judas 9, NM).

Ni gulá laanu (Lucas 2:11).

Ni jma nanna gudii conseju (Isaías 9:6).

Ni rudii guendanabani (Hechos 3:15).

Ni runi mandar (Apocalipsis 11:15).

Ni zanda guiniʼné Dios pur laanu (1 Timoteo 2:5).

Pastor Chaʼhuiʼ (Juan 10:11).

Príncipe ni rudii Guendariuudxi (Isaías 9:6).

Ra guiropa Adán (1 Corintios 15:45).

Sacerdote gola (Hebreos 4:14, 15).

Señor (Juan 13:13).

Testigu ni runi ni jneza (Apocalipsis 1:5).

Xaíque (Mateo 23:10).

Xaíque stiʼ ca xpinni (Efesios 5:23).

Xiiñiʼ Dios (Juan 1:34).

Xiiñiʼ hombre (Mateo 8:20, NM).