Ndi Ama Ọfiọk?

N̄kpọdiọhọ mmọn̄ oro okodude ke temple Solomon okokpon didie?

Akpa Ndidem 7:26 ọdọhọ ke ẹkesidọn̄ “tọsịn gallon [mmọn̄] efụt (oro edi, tọsịn bath mmọn̄ iba)” ke n̄kpọdiọhọ mmọn̄ oro mme oku ẹkesikamade ẹyet n̄kpọ, ke adan̄aemi ukem mbụk oro ke 2 Chronicles 4:5 ọdọhọde ke enye ama ekeme ndikama “tọsịn bath [mmọn̄] ita.” Emi anam ndusụk owo ẹdọhọ ke ukpụhọde oro odude ke itien̄wed iba emi oto ndudue oro ẹkenamde ke ini ẹkesion̄ode udiana n̄wed Chronicles ẹwet.

Nte ededi, Bible an̄wam nnyịn ndifiọk nte ke itie N̄wed Abasi mbiba emi ẹnen. Akpa Ndidem 7:26 ọdọhọ ete: “Enye odụk tọsịn gallon efụt (oro edi, tọsịn bath mmọn̄ iba).” Udiana Chronicles 4:5 ọdọhọ ete: “Kpa nte usọ mben cup; enye ekeme ndikama tọsịn bath [mmọn̄] ita.” Ntre, 2 Chronicles 4:5 etịn̄ aban̄a udomo mmọn̄ oro ekekemede ndiyọhọ besịn emi, ke adan̄aemi 1 Ndidem 7:26 etịn̄de aban̄a udomo mmọn̄ oro ẹkesidọn̄de ke besịn oro. Ke nditịn̄ ke usụn̄ efen, owo ikesidọn̄ke mmọn̄ enen̄ede ọyọhọ besịn oro. Etie nte ẹkesiwak ndidọn̄ tọsịn bath mmọn̄ iba ke besịn oro.

Ntak emi Jesus ye Peter ẹkedade okụk kiet ẹkpe tax temple-e?

Ke eyo Jesus, kpukpru irenowo Jew oro ẹma ẹkebe isua 20 ẹkenyene ndida drachma iba m̀mê didrachma n̄kpe tax temple kpukpru isua. Emi ekedi n̄kpọ nte okụk utom usen iba. Ke ini ẹkedọhọde Peter ekpe tax, Jesus ama ọdọhọ enye ete: “Ka ke inyan̄ kọduọk uwam nyụn̄ da akpa iyak eke edimụmde, ndien ke okụbọrede enye inua, afo oyokụt okụk stater. Da nọ mmọ ke okịm ye okwo.”—Matthew 17:24-27.

Ediwak nditọ ukpepn̄kpọ ẹdọhọ ke okụk stater oro ẹtịn̄de ẹban̄a mi ekedi tetradrachma. Okụk emi ekedi drachma inan̄, mîdịghe okụk oro owo iba ẹdade ẹkpe tax temple. Tetradrachma ikesinanake ini oro, ndien enye ama esiwak akan didrachma. The New Bible Dictionary ọdọhọ ete: “Etie nte mme Jew ẹkesiwak ndidiana kiet n̄kpe tax Temple, oro edi, owo iba ẹdiana kiet ẹkpe tax.”

Ke adianade do, owo ekededi oro okoyomde ndidian̄ade okụk man ekpe tax idemesie kpọt ekenyene ndikpe okụk mbemiso ẹdian̄ade okụk oro ẹnọ enye. Okụk emi enye edikpede ekeme ndidi n̄kpọ nte mbahade 8 eke ikie. Nte ededi, mbon oro ẹkesidianade kiet ẹkpe tax ikesikpehe okụk emi. Ntre idem ke ata ekpri n̄kpọ emi, mbụk oro Matthew ekewetde ekem ye se ẹfiọkde ẹban̄a mme n̄kpọ oro ẹkesidide ọsọ ke eyo Jesus.

[Ndise ke page 15]

Tetradrachma