Yɛ Anɔkwa Nyɔŋmɔ lɛ He
Nɔ Ni Wɔkaseɔ Kɛjɛɔ Yesu Ŋɔɔ
Yɛ Anɔkwa Nyɔŋmɔ lɛ He
Ani Nyɔŋmɔ yɛ gbɛi?
Yesu tsɔɔ mɛi akɛ Nyɔŋmɔ yɛ gbɛi. Yesu kɛɛ akɛ: “No hewɔ lɛ nyɛsɔlea nɛkɛ: Wɔtsɛ ni yɔɔ ŋwɛi, ogbɛi lɛ he atse.” (Mateo 6:9) Biblia lɛ haa wɔleɔ akɛ Nyɔŋmɔ gbɛi ji Yehowa. (Lala 83:19) Beni Yesu wieɔ ekaselɔi lɛ ahe lɛ, ekɛɛ e-Tsɛ lɛ yɛ sɔlemɔ mli akɛ: “Mijie ogbɛi lɛ kpo mitsɔɔ amɛ.”—Yohane 17:26.
Namɔ ji Yehowa?
Yesu tsɛ́ Yehowa akɛ “anɔkwa Nyɔŋmɔ kome lɛ” ejaakɛ Yehowa ji Bɔlɔ lɛ. (Yohane 17:3) Yesu kɛɛ akɛ: “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, ‘nuu kɛ yoo ebɔ amɛ’?” (Mateo 19:4) Yesu kɛɛ hu akɛ: “Nyɔŋmɔ lɛ Mumɔŋ.” (Yohane 4:24) No hewɔ lɛ, wɔnyɛŋ wɔna Nyɔŋmɔ.—2 Mose 33:17-20.
Mɛni Nyɔŋmɔ Taoɔ yɛ Wɔdɛŋ?
Beni mɔ ko bi Yesu nɔ ni ji mla lɛ mli kita wulu lɛ, eha hetoo akɛ: “Kitai lɛ fɛɛ ateŋ klɛŋklɛŋ nɔ ji enɛ: ‘Bo toi, Israel! Nuŋtsɔ, wɔ-Nyɔŋmɔ lɛ, Nuŋtsɔ kome ni; ni suɔmɔ Nuŋtsɔ o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!’ Enɛ ji klɛŋklɛŋ kita. Ni nɔ ni ji enyɔ lɛ tamɔ no: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’”—Marko 12:28-31.
Te wɔɔfee tɛŋŋ wɔtsɔɔ akɛ wɔsumɔɔ Nyɔŋmɔ?
Yesu kɛɛ akɛ: “Misumɔɔ tsɛ lɛ.” Mɛɛ gbɛ nɔ etsɔ ejie suɔmɔ ni eyɔɔ lɛ kpo etsɔɔ? Ekɛɛ akɛ: “Bɔ ni tsɛ lɛ wo mi kita lɛ nakai mifeɔ.” (Yohane 14:31) Ewie hu akɛ: “Nɔ ni sa ehiɛ mifeɔ daa.” (Yohane 8:29) Wɔbaanyɛ wɔha Nyɔŋmɔ aná miishɛɛ kɛtsɔ ehe nii ni wɔɔkase lɛ nɔ. Beni Yesu sɔleɔ ehaa ekaselɔi lɛ, ekɛɛ akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ.”—Yohane 17:3; 1 Timoteo 2:4.
Te wɔɔfee tɛŋŋ wɔkase Nyɔŋmɔ he nii?
Gbɛ kome ni wɔbaanyɛ wɔtsɔ nɔ wɔkase Nyɔŋmɔ he nii ji ní wɔkwɛ nibii ni ebɔ lɛ. Ákɛ nɔkwɛmɔnɔ lɛ, Yesu kɛɛ akɛ: “Nyɛkwɛa ŋwɛi loofɔji lɛ: amɛduuu nii, asaŋ amɛkuuu, asaŋ amɛbuaaa naa amɛwooo aboŋoi amli; shi nyɛtsɛ ni yɔɔ ŋwɛi lɛ lɛɔ amɛ kɛ̃. Ani nyɛhiii aahu fe amɛ?” Mɛni Yesu taoɔ atsɔɔ wɔ yɛ ŋmalɛ nɛɛ mli lɛ? No ji akɛ, esaaa akɛ wɔhaa wɔheloonaa hiamɔ nii ahe yeyeeyefeemɔ tsĩɔ wɔnaa ní wɔkasɔmɔ Nyɔŋmɔ.—Mateo 6:26-33.
Gbɛ ni hi fe fɛɛ ni wɔɔtsɔ nɔ wɔle Yehowa ji ní wɔkase e-Wiemɔ ni ji Biblia lɛ. Yesu tsɛ́ Ŋmalɛi lɛ akɛ “Nyɔŋmɔ wiemɔ lɛ.” (Luka 8:21) Yesu kɛɛ Nyɔŋmɔ akɛ: “Owiemɔ lɛ anɔkwaleŋ.”—Yohane 17:17; 2 Petro 1:20, 21.
Yesu ye ebua mɛi ni amɛkase anɔkwalei ni kɔɔ Yehowa he. Yesu kaselɔi lɛ ateŋ mɔkome kɛɛ yɛ Yesu he akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ ŋmalɛi lɛ anaa lɛ?” (Luka 24:32) Kɛ́ wɔbaanyɛ wɔkase Nyɔŋmɔ he nii lɛ, esa akɛ wɔba wɔhe shi, ni wɔsumɔ hu akɛ wɔbaaŋmɛ gbɛ ni atsɔɔ wɔ nii. Yesu kɛɛ akɛ: “Kɛji nyɛtsakeee ni nyɛtsɔmɔ tamɔ gbekɛbii bibii lɛ, nyɛboteŋ ŋwɛi maŋtsɛyeli lɛ mli kwraa.”—Mateo 18:3.
Mɛni hewɔ Nyɔŋmɔ he nilee haa anáa miishɛɛ lɛ?
Ehe miihia ni wɔnu yiŋtoo hewɔ ni wɔyɔɔ shihilɛ mli lɛ shishi, ni Nyɔŋmɔ yeɔ ebuaa wɔ koni wɔnu nakai yiŋtoo lɛ shishi. Yesu wie akɛ: “Ajɔɔ mumɔ lɛŋ ohiafoi lɛ.” (Mateo 5:3) Yehowa tsɔɔ wɔ shihilɛ gbɛ ni hi fe fɛɛ lɛ. Yesu kɛɛ akɛ: “Ajɔɔ mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!”—Luka 11:28; Yesaia 11:9.
Kɛ́ ootao ole enɛ he saji babaoo lɛ, kwɛmɔ Mɛni Biblia lɛ Tsɔɔ Diɛŋtsɛ? * wolo lɛ yitso 1 lɛ mli
[Shishigbɛ niŋmaa]
^ kk. 17 Mɛi ni fee ji Yehowa Odasefoi.
[Mfoniri ni yɔɔ baafa 16]
“Mijie ogbɛi lɛ kpo mitsɔɔ amɛ.”—Yohane 17:26
[Mfonirii ni yɔɔ baafa 16, 17]
Wɔbaanyɛ wɔtsɔ adebɔɔ nibii kɛ Biblia lɛ nɔ wɔkase Yehowa he nii