Yu ben sabi a sani disi?

O bigi a kopro beki na a tempel fu Salomo ben de?

A pisi tori na ini 1 Kownu 7:26 e taki dati a kopro beki di den priester ben e gebroiki ben abi fotenti na fo dusun liter watra na ini. Ma na ini 2 Kroniki 4:5 den e taki dati a kopro beki ben abi siksitenti na siksi dusun liter watra na ini. Disi e meki sma denki taki wan fowtu de na ini a fasi fa den skrifi a tori fu a Bijbel buku Kroniki abra.

Ma a Nieuwe-Wereldvertaling e yepi wi fu si fu san ede wi kan taki dati den tu tekst disi bun. A tekst fu 1 Kownu 7:26 e taki fu a beki: „A ben gwenti fu abi fotenti na fo dusun liter watra.” Luku taki 2 Kroniki 4:5 e taki: „A beki disi, ben man hori siksitenti na siksi dusun liter watra.” Sobun, wi e si dati 2 Kroniki 4:5 e taki omeni watra a beki ben kan hori te a ben furu. Ma na a tra sei, 1 Kownu 7:26 e taki omeni watra den ben gwenti fu poti na ini. Fu dati ede wi kan taki dati noiti den ben e furu a beki te na a lanki. Den ben abi a gwenti fu furu en pasa afu nomo.

Fu san ede Yesus nanga Petrus pai wán pisi moni nomo leki tempel belasting?

Na ini a ten fu Yesus, dan ibri yari ala Dyu mansma di pasa 20 yari, ben abi fu pai a tempel belasting di ben de tu drakmo noso wán didrakmo. Disi na a moni di sma ben kisi te den ben wroko tu dei. Di den ben poti wan aksi gi Yesus di abi fu du nanga belasting, dan a taigi Petrus: „Go na se, go uku, èn teki a fosi fisi di yu kisi. Te yu opo en mofo, dan yu o feni wan stater-moni. Teki dati èn gi den a moni dati gi yu nanga mi.”—Mateyus 17:24-27.

Furu sabiman feni taki a stater-moni di den e taki fu en dya, ben de a tetradrakmo. A pisi moni disi ben abi a waarde fu fo drakmo, èn a ben de a srefi leki a belasting di tu sma musu pai. Den ben e gebroiki a tetradrakmo moro furu èn a ben de moro makriki fu feni tu leki a didrakmo moni. The New Bible Dictionary e taki dati den Dyu ben abi a gwenti taki tu sma ben e go makandra fu pai a tempel belasting.

Ma efu wan sma ben wani pai a belasting fu wan sma nomo, dan a ben o abi fu pai ete wan tra moni fu di den ben o abi fu broko a moni gi en. A moni di a ben musu pai ete, ben de furu son leisi! Den wan di ben pai a tempel belasting gi tu sma wantewante, no ben abi fu pai a moni dati. Disi e sori taki a pikin sani di Mateyus skrifi dyaso, ben de sani di furu sma na ini a ten fu Yesus ben abi fu du.

[Prenki na tapu bladzijde 15]

A tetradrakmo di de fu si dyaso, moro bigi leki fa a de trutru