JESÚS guirá ór bisetlaa de oración. Ló tiempcu líderes religiosos judíos bunyibu oración rotísi lagary. ¿Xigony bunyibu láani? Bunybu láani scú par nabiʼ stipnés buñ layibu, né goniiny layibu que buñ nasanadx layibu por ni napyibu galrronladx. Bunyibu oración sioʼol, bunyibu láani modreʼ portín xpensaryibu modcu sacadiag Dios layibu (Mateo 6:5-8). Jesús nayadit bisuidy que guirá ni bunyibu diti noʼ pu biquiinni, né goniʼbu xi diti non gony buñ órni gony oración. Láaca golexabu ni gony buñ órni gony oración.

Jesús bisuidy lóono que órni gonyno oración non guislooyno que raniiny lóono gac nayaa laa Dios, guieed Gobierno xtunybu né gac ni nábu. Láaca bisuidybu que labúu guinabno Dios stipnés cós ni caquiinno (Mateo 6:9-13; Lucas 11:2-4). Bisetlabu tipnés ilustraciones ni raslooy que diti non guireʼganno, raquiin gapno fe né gacno buñdxo pal nainy lóono guicadiag Dios lóono (Lucas 11:5-13; 18:1-14). Jesús bislooy guirá ndeʼ né ejemplo xtunybu (Mateo 14:23; Marcos 1:35).

Guirá ni bisetlaa Jesús gocnéni xpiimbu par ñonyibu oración sacróyen. Jesús golésbu dada último goxin par ñaibybu xpiimbu xigony rasac gonyibu oración.

Antes de ñaity Jesús, goxincu gocnébu xpiimbu. Né órcu bisetlabu toib cós copy. «Naʼ ngú néz, rasudi ni nigolú né radudi galnabany tipzó. Ni toib labúu guidxin ronoʼ Bixiosa pal diti nacni por naʼ». De ngú bunybu toib promesa né xpiimbu: «Nitisi cós ni guinabto ló laaya soni láani, né Bixiosa sac xiroʼbu por Xiimbu. Pal ranabto toib cós ló laaya soni láani». Né órni ma calox caninébu xpiimbu goniʼbu ndeʼ: «Dada nigoreʼ diti ma gonabto ni toib cós ló laaya. Colguinab né sacaʼto, modcu sioʼ nakitto» (Juan 14:6, 13, 14; 16:24).

¡Ni goniʼ Jesús bitzaʼ oración! Toib diccionario bíblico rasetlaa que «bidzaʼ mod góc oración». Per Jesús diti goniʼbu que órni gonyno oración ma nosi láabu guininéno. Xalagary ngú, bixalbu toib néz copy par guibigaxno Jehová Dios.

Nandxichno que Dios guirá ór racadiagbu oración xtuny buñ ni rony ni nábu (1 Samuel 1:9-19; Salmo 65:2). Per órni Dios buny toib acuerdo né gudx Israel, guirá ni guiniiny que Dios guicadiag oración xtunyibu non nacacuentyibu que Israel nac xcudx Jehová ni ma golúbu. Después ló xtzú Salomón, buñ nacacuent templo mi ma golú Dios par nadudy buñ sacrificios (Deuteronomio 9:29; 2 Crónicas 6:32, 33). Per arreglo reʼ diti goclani. Xomod bicaʼ apóstol Pablo, Ley ni cuaʼ gudx Israel né sacrificios ni bidudyibu bislooyni xi láani gac ló dzú ni sietra (Hebreos 10:1, 2). Per después bidzaʼ mod gocni (Colosenses 2:17). Ló íz 33 ló xtzúno, órni toib buñ ná guidzak Jehová ma diti non nasobyibu Xiley Moisés. Xalagary ngú, non nasobyibu Jesucristo, ni ma biliña Ley (Juan 15:14-16; Gálatas 3:24, 25).

Jesús bisetlaa xi raquiin gonyno par guibigaxno más Jehová. Láabu góc compararbu a toib amig ni nap galnadip ni raxal toib néz, né modcu Dios guicadiag né guicapy oración xtuny buñ. ¿Xigony labúu rony Jesús guirá ndeʼ por lóono?

Guiráno nacno buñ galkié, né nitisi sacrificio né stipnés cós ni gonyno diti labúu ranitló láani, né diti labúu gapno derech par guidzakno Jehová, Dios ni nac nigolú nayaa (Romanos 3:20, 24; Hebreos 1:3, 4). Per xcalgoitybu bisiáni xcalkié buñgudxlio (Romanos 5:12, 18, 19). Né por guirá ndeʼ guirá buñ ni ná guibigax nisló Jehová guirási ór gapyibu fe ló sacrificio xtuny Jesús, né gonyibu oración né guiquiinyibu laa Jesús (Efesios 3:11, 12).

Órni ronyno oración né raquiinno laa Jesús, raslooyno tzón cós mod nac Jesús: 1) «Nacbu xiil xtuny Dios», né modcu xcalkiéno radudyni scásiʼ. 2) Nacbu «sumo sacerdote» ni goity por lóono né modcu labúu ralaano. 3) Nosi láabu nac «néz» par labúu guibigaxno Jehová ló oración (Juan 1:29; 14:6; Hebreos 4:14, 15).

Órni ronyno oración né raquiinno laa Jesús rapno respet láabu. Portín Jehová raniiny que «ló laa Jesús guixixip guirá ni noʼ [...], né guirá buñ guidudy cuent que Jesucristo nac Señor par gloria xtuny Dios ni nac Padre» (Filipenses 2:10, 11). Né ni máspa la, órni ronyno oración ló laa Jesús ronyxiroʼno Jehová ni bidudy Xiin goity por lóono (Juan 3:16).

Par guidudyno cuent balaati rasac dxiin ni nap Jesús, la Biblia rasetlaa xidal títulos né xidal laa ni napbu. Guirá ndeʼ racnéni lóono guidudyno cuent guirá galnasác ni racaʼno por guirá ni ma buny Jesús, ni cayonybu né ni gonybu ló dzú ni sietra. (Bibiʼ cuadriyen ni laa, « Dxiin ni rasac ni rony Jesús» ). Jesús ma cuaʼ toib laa ni noʼ más guiaʼ «ló guirá laa ni noʼ» ndeʼ radudy diitz guirá galmandary ni noʼ lainy guibá né ni noʼ ló Gudxlio (Filipenses 2:9; Mateo 28:18). *

Mod ma bibiʼno, órni gonyno oración guiquiinno laa Jesús, modreʼ sacadiag Jehová lóono (Juan 14:13, 14). Per diti raniiny lóono que «laa Jesús» gacni toib costumbre ni gapno. ¿Xigony yaca?

Buny pensary ló ejemplo reʼ. Órni racacuentlo toib guiich ni bixel toib buñ, né raloxni né diitzreʼ «raxela dioxh lólo». ¿Ronylo pensary que diitzreʼ bireʼni lainy xcalnabanybu la, o nosi goniʼbu láani? Órni guiquiinno laa Jesús diti gonyno scú, non guinino portín rareʼni dada lainy xcalnabanyno né diti gacni xomod toib guiich ni raxel toib buñ. Ná raquiin gonyno oración, guirá ór raquiin gonyno láani né guidopy xcalnabanyno né diti gacni toib costumbre (1 Tesalonicenses 5:17; Salmo 119:145).

¿Xí raquiin gonyno par diti guiquiinno «laa Jesús» xomod toib costumbre? Gonyno pensary ló cualidades né guirá ni ma bunybu por lóono, né ni raniiny gonybu. Órni gonyno oración guidudyno guixquix né gonyxiroʼno Jehová por mod ma biquiimbu Xiimbu. Pal ronyno láani sapno más confianz ló guirá ni ma goniʼ Jesús: «Pal guinabto Bixiosa nitisi cós, láabu sadudybu láani lóoto ló laaya» (Juan 16:23).