Guuti ilumoortoq pillugu
Jiisusip sumik ilinniartikkaatigut
Guuti ilumoortoq pillugu
Guuti ateqarpa?
Jiisusip ilinniartitsissutigaa Guuti ateqartoq. Ima oqarpoq: „Taamaattumik ilissi ima qinussaasi: Ataatarput qilanniittutit! Aqqit illernartitaali.“ (Matthæusi 6:9) Biibilimi paasitinneqarpugut Guutip aqqa tassaasoq Jehova imaluunniit Jahve. (Tussiaat 83:19) Ataataminut qinunermini Jiisusi ajoqersukkani pillugit ima oqarpoq: „Aqqit taakkununnga ilisimalersippara.“ — Johannesi 17:26.
Jehova kinaava?
Jiisusip Jehova „ilumut kisimi Guutiusumik“ taavaa taanna Pinngortitsisuummat. (Johannesi 17:3) Jiisusi ima oqarpoq: „Atuarsimanngilisiuk pileqqaarneranniit Pinngortitsisup angut arnarlu pinngortikkai?“ (Matthæusi 19:4) Aamma ima oqarpoq: „Guuti anersaajuvoq.“ (Johannesi 4:24) Taamaammat Guuti takusinnaanngilarput. — 2 Mosesi 33:17-20.
Guutip sumik piumaffigaatigut?
Jiisusi aperineqarami inassut sorleq pingaarnerpaajunersoq ima akivoq: „Inassutit siullersaat unaavoq: ’Tusaagit Israeli! [Jehova] Guuterput, [Jehova] ataasiuvoq, [Jehovalu] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit nukitillu tamakkerlugit.’ Tulleraalu: ’Tullit ilittut asassavat.’“ — Markusi 12:28-31.
Qanoq ililluta ersersissinnaavarput Guuti asallugu?
Jiisusi ima oqarpoq: ’Ataataq asavara.’ Qanoq tamanna ersersippaa? Nangilluni ima oqarpoq: ’Ataatap inassutaa malillugu iliorpunga.’ (Johannesi 14:31) Aamma ima oqarpoq: ’Tamatigut iluarisaanik iliortarpunga.’ (Johannesi 8:29) Guuti nuannaartissinnaavarput ilinniarlutigu. Ajoqersukkaminik qinnussinermini Jiisusi ima oqarpoq: „Inuuneq naassaanngitsoq tassaavoq ilinnik, ilumut kisimi Guutiusumik . . ., ilisimanninneq.“ — Johannesi 17:3; 1 Timotheusi 2:4.
Guuti pillugu qanoq ilinniarsinnaavugut?
Ilaatigut pinngortitaanik qimerluuinikkut Guuti ilisarisimalersinnaavarput. Assersuutigalugu Jiisusi ima oqarpoq: „Qilaap timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. Ilissili taakkunannga pingaarnerujussuunnginnerpisi?“ Sunaana Jiisusip erseqqissarniaraa? Timikkut pisariaqartitatsinnik isumakuluuteqarneq Guutimut kiffartornissatsinnut akornutaatissanngilarput. — Matthæusi 6:26-33.
Guutimik ilisarisimannilerniaraanni pitsaanerpaavoq taassuma oqaasianik, Biibilimik, atuaqqissaartarnissaq. Jiisusip Allakkat „Guutip oqaasianik“ taavai. (Lukasi 8:21) Guutimut ima oqarpoq: „Oqaatsitit sallusuissutaapput.“ — Johannesi 17:17; 2 Petrusi 1:20, 21.
Jiisusip inuit Jehova pillugu sallusuissummik ilinniartippai. Jiisusip ajoqersugaasa ilaat Jiisusi pillugu ima oqarpoq: „Uummativut kissalersimannginnerpat aqqutitsinni oqaluffigimmatigut Allakkanillu nassuiaalluta?“ (Lukasi 24:32) Guuti pillugu ilinniarumalluta maniguuttariaqarpugut ilikkagaqarusuttariaqarlutalu. Jiisusi ima oqarpoq: „Kingumut meerannguatut ilinngikkussi Qilaap Naalagaaffianut isissanngilluinnarpusi.“ — Matthæusi 18:3.
Guuti pillugu ilisimasaqarneq sooq pillualissutaava?
Inuunerup siunertaanik paasinninnissamik pisariaqartitsinerput Guutip isumagivaa. Jiisusi ima oqarpoq: „Pilluarput anersaakkut piitsut [anersaakkut pisariaqartitaqarnerminnik miserratiginninngitsut, NV], taakkuami Qilaap Naalagaaffia pigaat.“ (Matthæusi 5:3) Jehovap ilinniartippaatigut inooriaaseq sorleq pitsaanerpaajunersoq. Biibilimi ima allassimasoqarpoq: „[Guutip oqaasia] eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit pilluarumaarlutillu.“ — Josva 1:8; Esaja 11:9. (wp08 02/01-E)
Amerlanerusunik paasissutissaqarpoq atuagassiaaqqami Guutip sumik piumaffigaatigut?-mi, qupp. 3-5-imi *
[Quppernerup ataani ilanngussaq]
^ imm. 17 Jehovap Nalunaajaasuinit saqqummersinneqartoq.
[Qupp. 8-mi assiliartaq]
„Aqqit taakkununnga ilisimalersippara.“ — Johannesi 17:26
[Qupp. 8, 9-mi assiliartat]
Jehova pillugu ilinniarsinnaavugut pinngortitarsuaq Biibililu aqqutigalugit