Bini li Jġib Tifħir lil Ġeħova

“Ma nistax nemmen lil għajnejja. Qatt ma immaġinajt li se jkollna post daqshekk sabiħ fejn niltaqgħu biex infaħħru lil Ġeħova. L-​ebda ammont taʼ flus ma jistaʼ jġegħelni nħossni daqshekk ferħana!”—MARIA, MESSIKU.

IX-​XHIEDA TAʼ ĠEĦOVA jħobbu jiltaqgħu flimkien sabiex jitgħallmu dwar il-​Kelma t’Alla, il-​Bibbja. (Salm 27:4; Ebrej 10:23-25) U huma jieħdu pjaċir jagħmlu dan b’mod speċjali meta jkunu jistgħu jiltaqgħu f’postijiet taʼ qima dinjitużi. Fis-​snin reċenti huma bnew eluf taʼ postijiet ġodda għall-​qima—imsejħin Swali tas-​Saltna—f’għaxriet taʼ pajjiżi madwar id-​dinja.

X’kien dak li qanqal din l-​attività kollha taʼ bini? Min jagħmlu x-​xogħol? U liema effett għandu dan ix-​xogħol tal-​bini fuq in-​nies involuti? Sabiex nieħdu t-​tweġibiet għal dawn il-​mistoqsijiet, ejja nikkunsidraw dak li kien qed jiġri fil-​Messiku u fil-​Beliże.

Meħtiġin Eluf taʼ Swali tas-​Saltna Ġodda!

Fil-​passat, ix-​Xhieda taʼ Ġeħova fil-​Messiku kienu jiltaqgħu għall-​qima fi kwalunkwe spazju li kienu jsibu—f’xi bitħa fuq wara tad-​djar, fid-​djar tax-​Xhieda, fl-​imħażen, fil-​garaxxijiet, jew fi swali mikrijin. Matul dan iż-​żmien, dawn ix-​Xhieda leali spiss ħasbu fuq kemm kien ikun sew kieku setgħu jibnu s-​Swali tas-​Saltna tagħhom.

Sa l-​1994, diġà kien hemm 388,000 Xhud fil-​Messiku. Stħarriġ li sar dik is-​sena wera li biex ilkoll kemm huma jkollhom il-​post tagħhom taʼ qima, riedu jinbnew 3,300 Sala tas-​Saltna ġdida. Biċċa xogħol verament kbira!

Il-kongregazzjonijiet tal-​lokal kienu diġà bnew is-​Swali tas-​Saltna tagħhom meta setgħu. Imma matul il-​ħames snin taʼ wara, sar evidenti li sabiex ilaħħqu mad-​domanda, kellhom jinbnew iktar swali—u jinbnew iktar malajr. Kif qed jintlaħaq dan il-​bżonn?

Gruppi taʼ Volontieri tas-​Sengħa li Jivvjaġġaw

Fl-​1999 inbeda programm ġdid taʼ bini. Fil-​Messiku ġew ifformati Gruppi għall-​Bini taʼ Swali tas-​Saltna. Xhieda taʼ Ġeħova minn madwar il-​pajjiż kollu—li ħafna minnhom kienu tas-​sengħa fil-​bini—ivvolontarjaw biex jieħdu sehem f’dan il-​programm eċċitanti. Fil-​preżent, fil-​Messiku hemm 35 grupp bħal dan; u hemm grupp ukoll fil-​Beliże.

Dawn il-​Gruppi għall-​Bini taʼ Swali tas-​Saltna jikkonsistu minn madwar 8 sa 20 volontier, kemm irġiel u kemm nisa, li jaħdmu full-time mingħajr ma jitħallsu. Kull grupp ferħan taʼ volontieri jmur minn post għall-​ieħor fl-​istess pajjiż sabiex iħarreġ volontieri oħrajn  fil-​proġetti tal-​bini. Kull volontier jaħdem tmien sigħat kuljum mit-​Tnejn sal-​Ġimgħa kif ukoll Sibt iva u Sibt le. Il-​ġurnata tibda fis-​7:00 taʼ fil-​għodu b’diskussjoni mit-​test tal-​Bibbja, u mbagħad wara jieħdu l-​kolazzjon. Ilkoll kemm huma jkunu ħerqanin biex jagħmlu dak kollu li jintalbu biex jagħmlu. In-​nisa, per eżempju, jagħmlu xogħol simili għal dak li jagħmlu l-​irġiel f’xogħlijiet bħalma huma t-​tikħil u l-​kisi, it-​tqegħid tal-​madum, u t-​tibjid.

Il-kongregazzjoni lokali tgħin billi tipprovdi akkomodazzjoni, tagħmel ħasil taʼ ħwejjeġ, u tipprepara ikliet għall-​volontieri li jivvjaġġaw. Minbarra li jaħdmu flimkien fuq il-​bini tas-​sala, il-​volontieri u x-​Xhieda lokali jgawdu s-​sħubija taʼ xulxin fil-​laqgħat Kristjani u waqt li jkunu qed jieħdu sehem fl-​attività taʼ l-​ippridkar minn bieb għal bieb.

Il-​Premjijiet taʼ li Taqdi Bħala Volontier

Dawn il-​volontieri kif iħossuhom dwar ix-​xogħol li jagħmlu? Daniel, li ilu jaqdi bħala volontier għal iktar minn tliet snin, jgħid: “Huwa veru li naħdmu fis-​sħana u fil-​kesħa, nieklu ikel li m’aħniex imdorrijin nieklu, immorru minn post għall-​ieħor spiss, noqogħdu ’l bogħod mill-​familja tagħna, u spiss inkunu mingħajr ħafna kumditajiet moderni. Imma d-​diffikultajiet huma insinifikanti meta tqabbilhom mal-​barkiet li nirċievu.”

X’inhuma xi ftit minn dawn il-​barkiet? Ħafna volontieri jitgħallmu snajjaʼ ġodda taʼ bini. Imma volontier li jismu Carlos, li jieħu ħsieb wieħed mill-​gruppi l-​kbar, jidentifika dak li fl-​opinjoni tiegħu hu l-​iktar benefiċċju importanti. Hu jgħid: “Sirna qisna familja taʼ 20 membru. Nieklu flimkien, naħdmu flimkien, nistudjaw flimkien, nitolbu flimkien. Ifformajna rabtiet b’saħħithom taʼ ħbiberija.”

Il-gruppi taʼ bini wkoll ifformaw rabtiet sodi taʼ ħbiberija mal-​kongregazzjonijiet tal-​lokal li lilhom imorru jgħinu. José, li ħa sehem f’iktar minn 100 proġett, jgħid: “Id-​dmugħ u t-​tbissim t’apprezzament li tara meta x-​Xhieda lokali jaraw il-​ħolma tagħhom li jkollhom Sala tas-​Saltna ġdida ssir realtà huma tassew taʼ l-​għaġeb.” Hu jżid: “Għandna l-​ferħ li nafu li l-​fidi t’oħrajn tissaħħaħ anki mill-​iċken sehem li jkollok fil-​bini kollu suċċess taʼ dar oħra għall-​qima pura.”

Dak li Twettaq Kien taʼ l-​Għaġeb!

Dawn il-​postijiet għall-​qima m’humiex elaborati u esaġerati fit-​tiżjin tagħhom. Minflok, is-​Swali tas-​Saltna huma disinjati b’mod sempliċi, u b’hekk kien possibbli li jinbnew malajr u mingħajr ma jqumu ħafna flus. Meta jkun possibbli jintużaw materjal u metodi lokali għall-​bini. B’dan il-​mod, tistaʼ tinbena sala ġdida saħansitra f’perijodu qasir taʼ sitt ġimgħat!

Mill-2007, il-​kongregazzjonijiet kollha fil-​Beliże kellhom Swali tas-​Saltna ġodda—total taʼ 17-il waħda. Mill-​1999 biss, fil-​Messiku nbnew iktar minn 1,400 sala!

 Għalkemm sar ħafna xogħol siewi, xorta fadal ħafna xogħol xi jsir. (Mattew 9:37) L-​għadd taʼ Xhieda fil-​Messiku issa żdied għal iktar minn 600,000—li lkoll kemm huma jiltaqgħu tliet darbiet fil-​ġimgħa biex jitgħallmu mill-​Kelma t’Alla. Għalhekk, għad hemm bżonn kważi 2,000 sala ġdida. Li kieku dan ix-​xogħol taʼ bini volontier kien jiddependi biss mill-​isforzi umani, mira bħal din kienet tkun impossibbli biex tintlaħaq. Imma bħalma juru r-​riżultati, bl-​appoġġ t’Alla Ġeħova, “kollox hu possibbli.”—Mattew 19:26.

[Kaxxa/Stampa f’paġna 22]

“Dak li Jgħidu, Jagħmluh”

Il-​kongregazzjonijiet lokali tax-​Xhieda taʼ Ġeħova m’humiex l-​uniċi wħud li jistgħu jiġu effettwati mix-​xogħol tal-​bini taʼ Sala tas-​Saltna. Per eżempju, matul il-​bini taʼ Sala tas-​Saltna fil-​Beliże, raġel li l-​mara tiegħu kienet tagħmel parti mir-​reliġjon Pentekostali qalilha li meta x-​Xhieda taʼ Ġeħova jispiċċaw jibnu l-​“knisja” tagħhom, hu ried jibda jattendi l-​laqgħat tagħhom. X’ġiegħlu jkun irid jagħmel dan? “Nistaʼ nara li Alla hu magħhom,” qal hu. “Huma ma jiġġildux bejniethom meta jkunu qed jaħdmu flimkien. U dak li jgħidu, jagħmluh.”

[Stampa]

Sala tas-​Saltna f’Orange Walk, il-​Beliże

[Kaxxa/Stampi f’paġna 23]

Sforz Globali

Ġew organizzati Gruppi għall-​Bini taʼ Swali tas-​Saltna f’120 pajjiż. Ftit mill-​pajjiżi fejn il-​volontieri huma ferħanin li jagħtu minnhom infushom għal dan ix-​xogħol huma mniżżlin hawn isfel:

Angola, Bolivja, Etjopja, Fiġi, Gana, Hong Kong, Indja, Ġamajka, Kazakastan, Kroazja, Liberja, Moldova, Niġerja, Papwa Ginea Ġdida, Repubblika Dominikana, Rwanda, Tuvalu, Ukraina, Venezwela, Zambja.

[Stampi]

Sala tas-​Saltna f’Acapulco, il-​Messiku

Membri taʼ Grupp għall-​Bini taʼ Swali tas-​Saltna fil-​Messiku

[Stampa f’paġna 23]

Sala tas-​Saltna f’Tlaxcala, il-​Messiku