Den sani di Yesus leri wi

San a leri wi fu a tru Gado?

Gado abi wan nen?

Yesus ben leri sma taki Gado abi wan nen. Yesus ben taki: „Fu dati ede un musu begi so: ’Wi Tata na hemel, meki yu nen kon santa’” (Mateyus 6:9). Bijbel e sori wi taki a nen fu Gado na Yehovah (Psalm 83:18). Di Yesus ben begi en Tata, dan a taki disi fu en disipel: „Mi meki yu nen bekènti na den.”—Yohanes 17:26.

Suma na Yehovah?

Yesus ben kari Yehovah „a wan-enkri tru Gado”, fu di Yehovah na a Mekiman (Yohanes 17:3). Yesus ben taki: „Unu no leisi taki a sma di meki den na a bigin, meki den leki man nanga uma?” (Mateyus 19:4) A ben taki tu: „Gado na wan Yeye” (Yohanes 4:24). Fu dati ede, wi no man si Gado.—Exodus 33:17-20.

 San Gado wani taki wi du?

Di wan sma ben aksi Yesus san na a moro bigi komando, a ben taki: „A fosiwan na: ’Yere, o Israel, Yehovah wi Gado na wán Yehovah, èn yu musu lobi Yehovah yu Gado nanga yu heri ati, nanga yu heri sili, nanga yu heri frustan, èn nanga ala yu krakti.’ A di fu tu komando na: ’Yu musu lobi tra sma leki fa yu lobi yusrefi.’”—Markus 12:28-31.

Fa wi kan sori taki wi lobi Gado?

Yesus ben taki: „Mi lobi a Tata.” Fa a ben e sori a lobi disi? A ben taki: „Mi e du san a Tata taigi mi fu du” (Yohanes 14:31). A ben taki tu: „Ala ten mi e du san e plisi en” (Yohanes 8:29). Wi kan plisi Gado te wi e leri sabi en. Di Yesus ben begi gi den disipel fu en, a ben taki: „Efu sma wani kisi têgo libi, dan den musu tan leri sabi yu, a wan-enkri tru Gado.”—Yohanes 17:3; 1 Timoteyus 2:4.

Fa wi kan leri sabi Gado?

Wán fasi fa wi kan leri sabi Gado na fu luku den sani di a meki. Fu eksempre, Yesus ben taki: „Luku den fowru bun di e frei na loktu, bika den no e sai siri, den no e koti nyanyan èn den no e kibri nyanyan na ini maksin; toku un Tata na hemel e gi den nyanyan. Unu no warti moro den?” San Yesus ben wani taki wi musu leri fu a tori disi? Wi no musu meki den broko-ede fu wi di abi fu du nanga den sani di wi abi fanowdu na ini a libi, tapu wi fu dini Gado.—Mateyus 6:26-33.

A moro bun fasi fa wi kan kon sabi Yehovah, na fu studeri en Wortu, Bijbel. Yesus ben taki dati den Buku fu Bijbel na „a wortu fu Gado” (Lukas 8:21). Yesus ben taigi Gado: „Yu wortu na waarheid.”—Yohanes 17:17; 2 Petrus 1:20, 21.

Yesus ben e yepi sma fu kon leri sabi den tru tori di abi fu du nanga Yehovah. Wán fu den disipel ben taki fu Yesus: „A no dati meki wi ati ben prisiri trutru di a ben e taki nanga wi di wi ben de na pasi, èn sosrefi di a ben meki wi frustan finifini san skrifi na ini Gado Buku?” (Lukas 24:32) Te wi wani leri sabi Gado, dan wi musu abi sakafasi, èn wi musu de klariklari fu teki leri. Yesus ben taki: „Efu unu no kenki a fasi fa unu e libi èn unu no tron leki yongu pikin, dan unu no sa go na ini a kownukondre fu hemel kwetikweti.”—Mateyus 18:3.

Fu san ede wi sa de koloku te wi sabi Gado?

Wi musu frustan san na a marki fa a libi èn Gado e yepi wi fu frustan dati. Yesus ben taki: „Koloku fu den sma di sabi taki den de na nowtu na yeye fasi” (Mateyus. 5:3). Yehovah e leri wi san na a moro bun fasi fu libi. „Koloku fu den sma di e yere a wortu fu Gado èn di e du san a wortu e taki!”, na so Yesus ben taki.—Lukas 11:28; Yesaya 11:9.

Efu yu wani kon sabi moro fu a tori disi, luku kapitel 1 fu a buku San Bijbel e leri wi trutru? *

[Futuwortu]

[Prenki na tapu bladzijde 16]

„Mi meki yu nen bekènti na den.” —Yohanes 17:26

[Prenki na tapu bladzijde 16, 17]

Wi kan leri sabi Yehovah te wi e luku den sani di a meki èn te wi e studeri Bijbel