Iban̄a Ata Abasi
Se Nnyịn Ikpepde Ito Jesus
Iban̄a Ata Abasi
Ndi Abasi enyene enyịn̄?
Jesus ama ekpep nte ke Abasi enyene enyịn̄. Enye ọkọdọhọ ete: “Mbufo ẹnyene ndibọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana.’” (Matthew 6:9) Bible ọdọhọ ke enyịn̄ Abasi edi Jehovah. (Psalm 83:18) Jesus ọkọbọn̄ akam ọnọ Ete esie aban̄a mme mbet esie ete: “Ami mmonyụn̄ nnam mmọ ẹfiọk enyịn̄ fo.”—John 17:26.
Jehovah edi anie?
Sia Jehovah edide Andibot, Jesus okokot enye “ata Abasi kierakiet.” (John 17:3) Jesus okobụp ete: “Nte mbufo ikokotke ite ke enye emi okobotde mmọ toto ke editọn̄ọ akanam mmọ eren ye n̄wan?” (Matthew 19:4) Jesus ama etịn̄ n̄ko ete: “Abasi edi Spirit.” (John 4:24) Ntem, nnyịn ikemeke ndikụt Abasi.—Exodus 33:17-20.
Nso ke Abasi oyom oto nnyịn?
Ke ini owo kiet okobụpde Jesus se idide n̄kponn̄kan ibet, enye ọkọbọrọ ete: “Ebeiso edi, ‘Ẹkop, O Israel, Jehovah Abasi nnyịn edi Jehovah kiet, ndien afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.’ Udiana edi emi, ‘Afo enyene ndima mbọhọidụn̄ fo nte idemfo.’”—Mark 12:28-31.
Didie ke ikeme ndiwụt ke imama Abasi?
Jesus ọkọdọhọ ete: “Ami mmama Ete.” Didie ke enye okowụt ima esie? Kam kop se enye eketịn̄de mi: “Idem kpa nte Ete ọkọnọde mi ibet ete nnam, kpa ntre ke ami nnam.” (John 14:31) Enye ọkọdọhọ n̄ko ete ke imọ ‘inam n̄kpọ eke enemde Ete imọ esịt kpukpru ini.’ (John 8:29) Nnyịn imekeme ndinem Abasi esịt ke ndikpep n̄kpọ mban̄a enye. Ke ini Jesus ọkọbọn̄de akam aban̄a mme mbet esie, enye ọkọdọhọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet.”—John 17:3; 1 Timothy 2:4.
Didie ke nnyịn ikeme ndikpep n̄kpọ mban̄a Abasi?
Usụn̄ kiet ndikpep n̄kpọ mban̄a Abasi edi ndise mme n̄kpọ oro enye okobotde. Ke uwụtn̄kpọ, Jesus ọkọdọhọ ete: “Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ?” Nso ke ikọ Jesus emi ọwọrọ? Ọwọrọ ke inaha nnyịn iyak editịmede esịt mban̄a mme n̄kpọ udu uwem akpan nnyịn ndinam n̄kpọ Abasi.—Matthew 6:26-33.
Mfọnn̄kan usụn̄ oro ikemede ndifiọk Jehovah edi ndikpep Ikọ esie, kpa Bible. Jesus ọkọdọhọ ete ke Bible edi “ikọ Abasi.” (Luke 8:21) Jesus ama ọdọhọ Abasi ete: “Ikọ fo edi akpanikọ.”—John 17:17; 2 Peter 1:20, 21.
Jesus ama an̄wam mme owo ẹkpep akpanikọ aban̄ade Jehovah. Kiet ke otu mbet Jesus ama etịn̄ aban̄a enye ete: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?” (Luke 24:32) Man ikpep n̄kpọ iban̄a Abasi, ana isụhọde idem inyụn̄ inyịme ndibọ ukpep. Jesus ọkọdọhọ ete: “Ibọhọke mbufo ẹfiak edem ẹnyụn̄ ẹkabade ẹtie nte n̄kpri nditọ, mbufo idikemeke-keme ndidụk ke obio ubọn̄ heaven.”—Matthew 18:3.
Ntak emi ifiọk Abasi anamde owo okop inemesịt?
Oyom ifiọk se idide uduak uwem, ndien Abasi an̄wam nnyịn ndifiọk uduak emi. Jesus ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) Jehovah ekpep nnyịn mfọnn̄kan usụn̄ uwem. Jesus ọkọdọhọ ete: “Inemesịt akam edi eke mbon oro ẹkopde ikọ Abasi ẹnyụn̄ ẹkpemede ndinam enye!”—Luke 11:28; Isaiah 11:9.
Ke oyomde ntọt efen efen, se akpa ibuot ke n̄wed Nso ke Bible Enen̄ede Ekpep? *
[Ikọ Idakisọn̄]
^ ikp. 17 Mme Ntiense Jehovah ẹsio.
[Ndise ke page 16]
“Ami mmonyụn̄ nnam mmọ ẹfiọk enyịn̄ fo.”—John 17:26
[Ndise ke page 16, 17]
Imekeme ndikpep n̄kpọ mban̄a Jehovah nto se enye okobotde ye Bible