Meʻa ʻOku Tau Ako Meia Sīsū

Fekauʻaki mo e ʻOtua Moʻoní

ʻOku ʻi ai ha huafa ʻo e ʻOtuá?

Ko Sīsuú naʻá ne akoʻi ko e ʻOtuá ʻoku ʻi ai hono huafa. Naʻe pehē ʻe Sīsū: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9) ʻOku fakahaaʻi ʻe he Tohi Tapú ko e huafa ʻo e ʻOtuá ko Sihova. (Sāme 83:18) ʻI he lea fekauʻaki mo ʻene kau ākongá, naʻe pehē ʻe Sīsū ʻi heʻene lotu ki heʻene Tamaí: “Kuo u fakaʻilo kiate kinautolu ho huafa.”—Sione 17:26.

Ko hai ʻa Sihova?

Naʻe ui ʻe Sīsū ʻa Sihova “ko e Otua moʻonia pe taha” koeʻuhi ko Sihova ʻa e Tokotaha-Fakatupú. (Sione 17:3) Naʻe pehē ʻe Sīsū: “Ne ʻikai te mou lau koā, Ko ia naʻa ne ngaohi ʻa e kakai ʻi he kamataʻanga naʻa ne ngaohi tangata mo fefine kinautolu”? (Mātiu 19:4) Naʻe toe pehē ʻe Sīsū: “Ko e ʻOtua ko e laumālie.” (Sione 4:24) Ko ia ai heʻikai lava ke tau sio ki he ʻOtuá.—Ekisoto 33:17-20.

 Ko e hā ʻoku ʻamanekina ʻe he ʻOtuá meiate kitautolú?

ʻI hono ʻeke ʻe ha tokotaha kia Sīsū pe ko e hā ʻa e fekau lahi tahá, naʻá ne tali: “ʻOku tuʻukimuʻa ʻa ʻeni, Fanongo mai, ʻa Isileli; ko e ʻEiki ko hotau ʻOtua, ko e ʻEiki pe taha ia: pea te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumālie, mo e kotoa ʻo ho ʻatamai, mo e kotoa ʻo ho ivi. Ko eni ʻa hono ua, Te ke ʻofa ki ho kaungaʻapi, ʻo hange ko hoʻo ʻofa kiate koe.”—Maake 12:29-31.

ʻE lava fēfē ke tau fakahāhā ʻoku tau ʻofa ki he ʻOtuá?

Naʻe pehē ʻe Sīsū: “ʻOku ou ʻofa ki he Tamai.” Naʻe anga-fēfē ʻene fakahāhā ʻa ʻene ʻofá? “Hangē ko hoku tuʻutuʻuni ʻe he Tamai,” ko ʻene leá ia “ʻoku pehē ʻeku fai.” (Sione 14:31) Naʻá ne toe pehē: “ʻOku ou fai maʻuaipē ʻa e ngaahi meʻa ʻoku ne hōhōʻia ai.” (Sione 8:29) ʻOku lava ke tau fakahōhōʻiaʻi ʻa e ʻOtuá ʻi he ako fekauʻaki mo iá. Lolotonga ʻene lotu maʻa ʻene kau ākongá, naʻe pehē ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha.”—Sione 17:3; 1 Timote 2:4.

ʻE lava fēfē ke tau ako fekauʻaki mo e ʻOtuá?

Ko e founga ʻe taha ke hoko ai ʻo ʻiloʻi ʻa e ʻOtuá ko hono siofi ʻa e ngaahi meʻa kuó ne ngaohí. Ko e fakatātaá, naʻe pehē ʻe Sīsū: “Vakai ange e fanga manupuna ʻo e ʻatā: he ʻoku nau tūtūʻi pe tuʻusi, pe faʻoaki feleoko? Ka ʻoku fafanga kinautolu ʻe hoʻomou Tamai Fakalangi. ʻIkai ʻoku mou mahuʻinga noa pe ʻiate kinautolu?” Ko e hā e poini naʻe ʻomai ʻe Sīsuú? ʻOku ʻikai totonu ke tau fakaʻatā ʻa e loto-moʻua fekauʻaki mo ʻetau ngaahi fiemaʻu fakaesinó ke ne taʻofi kitautolu mei heʻetau tauhi ki he ʻOtuá.—Mātiu 6:26-33.

Ko e founga lelei taha ke hoko ai ʻo ʻiloʻi ʻa Sihová ko hono ako ʻa ʻene Folofolá, ʻa e Tohi Tapú. Naʻe ui ʻe Sīsū ʻa e Tohi Tapú ko e “folofola ʻa e ʻOtua.” (Luke 8:21) Naʻe pehē ʻe Sīsū ki he ʻOtuá: “Ko e folofola aʻau ko e moʻoni ia.”—Sione 17:17; 2 Pita 1:20, 21.

Naʻe tokoniʻi ʻe Sīsū ʻa e kakaí ke nau ako ʻa e moʻoni fekauʻaki mo Sihová. ʻI he fekauʻaki mo Sīsuú, naʻe pehē ʻe he taha ʻo ʻene kau ākongá: “Hono ʻikai ne vela hota loto lolotonga ʻene talanoa mai ʻi he hala, mo ʻene vete kiate kitaua ʻa e Tohi tapu!” (Luke 24:32) Ke ako fekauʻaki mo e ʻOtuá, kuo pau ke tau anga-fakatōkilalo, ʻo loto-lelei ke akoʻi. Naʻe pehē ʻe Sīsū: “Kapau ʻe ʻikai te mou liliu, ʻo hoko ʻo hange ko e tamaiki, ʻe ʻikai ʻaupito te mou hu ki he Puleʻanga ʻo Hevani.”—Mātiu 18:3.

Ko e hā ʻoku ʻomai ai ʻe he ʻiloʻi ʻo e ʻOtuá ʻa e fiefiá?

ʻOku fakalato ʻe he ʻOtuá ʻetau fiemaʻu ke mahinoʻi ʻa e taumuʻa ʻo e moʻuí. Naʻe pehē ʻe Sīsū: “Monūʻiaā ka ko kinautolu ʻoku ongoʻi masiva honau laumalie.” (Mātiu 5:3) ʻOku akoʻi kiate kitautolu ʻe Sihova ʻa e founga lelei taha ʻo e moʻuí. “ʻOku monūʻia pe ʻa kinautolu ʻoku maʻu ʻa e folofola ʻa e ʻOtua, ʻo tauhi ki ai” ko e lea ia ʻa Sīsuú.—Luke 11:28; Aisea 11:9.

Ki ha fakamatala lahi ange, sio ki he vahe 1 ʻo e tohi Ko e Hā ʻOku Akoʻi Moʻoni ʻe he Tohi Tapú? *

[Fakamatala ʻi lalo]

[Fakatātā ʻi he peesi 26]

“Kuo u fakaʻilo kiate kinautolu ho huafa.”—Sione 17:26

[Fakatātā ʻi he peesi 26, 27]

ʻOku lava ke tau ako fekauʻaki mo Sihova mei he fakatupú pea mei he Tohi Tapú