Go Aga Bakeng sa go Tumiša Jehofa

“Ga ke dumele seo ke se bonago. Ke be ke sa nagane gore re ka tsoga re kopanetše lefelong le lebotse go swana le le bakeng sa go tumiša Jehofa. Ga go tšhelete yeo e ka rekago lethabo leo ke nago le lona!” —MARIA wa kua MEXICO.

DIHLATSE TŠA JEHOFA di rata go bokana gotee e le gore di ithute Lentšu la Modimo, e lego Beibele. (Psalme 27:4; Baheberu 10:23-25) Le gona, di thabela go dira bjalo kudu-kudu ge di kgona go bokana gotee mafelong a hlomphegago a borapedi. Nywageng ya morago bjale, di agile mafelo a mafsa a borapedi a dikete—ao a tsebjago e le Diholo tša Mmušo—dinageng tše dintši lefaseng ka bophara.

Ke’ng seo se tutueditšego gore go be le modiro wo wa go aga? Ke bomang bao ba dirago modiro wo? Le gona ke mafelelo afe ao modiro wo o bago le wona go bao ba tšeago karolo? E le gore o hwetše dikarabo tša dipotšišo tše, ela hloko seo se bego se dutše se direga kua Mexico le Belize.

Go Nyakega Diholo tše Difsa tša Mmušo tše Dikete

Nakong e fetilego, Dihlatse tša Jehofa kua Mexico di be di bokana bakeng sa borapedi lefelong le ge e le lefe leo le bego le hwetšagala—ka morago ga dintlo, magaeng a Dihlatse tše dingwe, mafelong a bobolokelo bja dithoto, dikaratšheng goba diholong tše di hirilwego. Nakong yeo, Dihlatse tše tše di botegago gantši di be di akanya kamoo go bego go ka kgahliša ka gona ge e ba di be di ka ikagela Diholo tša tšona tša Mmušo.

Ka 1994 go be go e-na le Dihlatse tše 388 000 kua Mexico. Nyakišišo yeo e dirilwego ngwageng woo e utollotše gore ge e ba ka moka ga tšona di be di ka ba le mafelo a tšona ka noši a borapedi, go be go tla nyakega gore go agwe Diholo tše difsa tša Mmušo tše 3 300. Woo e be e tla ba modiro o mogolo gakaakang!

Diphuthego tša moo di be di šetše di thomile go ikagela Diholo tša tšona tša Mmušo ge di be di kgona. Eupša nywageng e mehlano e latetšego, go bile molaleng gore e le gore go fihlelelwe tlhokagalo yeo, re be re tla swanelwa ke go aga diholo tše di oketšegilego—gomme re di age ka go akgofa. Tlhokagalo ye be e ka fihlelelwa bjang?

Dihlopha tša Baithapi ba Basepedi Bao ba Nago le Bokgoni

Ka 1999 go ile gwa thongwa lenaneo le lefsa la go aga. Dihlopha tša go Aga Diholo tša Mmušo di ile tša thoma go hlongwa Mexico ka moka. Dihlatse tša Jehofa go tšwa nageng yeo ka moka—tšeo bontši bja tšona di bego di e-na le bokgoni bja go aga—di ile tša ithapela go tšea karolo lenaneong le leo le kgahlišago. Ga bjale go na le dihlopha tše bjalo tše 35 kua Mexico gomme sehlopha se sengwe se thomilwe kua Belize.

Gantši sehlopha se sengwe le se sengwe sa go Aga Diholo tša Mmušo se bopša ke baithapi ba seswai, ba banna le basadi, bao modiro wa bona wa ka mehla e lego go aga gomme ga ba lefše.  Sehlopha se sa baithapi ba thabilego se ya mafelong a fapa-fapanego nageng ya gabo sona go yo etelela pele medirong ya go aga. Moithapi yo mongwe le yo mongwe o šoma diiri tše sewai ka letšatši go tloga ka Mošupologo go fihla ka Labohlano gotee le Mokibelo o mongwe le o mongwe wa bobedi. Letšatši la bona le thoma ka 7:00 a.m. ka go ahla-ahlwa ga temana ya Beibele, gomme gwa latela dijo tša mesong. Bohle ba ikemišeditše go dira selo le ge e le sefe seo ba kgopelwago go se dira. Ka mohlala, basadi ba šoma gotee le banna medirong e bjalo ka go poleisetera, go ala dithaele le go penta.

Diphuthego tša lefelong leo di thuša baithapi ba basepedi ka go ba nea marobalo, go ba hlatswetša diaparo le go ba apeela dijo. Go oketša tabeng ya go šoma gotee go ageng holo, baithapi gotee le Dihlatse tša lefelong leo ba thabela go ba gotee dibokeng tša Bokriste le go šoma gotee modirong wa go bolela le batho ka Beibele ka ntlo le ntlo.

Meputso ya go ba Moithapi

Baithapi ba ba ikwa bjang ka modiro wo ba o dirago? Daniel yo a šomilego e le moithapi ka nywaga ya ka godimo ga e meraro o re: “Ke therešo gore re šoma letšatšing le le fišago le phefong, re ja dijo tšeo re sego ra di tlwaela, re dula re le tseleng, re dula kgole le malapa a rena gomme gantši re phela bophelo bja magaeng.” O oketša ka gore: “Eupša mathata ao re bago le ona ga se selo ge a bapetšwa le ditšhegofatšo tšeo re di hwetšago.”

Tše dingwe tša ditšhegofatšo tšeo ke dife? Bontši bja baithapi ba ithuta mekgwa e mefsa ya go aga. Eupša moithapi yo mongwe yo a bitšwago Carlos, yo a okamelago se sengwe sa dihlopha tše dikgolo, o re o holegile ka tsela e bohlokwa. O re: “Re fetogile lapa la ditho tše 20. Re ja gotee, re šoma gotee, re ithuta gotee e bile re rapela gotee. Re bagwera ba paala.”

Le gona dihlopha tše tša go aga di hlagolela segwera se se tiilego le ditho tša diphuthego tšeo di di thušago. José, yo a tšerego karolo medirong ya go aga ya ka godimo ga e 100, o re: “Go kgahliša kudu go bona megokgo ya lethabo le go myemyela mo go bontšhago tebogo ga Dihlatse ge di bona toro ya tšona ya go ba le Holo e mpsha ya Mmušo e phethagala.” O oketša ka gore: “Re thabišwa ke go tseba gore tumelo ya ba bangwe e matlafatšwa ke karolo e nyenyane yeo re bago le yona go agweng ka katlego ga ntlo e nngwe gape ya borapedi bjo bo sekilego.”

Se se Fihleletšwego se a Makatša!

Mafelo a a borapedi ga se a maemo a godimo kudu goba ao a bitšago kudu. Go e na le moo, Diholo tše tša Mmušo di agwa ka mokgwa o bonolo, e lego seo se dirago gore go kgonege gore di fetšwe ka pela le gore di se bitše kudu. Go dirišwa ditlabakelo le mekgwa ya moo ya go aga neng le neng ge go kgonega. Ka tsela ye, go ka agwa holo e mpsha bonyenyane ka dibeke tše tshela!

Go tloga ka 2007, diphuthego ka moka kua Belize di hweditše Diholo tše difsa tša Mmušo—palo-moka ya tše 17. Kua Mexico, go agilwe diholo tša ka godimo ga tše 1 400 ga e sa le go tloga ka 1999!

 Gaešita le ge go fihleletšwe modiro o montši o mobotse, go sa dutše go e-na le mo gontši mo go swanetšego go dirwa. (Mateo 9:37) Palo ya Dihlatse kua Mexico e oketšegile go fihla go ya ka godimo ga 600 000—tšeo ka moka ga tšona di bokanago gararo ka beke e le gore di rutwe ka Lentšu la Modimo. Ka gona, go sa dutše go nyakega diholo tše difsa tše ka bago 2 000. Ge e ba modiro wo wa go aga wa baithapi o be o ithekgile ka matla a batho feela, go be go tla ba thata go fihlela pakane e bjalo. Eupša ka ge mafelelo a bontšha, ka thekgo ya Jehofa Modimo, “dilo tšohle di a kgonega.”—Mateo 19:26.

[Lepokisi/Seswantšho go letlakala 22]

“Seo ba se Bolelago, ba a se Dira”

Ga se diphuthego tša Dihlatse tša Jehofa feela tšeo di kgongwago kudu ke modiro wa go agwa ga Diholo tša Mmušo. Ka mohlala, nakong ya ge go be go agwa Holo ya Mmušo kua Belize, monna yoo mosadi wa gagwe e lego setho sa kereke ya Pentecostal, o ile a botša mosadi wa gagwe gore ge Dihlatse tša Jehofa di fetša go aga “kereke” ya tšona, o nyaka go kopanela le tšona. Ke’ng seo se ilego sa tsoša kganyogo yeo? O itše: “Ke a bona gore Modimo o na le bona. Ge ba šoma gotee ga ba lwe. Le gona, seo ba se bolelago, ba a se dira.”

[Seswantšho]

Holo ya Mmušo kua Orange Walk, Belize

[Lepokisi/Seswantšho go letlakala 23]

Maiteko a Lefase ka Bophara

Go theilwe Dihlopha tša go Aga Diholo tša Mmušo dinageng tše 120. Ka mo tlase go lokeleditšwe dinaga tše sego kae tšeo go tšona baithapi ba thabilego ba ikgafago modirong wo:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela le Zambia.

[Diswantšho]

Holo ya Mmušo kua Tlaxcala, Mexico

Ditho tša Sehlopha sa go Aga Diholo tša Mmušo kua Mexico

[Seswantšho go letlakala 23]

Holo ya Mmušo kua Acapulco, Mexico