Iesu Amo Ita Dibaia Gaudia

Dirava Momokanina

Dirava be mai ena ladana, a?

Iesu ese ia hahedinaraia Dirava be mai ena ladana. Iesu ia gwau: “Inai bamona do umui guriguri: ‘Aiemai Tamana e, guba dekenai oi noho, oiemu ladana do ai hahelagaia.’ ” (Mataio 6:9) Baibel ese ia hahedinaraia Dirava ena ladana be Iehova. (Salamo 83:18) Iesu be iena hahediba taudia ia herevalaia bona idia totona ena Tamana ia guriguri henia neganai, ia gwau: “Oiemu ladana danu lau hadibaia vadaeni idia dekenai.”​​—Ioane 17:26.

Iehova be daika?

Iesu ia gwau Iehova be “Dirava momokani tamona” badina ia be Havaraia Tauna. (Ioane 17:3) Iesu ia gwau: “Be, Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia.’ ” (Mataio 19:4) Iesu be ma ia gwau: “Dirava be Lauma.” (Ioane 4:​24) Unai dainai Dirava ita itaia diba lasi.​​—Esodo 33:​17-​20.

 Dirava ia ura dahaka ita karaia?

Tau ta ia ura diba edena hahegani be hereadae bona Iesu ia nanadaia neganai, Iesu ia haere: “Ginigunana be inai, ‘Israela taudia e, umui kamonai, Lohiabada iseda Dirava be Lohiabada tamona. Lohiabada oiemu Dirava oi ura henia, mai oiemu kudouna ibounai, mai oiemu lauma ibounai, mai oiemu lalona ibounai, bona mai oiemu goada ibounai.’ Namba 2 be inai, ‘Oiemu dekena tauna do oi ura henia, oi sibona oi ura henia bamona.’ ”​​—Mareko 12:​28-​31.

Edena dala ai ita hahedinaraia Dirava ita lalokau henia?

Iesu ia gwau: “Lau ese egu Tamana lau lalokau henia.” Iesu be edena dala ai ena lalokau ia hahedinaraia? Ia gwau: “Egu Tamana ese lau dekenai ia hereva henia hegeregerena, lau gaukara noho.” (Ioane 14:31) Bona ma ia gwau: “Iena ura be nega ibounai lau karaia.” (Ioane 8:​29) Dirava ita hamoalea totona, ia ita diba be namo. Iesu be ena hahediba taudia totona ia guriguri neganai, ia gwau: “Mauri hanaihanai be inai: Idia ese oi Dirava momokani tamona do idia diba.”​​—Ioane 17:3; 1 Timoteo 2:4.

Edena dala ai Dirava do ita diba?

Dirava ita dibaia dalana ta be ia ese ia karaia gaudia ita stadilaia. Hegeregere, Iesu ia gwau: “Ataiai manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui ese manu umui hereaia, ani?” Iesu ena hereva anina be dahaka? Namo lasi tauanina durua gaudia laloa momo karana ese ita do ia koua Dirava ita hesiai henia lasi totona.​​—Mataio 6:​26-​33.

Iehova ita dibaia dalana hereadaena be iena Hereva, Baibel ita stadilaia. Iesu ese Baibel ia gwauraia “Dirava ena hereva.” (Luka 8:​21) Iesu ese Dirava ia hereva henia, ia gwau: “Oiemu hereva be hereva momokani.”​​—Ioane 17:17; 2 Petero 1:​20, 21.

Iesu be taunimanima ia durudia Iehova idia dibaia totona. Iesu ena hahediba tauna ta ese Iesu be inai bamona ia gwauraia: “Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?” (Luka 24:32) Dirava ita dibaia totona, namona be ita manau bona ita ura ma diba haida ita abia. Iesu ia gwau: “Bema umui emui lalona umui giroa lasi, bona memero maragi bamona do umui halaoa lasi, umui be Guba Basileia lalonai do umui raka vareai diba lasi.”​​—Mataio 18:3.

Dahaka dainai Dirava dibaia karana ese moale ia havaraia?

Ita vara ena badina ita dibaia be namo bona Dirava be ita ia durua unai ita lalopararalaia totona. Iesu ia gwau: “Idia diba lauma gaudia idia tahua be namo taudia idia moale.” (Mataio 5:​3, NW ) Iehova be ita dekenai mauri namona abia dalana ia hadibaia. Iesu ia gwau: “Dirava ena hereva idia kamonaia bona idia badinaia taudia be idia moale bada.”​​—Luka 11:28; Isaia 11:9.

Hereva ma haida oi diba totona, Baibel be Dahaka Ia Hadibaia? bukana ena karoa 1 itaia. *

[Footnote]

[Picture on page 24]

“Oiemu ladana danu lau hadibaia vadaeni idia dekenai.”​​—Ioane 17:26

[Pictures on page 24,25]

Iehova ese ia havaraia gaudia bona Baibel amo ia ita dibaia