Cheqaq Diosmanta
Jesuspa yachachiyninkuna
Cheqaq Diosmanta
¿Kanchu Diospa sutin?
Jesusqa yachachiranmi Diospa sutinmanta, kayta nispa: “Chayrayku qankunaqa kay hinata mañakuychis: Yayayku hanaq pachapi kaq, sutiyki yupaychasqa kachun” (Mateo 6:9). Biblian willawanchis, Diospa sutin Jehová kasqanta (Salmo 83:18, NM). Qatikuqninkunamanta rimaspan Jesusqa Yayanmanta khaynata mañakuran: “Ñoqan paykunaman sutiykita yachachirani”, nispa (Juan 17:26, NM).
¿Pitaq Jehová Diosri?
Jesusmi Jehová Diosmanta niran: ‘Qan sapallaykin cheqaq Diosqa’ kanki, nispa (Juan 17:3). Nirantaq: “¿Manachu Diospa Simin Qelqata leerqankichis? Diosqa qallariypi kamarqan qharita warmitawanmi”, nispa (Mateo 19:4). Nillarantaq: “Diosqa Espiritun”, nispa (Juan 4:24); chayraykun Diosta mana rikusunmanchu (Éxodo 33:17-20).
¿Imatan Dios munan ñoqanchismanta?
Huk kutinmi Jesusta tapuranku, ¿mayqenmi aswan chaniyoq kamachikuy? nispa, paytaq kutichiran: “Uyariychis, Israel runakuna, Señor Diosninchisqa ch’ullallan. Señor Diosniykitan munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima. Iskaykaq aswan chaniyoqqa kaymi: ‘Runamasiykitan qan kikiykita hina munakunki’”, nispa (Marcos 12:28-31).
¿Imaynatan Dios munakusqanchista rikuchisunman?
Jesusmi niran: ‘Yayaytan munakuni’, nispa. ¿Imaynata rikuchiran? Paymi niran: ‘Paypa kamachiwasqantan ruwani’, nispa (Juan 14:31). Nillarantaq: “Ñoqaqa paypa sonqonman chayaqtapunin ruwani”, nispa (Juan 8:29). Diospa munayninta ruwasun chayqa sonqonta kusirichisun. Qatikuqninkunapaq mañakuspan niran: ‘Chay wiñay kawsayqa kaymi: Qan sapallayki cheqaq Dios kasqaykita, kachamusqayki Jesucristotawan reqsiyninku’, nispa (Juan 17:3; 1 Timoteo 2:4).
¿Imaynatan Diosmanta yachasunman?
Diostaqa reqsisunman kamasqankunata qhawarispa. Yachanapaq, Jesusmi niran: “Qhawariychis phalaq animalkunata: manan tarpunkupaschu, cosechankupaschu, taqenkupaschu. Chaywanpas, hanaq pacha Yayaykichismi chaykunaman mikhuchin. ¡Qankunaqa phalaq animalkunamantapas aswan chaniyoqmi kankichis!” nispa. ¿Imatan yachanchis chaymanta? Kawsananchispaq necesitasqanchista maskhayqa manan hark’awananchischu Diosta servinanchispaq (Mateo 6:26-33).
Jehová Diostaqa astawan reqsisun Bibliata estudiaspa. Jesusmi Bibliamanta niran: ‘Diospa simin’, nispa (Lucas 8:21). Taytanmanta mañakuspataq kayta niran: “Simiykiqa cheqaq-kaypunin”, nispa (Juan 17:17; 2 Pedro 1:20, 21).
Jesusmi runakunata yanaparan Jehová Diosmanta cheqaqta yachanankupaq. Huknin yachachisqanmi niran: “¿Manachu ñanpi rimapayawaspanchis Diospa Simin Qelqaq nisqanta willashawaqtinchisqa sonqonchis kawsarirqan?” nispa (Lucas 24:32). Sichus Jehová Diosmanta yachayta munanchis chayqa, k’umuykukuqmi kananchis tukuy sonqowantaq yachachiykunata chaskikunanchis. Jesusmi yuyaychawaranchis: “Manachus k’umuykukuspa huk wawa hina kankichis chayqa, manan hanaq pacha qhapaqsuyumanqa haykunkichischu”, nispa (Mateo 18:3).
¿Imaraykun Diosmanta yachay kusichiwasunman?
Diosta reqsispa entiendenchis imapaq kawsasqanchista. Jesusmi niran: “Kusisamiyoqmi huch’uyyaykukuspa ‘Diostan necesitani’ niqkunaqa”, nispa (Mateo 5:3, Edición 1988). Jehová Diosmi yachachiwanchis aswan allinta kawsananchispaq. Chayraykun Jesusqa niran: “Aswan kusisamiyoqqa Diospa siminta uyarispa hunt’aqkunan”, nispa (Lucas 11:28; Isaías 11:9).
Astawan yachayta munaqtiykiqa, ¿Imatapunin Biblia yachachin? nisqa libropi 1 capitulota qhaway *
[Uranpi willakuy]
^ párr. 17 Chay librotaqa Jehová Diospa testigonkunan ruwan.
[6 paginapi dibujo]
“Ñoqan paykunaman sutiykita yachachirani.” (Juan 17:26, NM)
[6, 7 paginakunapi fotokuna]
Jehová Diosmantaqa yachanchis Bibliata estudiaspa kamasqankunatawan qhawarispa