U kaʼansajoʼob Jesús

Le u Jaajil Diosoʼ

¿Yaan wa u kʼaabaʼ Dios?

Jesuseʼ tu kaʼanseʼ Dioseʼ yaan u kʼaabaʼ, letiʼeʼ tu yaʼalaj: «Teʼexeʼ payalchiʼineneʼex beyaʼ: K-Yuum yanech teʼ kaʼanoʼ, kiliʼichkúunsaʼak a kʼaabaʼ» (Mateo 6:9). Le Bibliaoʼ ku yaʼalikeʼ u kʼaabaʼ Dioseʼ Yahveh wa Jéeoba (Isaías 42:8). Le ka orarnaj yoʼolal u disipuloʼobeʼ, Jesuseʼ tu yaʼalaj tiʼ u Taata: «Teneʼ tsʼoʼok in chíikbesik a kʼaabaʼ tiʼob» (Juan 17:26, LTN).

¿Máax Jéeoba?

Jesuseʼ tu yaʼaleʼ Jéeobaeʼ letiʼ le «juntúuliliʼ Jajal Dios[oʼ]», tumen letiʼ beet tuláakal baʼal (Juan 17:3). Jesuseʼ tu yaʼalaj: «¿Maʼ wa a xokmajeʼex tiʼ le Kiliʼich Tsʼíiboʼ, le máax beet wíinikoʼob tu [káajbaleʼ] tu beetaj xiib yéetel koʼolel?» (Mateo 19:4). Tu yaʼalaj xan: «Jajal Dioseʼ Pixan» wa Espíritu (Juan 4:24); le oʼolal maʼ tu páajtal u yilaʼal (Éxodo 33:17-20).

 ¿Baʼax u kʼáat Dios ka k-beete?

Le ka kʼáataʼab tiʼ Jesús máakalmáak u maas nojchil tiʼ le leyoʼoboʼ, letiʼeʼ tu núukaj: «Le yáax [ley] ichil tuláakaloʼ letiʼ lelaʼ: Uʼuye, Israel, [Jéeoba] k-Jajal Dioseʼ chéen letiʼ Yuumtsil. Yaabilt túun Yuumtsil a Jajal Dios yéetel tuláakal a puksiʼikʼal, yéetel tuláakal a pixan, yéetel tuláakal a tuukul, yéetel tuláakal a muukʼ. [...] Le u kaʼapʼéeloʼ chíikaʼan tiʼ le yáaxoʼ: Yaabilt a láakʼ jeʼel bix ka yaabiltkabaeʼ» (Marcos 12:28-31).

¿Bix jeʼel k-eʼesik yaabilmaj Dioseʼ?

Jesuseʼ tu yaʼalaj: «Teneʼ in yaabiltmaj le Taataoʼ». ¿Bix úuchik u yeʼesik u yaabilmaj? Letiʼeʼ tu yaʼalaj: «Táan in beetik le baʼax tu yaʼalaj ka in beetoʼ» (Juan 14:31.) Tu yaʼalaj xan: «Teneʼ mantatsʼ kin beetik le baʼax utstutʼaanoʼ» (Juan 8:29). Yaan k-beetik baʼax utstutʼaan Dios wa k-ilik maas kʼaj óoltik. Le táan u orar tu yoʼolal u disipuloʼoboʼ, Jesuseʼ tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios» (Juan 17:3; 1 Timoteo 2:4).

¿Bix jeʼel u páajtal k-kʼaj óoltik Dioseʼ?

Jeʼel u páajtal k-kʼaj óoltik Dios yoʼolal le baʼaxoʼob u beetmajoʼ. Utéeneʼ, Jesuseʼ tu yaʼalaj: «Pakteʼex le chʼíichʼoʼob ku xikʼnaloʼoboʼ, maʼ tu paakʼaloʼob mix tu joochoʼob, mix tech u líikʼesikoʼob u yich paakʼal tiʼ chʼiiloʼob, baʼaleʼ a Taataʼex yaan teʼ kaʼanoʼ letiʼ tséentikoʼob. ¿Maʼ wa [maas] yaʼab a tojoleʼex tiʼ le chʼíichʼoʼoboʼ?». ¿Baʼax k-kanik tiʼ lelaʼ? K-kanikeʼ maʼ unaj u xuʼulul k-meyajtik Dios yoʼolal u chiʼichnakiloʼob le kuxtaloʼ (Mateo 6:26-33).

Yaan xan k-maas kʼaj óoltik Dios wa k-xokik le Bibliaoʼ. Jesuseʼ tu yaʼaleʼ le Bibliaoʼ u «tʼaan Jajal Dios» (Lucas 8:21). Tsʼoʼoleʼ, le ka orarnaj tiʼ u Taataeʼ, tu yaʼalaj: «A tʼaaneʼ, letiʼ u jaajil» (Juan 17:17, LTN; 2 Pedro 1:20, 21).

Jesuseʼ tu yáantaj le máakoʼob u kʼaj óoltoʼob u jaajil yoʼolal Jéeobaoʼ. Utúul tiʼ u disipuloʼobeʼ tu yaʼalaj: «¿Maʼ wa jaaj bey jumpʼéel kʼáakʼ tʼaʼab tiʼ k-puksiʼikʼal le ka tʼaanaj t-éetel teʼ bejoʼ, [le] táan u tsoliktoʼon le Kiliʼich Tsʼíiboʼoboʼ?» (Lucas 24:32). Wa k-kʼáat kaambal tiʼ Dioseʼ, unaj k-chaʼik kaʼansaʼal. Unaj k-beetik le baʼax tu yaʼalaj Jesusaʼ: «Wa teʼex maʼ ta kʼexik a tuukuleʼex ka béeychajkeʼex jeʼel bix mejen paalaloʼobeʼ, maʼ bíin okokeʼex tu [reinoi] kaʼaniʼ» (Mateo 18:3).

¿Baʼaxten ku taasik kiʼimak óolal tiʼ máak u kaambal tiʼ Dios?

K-kʼaj óoltik Dioseʼ ku yáantkoʼon k-ojéelt bix jeʼel u yantal u beelal k-kuxtaleʼ. Jesuseʼ tu yaʼalaj: «Kiʼimak u yóol le máaxoʼob ku yilkoʼob u kʼaʼabéetil u natsʼkubaʼob tiʼ Diosoʼ» (Mateo 5:3, NM). Ken k-kʼaj óol Jéeobaeʼ k-kanik bix unaj k-kuxtal utiaʼal ka xiʼiktoʼon utsil. Le oʼolaleʼ, Jesuseʼ tu yaʼalaj: «Kiʼimak yóol le máaxoʼob ku yuʼubikoʼob yéetel ku beetikoʼob baʼax ku yaʼalik Jajal Dios[oʼ]» (Lucas 11:28; Isaías 11:9).

[U tsolajil le oochel teʼ táan juʼun 21]

Utiaʼal ka a kan u maasileʼ, ilawil le yáax xookil tiʼ le libro ¿Baʼax jach tu jaajil ku kaʼansik le Bibliaoʼ?*

[U tsolajil le oochel teʼ táan juʼun 21]

* Beetaʼan tumen u j-jaajkunajoʼob Jéeoba.

[U tsolajil le oochel teʼ táan juʼun 20]

«Teneʼ tsʼoʼok in chíikbesik a kʼaabaʼ tiʼob.» (Juan 17:26, LTN)

[U tsolajil le oochel teʼ táan juʼun 20]

Jeʼel u páajtal k-kʼaj óoltik Dios yoʼolal le baʼaxoʼob u beetmajoʼ bey xan yoʼolal baʼax ku yaʼalik le Bibliaoʼ