Na o be o Tseba?

Mogopo wa mphiri wo o bego o le tempeleng ya Salomo e be e le o mokaaka’ng?

Pego yeo e lego go 1 Dikxoši 7:26 e re mogopo wo “o be o tlala xe o thšetšwe meetse a meêta e dikete tše pedi” e lego meetse ao a bego a dirišwa ke baperisita, mola pego e swanago le ye yeo e lego go 2 Koronika 4:5 yona e bolela ka “meêta e dikete tše tharo.” Se se dirile gore ba bangwe ba bolele gore go se swane mo go bakilwe ke phošo e bilego gona ge puku ya Dikoronika e ngwalollwa.

Lega go le bjalo, New World Translation e re thuša go kwešiša kamoo ditemana tše tše pedi di ka dumelelanywago ka gona. Dikxoši tša pele 7:26 e re: “O be o tšhelwa meetse a meeta e dikete tše pedi.” Ela hloko gore 2 Koronika 4:5 e re: “Bjalo ka sebjana, o be o ka tlatšwa ke meetse a meeta e dikete tše tharo.” Ka gona, 2 Koronika 4:5 e bolela ka tekanyo ya meetse ao mogopo wo wa tempeleng o bego o ka a rwala, mola 1 Dikxoši 7:26 e bolela ka tekanyo yeo ka tlwaelo e bego e tšhelwa ka sebjaneng se. Go bonagala ka tlwaelo go be go tšhelwa meeta e dikete tše pedi feela.

Ke ka baka la’ng Jesu le Petro ba ile ba lefa lekgetho la tempele ka tšhelete e tee feela ya tšhipi?

Mehleng ya Jesu, monna yo mongwe le yo mongwe wa Mojuda yo a nago le nywaga ya ka godimo ga e 20, o be a swanetše go lefa lekgetho la ngwaga le ngwaga la tempele la diterakema tše pedi, goba tšhelete e bitšwago didrachma. Tšhelete ye e be e lekana le moputso wa matšatši a mabedi. Ge go be go botšišwa potšišo ya mabapi le go lefa lekgetho le, Jesu o ile a laela Petro gore: “E-ya lewatleng, o lahlele kgwega, gomme o tšee hlapi ya pele e tšwago, ge o bula molomo wa yona, o tla hwetša tšhelete ya tšhipi ya setatere. O e tšee o ba nee yona o ntšhetše nna le wena.”—Mateo 17:24-27.

Diithuti tše dintši di dumela gore tšhelete ya tšhipi ya setatere yeo go bolelwago ka yona mo, ge e le gabotse, e be e le tetradrachma. Tšhelete ye ya tšhipi e be e lekana le diterakema tše nne goba lekgetho la tempele la batho ba babedi. Tetradrachma e be e tlwaelegile kudu e bile e hwetšagala gabonolo go feta didrachma. Ka gona, The New Bible Dictionary e re: “Go bonagala eka gantši Bajuda ba be ba kopana gomme ba lefa lekgetho la Tempele ka babedi ka babedi.”

Go tlaleletša moo, motho le ge e le ofe yo a bego a nyaka go lefa lekgetho la motho o tee feela o be a lefišwa tšhelete ya tlaleletšo. Tšhelete ye ya tlaleletšo e be e ka fihla go 8 lekgolong. Lega go le bjalo, bao ba bego ba lefa lekgetho la batho ba babedi ka nako e tee ba be ba sa lefišwe tšhelete ya tlaleletšo. Ka gona, gaešita le tabeng ye e nyenyane, pego yeo e ngwadilwego ke Mateo e dumelelana le seo se tsebjago ka mediro ya letšatši le letšatši ya mehleng ya Jesu.

[Seswantšho go letlakala 15]

Seswantšho se se Godišitšwego sa tetradrachma