O Lesona Tatou te Aʻoaʻoina Mai iā Iesu

E Faatatau i le Atua Moni

O ai le suafa o le Atua?

Na aʻoaʻo e Iesu e iai le suafa o le Atua. Na faapea mai Iesu: “Ia faapea ona outou tatalo: ‘Lo matou Tamā e o i le lagi, ia faapaiaina lou suafa.’” (Mataio 6:9) O loo faailoa mai e le Tusi Paia, o Ieova, o le suafa lenā o le Atua. (Salamo 83:18) Na tatalo Iesu i lona Tamā e faatatau i ona soo e faapea: “Ua ou faailoa atu lou suafa iā i latou.”—Ioane 17:26.

O ai Ieova?

Na taʻua e Iesu Ieova o “le Atua moni e toʻatasi” auā o Ieova na Faia mea uma lava. (Ioane 17:3) Na faapea mai Iesu: “Tou te leʻi faitau ea o lē na faia i laʻua i le amataga, na ia faia i laʻua o le tane ma le fafine?” (Mataio 19:4) Na toe faapea mai Iesu: “O le Atua o le agaga.” (Ioane 4:24) Ona o lea, e lē mafai ona tatou vaaia le Atua.—Esoto 33:17-20.

 O le ā le mea e finagalo le Atua iā i tatou e fai?

Na fesili se tagata iā Iesu po o le ā le poloaʻiga e sili, ma na ia tali atu faapea: “O le poloaʻiga muamua, ‘Ia faalogo mai Isaraelu e, o Ieova lo tatou Atua, o Ieova e toʻatasi lava ia, ma ia e alofa atu iā Ieova lou Atua ma lou loto atoa, ma lou ola atoa, ma lou mafaufau atoa, ma lou malosi atoa.’ O le lona lua lenei, ‘Ia e alofa atu i lou tuaoi e pei o oe lava iā te oe.’”—Mareko 12:28-31.

E faapefea ona faaalia lo tatou alofa i le Atua?

Na faapea mai Iesu: “Ou te alofa i le Tamā.” Na faapefea ona faaalia lona alofa? “Ua tuuina mai e le Tamā iā te aʻu poloaʻiga ina ia ou faia, o lea ua ou faia ai.” (Ioane 14:31) Na ia faapea mai foʻi: “Ou te faia pea mea e fiafia i ai lona finagalo.” (Ioane 8:29) E mafai ona tatou faafiafiaina le Atua e ala i le aʻoaʻo e faatatau iā te ia. A o ia tatalo mo ona soo, na faapea mai Iesu: “Ina ia maua le ola e faavavau, e tatau ona latou iloa lelei oe, le Atua moni e toʻatasi.”—Ioane 17:3; 1 Timoteo 2:4.

E faapefea ona tatou iloa le Atua?

O se tasi auala e iloa ai le Atua o le iloaina lea o mea na ia faia. O se faaaʻoaʻoga, na faapea mai Iesu: “Ia vaavaai lelei i manufelelei o le lagi, auā latou te lē lūlū ni fatu pe selesele, pe faaputu i se fale saito, ae e fafagaina i latou e lo outou Tamā o i le lagi. Pe e lē sili ea ona tāua outou i lo o na manufelelei?” O le ā le uiga o fetalaiga a Iesu? E lē tatau ona avea lo tatou popole i meafaitino ma māfuaaga e lē toe auauna ai i le Atua.—Mataio 6:26-33.

O le auala sili e iloa ai Ieova, e ala lea i le suʻesuʻeina o le Tusi Paia. Na taʻua e Iesu le Tusi Paia o “le upu a le Atua.” (Luka 8:21) Na faapea atu Iesu i le Atua: “O lau afioga o le upu moni lea.”—Ioane 17:17; 2 Peteru 1:20, 21.

Na fesoasoani Iesu i tagata e aʻoaʻoina le mea moni e uiga iā Ieova. E faatatau iā Iesu, na faapea mai ai se tasi o ona soo: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?” (Luka 24:32) Ina ia iloa atili le Atua, e tatau ona tatou agamalu, ma mananaʻo e aʻoaʻoina i tatou. Na faapea mai Iesu: “A lē suia outou ma avea e pei o tamaiti, tou te lē ulu atu i le malo o le lagi.”—Mataio 18:3.

Aiseā e fiafia ai pe a iloa lelei le Atua?

E faamalieina e le Atua o tatou faanaunauga e malamalama ai i le fuafuaga o le olaga. Na faapea mai Iesu: “E fiafia o ē naunau i mea faaleagaga.” (Mataio 5:3) Ua faailoa mai e Ieova iā i tatou le olaga sili. Na faapea mai Iesu: “E fiafia i latou e faalogo i le afioga a le Atua ma tausi i ai!”—Luka 11:28; Isaia 11:9.

Tagaʻi i le mataupu muamua o le tusi O ā Aʻoaʻoga Moni a le Tusi Paia? * mo nisi faamatalaga

[Faaopoopoga i lalo]

[Ata i le itulau 16]

“Ua ou faailoa atu lou suafa iā i latou.” —Ioane 17:26

[Ata i le itulau 16, 17]

E mafai ona tatou iloa atili Ieova ona o mea na ia faia faapea ma le Tusi Paia