Ua ite anei outou?

No te aha Iesu raua Petero i aufau ai i te tute o te hiero hoê noa maa moni?

I te tau o Iesu, ua titauhia ia aufau te mau tane ati Iuda atoa tei hau atu i te 20 matahiti i te tute o te hiero i te mau matahiti atoa e piti derama, aore ra hoê diderama. E tuati te reira i te hoê moni ohipa e piti mahana. I te aniraahia no nia i te aufauraa i teie tute, teie ta Iesu i parau ia Petero: “E haere atu . . . oe i te pae roto ra, taora ˈtu ai i te mǎtau, a huti mai ai i te iˈa matamua i amu ra, e ia hahae oe i te vaha ra e ite ai oe i te hoê maa moni, o ta oe ïa e hopoi atu ia ratou ra na tâua atoa.”—Mataio 17:24-27.

Mea rahi te aivanaa e tiaturi ra e te maa moni i faahitihia i ǒ nei, e maha ïa derama. E tuati ïa i te tute o te hiero no e piti taata. Mea matau-aˈe-hia e mea ohie aˈe ia fanaˈo e maha derama i te diderama. Te faataa ra hoi The New Bible Dictionary e: “E au ra e i apitipiti pinepine na te mau ati Iuda no te aufau i te tute o te Hiero.”

Hau atu â, te taata atoa i hinaaro e aufau i te tute no te hoê noa taata, e aufau atoa ïa oia i te tahi tino moni no te taui i te moni. E nehenehe te reira e haere i nia i te 8 %. Area te feia i aufau no e piti taata i te hoê â taime ra, eita ïa e aufau i teie tino moni. No reira, i roto atoa i teie tuhaa iti, te farii ra te faatiaraa i papaihia e Mataio i te mau peu o te mau mahana atoa tei matauhia i te tau o Iesu.

Eaha te faufaa o na lepeta e piti a te vahine ivi?

I te senekele matamua T.T., “e piti derama,” te moni ohipa e piti mahana, ta te mau ati Iuda i aufau na no te tute o te hiero i te mau matahiti atoa. (Mataio 17:24, MN) Teie râ, ua parau Iesu e e hoohia e piti manu rii “i te moni veo hoê,” aore ra hoê asario, o te moni ohipa ïa e 45 minuti. Inaha, e noaa mai e pae manu rii no e piti asario, aore ra no te moni ohipa e 90 minuti.—Mataio 10:29; Luka 12:6.

Mea iti roa ïa te ô no te hiero a te vahine ivi taoˈa ore ta Iesu i ite atu. Teie na lepeta e piti, o na moni veo haihai roa ˈˈe ïa i faaohipahia i Iseraela i taua tau ra. E tuati te reira i te 1 tuhaa i nia i te 64 o te moni ohipa o te hoê mahana, aore ra te hoê moni ohipa e iti mai i te 12 minuti ia niuhia i nia i te hoê mahana ohipa 12 hora i te faito au noa.

No Iesu Mesia, mea faufaa aˈe te ô a te vahine ivi i ta te feia atoa ‘tiahapa taoˈa rahi’ i tuu. No te aha? Ia au i te faatiaraa, “e piti lepeta” ta ˈna, e nehenehe ïa ta ˈna e horoa hoê e e tapea i te tahi atu na ˈna iho. Teie râ, “ua hope roa a ˈna taoˈa rii navai ore” i te tuuhia e ana.—Mareko 12:41-44; Luka 21:2-4.