Li melel Diose
Chanubtaseletik yuʼun Jesús
Li melel Diose
¿Mi oy sbi li Diose?
Li Jesuse laj yakʼ ta ojtikinel ti oy sbi li Diose, xi laj yale: «Li voʼoxuque jaʼ jech xacʼopanic Dios chac liʼi: “Jtotic Dios, te oyot ta vinajel, ichʼbiluc ta mucʼ abi”», xi (Mateo 6:9). Li Vivliae chal ti sbi Diose jaʼ Jeova (Éxodo 3:14, Ch, kʼelo li tsʼib ta yok vune). Kʼalal jaʼo chalbe skʼoplal li yajtsʼaklomtake, li Jesuse xi laj yalbe ta orasion li sTote: «Li voʼone kakʼojbeik yojtikin li abie», xi (Juan 17:26, NM).
¿Buchʼu jaʼ ti Jeovae?
Li Jesuse laj yal ti Jeovae jaʼ «[s]tuc noʼox batsʼi cuxul [Dios]» yuʼun jaʼ li Jpasvaneje (Juan 17:3). Li Jesuse laj yal: «¿Me muʼyuc aqʼuelojic ta scʼop Dios ti jun vinic xchiʼuc jun ants la spas Dios cʼalal la spas cristiano ta sliquebe?», xi (Mateo 19:4). Xi laj yal xtoke: «Li Diose jaʼ jun Espiritu» (Juan 4:24, NM); jech oxal mu xkil ta jsatik (Éxodo 33:17-20).
¿Kʼusi tskʼan akʼo jpastik li Diose?
Kʼalal oy buchʼu la sjakʼbe Jesús kʼusi junukal mantal ti x-echʼ to tsots skʼoplal ta skotole, xi la stakʼ li stuke: «Li sba mantal ti tsots scʼoplal ta scotole jaʼ liʼi: “Aʼyo avaʼay, Israel. Jun noʼox li Cajvaltique, jaʼ li Dios cuʼuntique. Jaʼ yuʼun cʼano me ta scotol avoʼnton li Dios avuʼune ta scotol achʼulel, ta scotol ajol, xchiʼuc ta scotol atsatsal”, xi li mantale. Li xchibale jech chal: “Cʼano achiʼil jech chac cʼu chaʼal cʼux ta avoʼnton abecʼtal atuc”» (Marcos 12:28-31).
¿Kʼuxi chkakʼtik ta ilel ti jkʼanojtik li Diose?
Li Jesuse xi laj yal ta melele: «Lec jcʼanoj ti Jtote», xi. ¿Kʼuxi laj yakʼ ta ilel taje? Jech kʼuchaʼal laj yalbun li jTote jech «ta jchʼunbe [li] smantale», xi (Juan 14:31). Xi laj yal ta melel xtoke: «Jaʼ ta jpasbe scotol cʼacʼal li cʼusi lec chile», xi (Juan 8:29). Xuʼ lek chilutik Dios mi ta xkojtikintike. Kʼalal yakal tskʼan ta orasion akʼo xkʼelatik li yajtsʼaklomtake, xi laj yal li Jesuse: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote», xi (Juan 17:3; 1 Timoteo 2:4).
¿Kʼuxi xuʼ jchantik ta sventa li Diose?
Jtos kʼuyelan xuʼ xkojtikintik li Diose jaʼ mi ta jkʼeltik li kʼusitik spasoje. Xi laj yal li Jesuse: «Qʼuel avil ti mutetic ti xvilajet ta vinajele. Mu snaʼ stsʼunobajic. Mu snaʼ xcʼajavic. Mu snaʼ spoco-tsob sveʼelic. Pero malqʼuinbilic yuʼun ti Jtotic ti oy ta vinajele. ¿Mi yuʼun jaʼ tsots scʼoplal ti mutetique? ¿Mi jaʼ mu sta ti voʼoxuque?». ¿Kʼusi xuʼ jchantik ta sventa taje? Li kʼusi ta jchantike jaʼ ti akʼo mu smakutik ta spasbel yabtel Dios li yatel koʼontontik saʼel kʼusitik chtun kuʼuntike (Mateo 6:26-33, Ti Achʼ Rextomento yuʼun ti Jesucristoe, ta skʼop Chamula).
Li kʼuyelan mas lek ta ojtikinel li Jeovae jaʼ kʼalal ta jchantik li Vivliae. Li Jesuse laj yal ti jaʼ la «scʼop Diose» (Lucas 8:21). Kʼalal la skʼopon sTote, xi laj yale: «Li acʼope jaʼ melel», xi (Juan 17:17; 2 Pedro 1:20, 21).
Li Jesuse la skolta li krixchanoetike sventa xojtikinik li kʼusitik melel ta sventa li Jeovae. Jun yajtsʼaklome xi kʼot ta alel yuʼun ta sventa li yajChanubtasvaneje: «Cʼalal yacal ta xiyalbotic talel ta be smelol ti cʼusi tsʼibabil ta chʼul cʼope, ¿mi mu lajuc caʼitic ta coʼntonic ta melel ti jun yutsile?», xi (Lucas 24:32, Ch). Mi ta jkʼan ta jchantik ta sventa li Diose, skʼan bikʼit xkakʼ jbatik xchiʼuk kakʼtik akʼo xchanubtasutik. Li Jesuse xi laj yale: «Me mu xajel atalelique, me mu xacoʼlajes abaic jech chac cʼu chaʼal ololetique, jʼechʼel mu xaʼochic yoʼ bu tspas mantal li Diose», xi (Mateo 18:3).
¿Kʼu yuʼun chakʼ muyubajel li yojtikinel Diose?
Yojtikinel li Diose chakʼbe smelolal li jkuxlejaltike. Li Jesuse laj yal: «Xmuyubajik li buchʼutik oy ta sjol yoʼontonik ti chtun yuʼunik mantale», xi (Mateo 5:3, NM). Yojtikinel li Jeovae jaʼ xkoʼolaj yojtikinel kʼuxi lek xuʼ xi jkuxi. Li Jesuse laj yal: «Jaʼ toj xcuxet yoʼntonic ta melel li bochʼotic chaʼyic li scʼop Diose, ti ta xchʼunique», xi (Lucas 11:28; Isaías 11:9).
Mi cha kʼanbe to mas yaʼyejale, kʼelo li kapitulo 1 ta livro ¿Kʼusi chchanubtasvan ta melel li Vivliae? *
[Tsʼib ta yok vun]
^ par. 17 Pasbil yuʼun yajrextikotak Jeova.
[Lokʼol ta pajina 20]
«Li voʼone kakʼojbeik yojtikin li abie.» (Juan 17:26, NM)
[Lokʼol ta pajina 20, 21]
Li kʼusitik pasbil xchiʼuk li Vivliae chchanubtasutik ta sventa Dios